Read kutep 2 Tesalonika 1 Bible Online

2 Tesalonika 1 - kutep bible

2 Tesalonika 1

¹Kutsingken wune ruye uwog-m Bulus, ti Sila, ti Timoti ba ku na ni kumbub ande na Yesu ti ta uwae uten ti Tesalonika, ani ande ti si ana Itse-ti Rimam ti ana Itsekuru-ti Yesu Kristi.

²Itse-ti Rimam ti Itsekuru-ti Yesu Kristi ā nda ni rinyangwae ti utob ti jimshwur.

³Ameinja, ayi tsi ti ti utob uwae ko kiye titini ti ati na nde na Rimam fxaefa ikyaen-ni. Ayi si iken ti pang atang ti ti nde, ikyaen ti, ani ku siser yi uwae kinjo ko ku fufa yi uwe. Ti mbwe-yi ama, ure ti unde titini uwae-ni ku ye te ande ti tsitsi ko ku fufa yang-yi ama.

⁴Iken yine nda ame ti ande-m ike ku ndub ijwe uwae ambub ande Rimam ti tsitsi. Ati ku ri te ande baa, ani na tsi kunn ti ku ru kubenti, ko ti ande na ku nde ni rikaen ti tsotso.

⁵Iken yine ku tso paenine baa, Rimam na ku pwen rikwen-wu ti kubenti. Rikaen ti ani ku ngwa ikyaen Kujwokwe Rimam, ricwunnkyi-yi si ti Rimam u yer rikwen risu-ni baa, ani na pang pu ni ti ni na sang Kujwokwe-wu.

⁶Rimam ku nde iken ti kubenti. Aba ande ti ku nde ni rikaen tine, awu u nda ba rikaen u pae ripab rikaen ti aba nda ni.

⁷Ama ani ande ti ta uwae rikaen tine, ti ati ama, awu u nda ti unyang ti pu usir ti Itsekuru-ti Yesu u ba tso risu-wu. Awu te atom Rimam ti apupwen u si ba tetso

⁸uwae urwa ti ku cwe jig jig. Ama awu u sa rikwen na Rimam ru ba risu ande ti nung-ba Rimam be, u cwe-ba ti aba na u nae risu riben na Ira Tinyang na Itsekuru-ti Yesu be.

⁹Awu u byinn ba kimbab ti si kimbab na rikaen ti tsikukunn. Aba u nung-ba uwe Rimam cwucwo be, u nung-ba uwog ti saen na riyinn-wu be.

¹⁰Iken yine u nde kiye ti awu u kafe ru ba ti wu mbe rurob uwog ande-wu ti sisaen, ande ti ru uwae kinjo uwog-wu meme u teb rinyi-wu. Ani ama u fa atang ikyaen ti ani ru kubenti uwae Ira Rimam ti ati sa tsag te ni.

¹¹Ikyaen ayine, ati ku jwam Rimam risu-ni ko usir titini ti wu na ndeya ni ikyaen ti, pangma ti awu kunn ni ti kucang ti ni na si ande ti kubenti, ni si ahan! Awu ā nda ni kuko ti ni nde iken ti tinyang meme ti ani ku sha ti ni na nde. Awu ā nda ni kuko ti ni nde tag wande ti uwae kinjo-ni nda ni ku nde.

¹²Ama ti ande ti tsitsi u nda rinyi na Itsekuru-ti Yesu Kristi rurob ikyaen ira-ni, ani u tu rurob ikyaen-wu ama. Iken yine u ba tu ni ru ye uwae rinyangwae Itsekuru-ti Rimam fa te ana Itsekuru-ti Yesu Kristi.