Read kutep 2 Tesalonika 2 Bible Online

2 Tesalonika 2 - kutep bible

2 Tesalonika 2

¹Ameinja, ati ku sha ti ti ri te ni ira risu itikafe ba na Itsekuru-ti Yesu Kristi fa ti fengo ti ati te wu u byir risu tetso. Ati ku jwam ni baa, asiti ande a ba ri te ni baa, usir na Itsekuru-ti Yesu na ru ba pu wu, ni kab-ni uwae be.

²Utob-ni ā nwunn-yi ritsen be, ko ayi a si ira ti kusung na tatso ni, ko ayi a si ira ti a ri te ni ti unju, ko ayi na a si ira ti ati na bae uwae kutsingken.

³Ni cwe-ni ti unde iki ā kyaefa ni be, ko ti fengo ti rimang. Ikyaen ti, ani u nung-ni itiba na usir wu be, se iken ti ande yang akwen u kpag risu te Rimam titawe. Cwucwo, awu unde ti sae ru icwe, awu ti a ye tsika iyen ikyaen urwa ti tsi kukunn, awu u tso risu-wu titawe.

⁴Awu u nwunn, u ndub ijwe, u ta rika te iken meme ti ande ku fen yi, ti iken meme ti ande sa tsi uwe-ba baa, ayi na si Rimam-ba. Awu u ru ka sang kusog Rimam tiyang u som u kunn ijwe-wu baa, awu ti na si Rimam.

⁵Ani tangsom-ni te iken yine cwucwo be a? Kiye ti ame te ni ta tetso ame ri ira yine te ni.

⁶Ani nung pu ni iken ti nde nee iken yine nde-yi khika be. Kiye ti usir-wu a ru ba pu wu, awu Unde Titibi wu u ba tso risu-wu.

⁷Awu ku nde wande ti kuko-wu titibi uwae utense tine, amaa, ayi si iken ti ku cwucwe. Awu u ruye-wu ise paenine be, se iken ti a ye ra iken ti byangkyi wu fengo ru titawe.

⁸Isim ayine, ande u nung wu, ama Itsekuru-ti Yesu a ru ba, awu u twenji-wu. Awu u jwu wen wu ti unyang ti unju-wu.

⁹Awu Unde Titibi wune, awu u ba ti kuko na Shetann u nde iken ti ku fur ayib ti tsotso ti wu u kyaefa ande.

¹⁰Awu u kyaefa ande ti fengo titibi ti tsotso u shir ande yang akwen ru yi fengo iticwu. Ande bane u ru uwog urwa ikyaen ti, aba cwe-ba ti a u ye ure te ira ti kubenti be, ko ti ayi si fengo ti aba u nwangru.

¹¹Ikyaen ira yine, Rimam nda ba, aba nungye-ba kubenti be, ikyaen ti a ru kubenti uwae ira ti rifen.

¹²Ikyaen na yine, meme-ba ande ti pyir ti a u ru uwae kinjo uwae ira ti kubenti ā cwe skeb ikentitibi ti ti nde, ama u jwunnsi uwae rikwen na Rimam.

¹³Amaa ana-ti, ko kiye titini ati ku nde kang fxaefa na Rimam ikyaen-ni, ani ameinja ti Itsekuru ye ure te ni. Ati ku nde fxaefa yine ikyaen ti Rimam tsab ni tsi ti kucang baa, ni na si ande ti kucangtsi uwae ande-wu ti tu itinwangru. Awu nde iken yine yi fengo na Kusung-wu ti nda ni kafe ande-wu ti sisaen ama yi fengo na ira ti kubenti ti ani kyangte, u ru uwae kinjo atang.

¹⁴Ayi si ikyaen ira yine ti awu kunn ni ru ba kiye ti ati sa ira tinyang-wu ba tsag te ni. Awu kunn ni ira ikyaen ti ni na ba tu kutunn-ni uwae rurob ti riyinn na Itsekuru-ti Yesu Kristi.

¹⁵Ikyaen yine, ameinja, ni tsi ti kpakang. Ni ye su iken ti kwen ti ati kwen na ni kiye ti ati te ni ta tetso. Ko ayi a si ira unju ko ayi a si ira ti ati bae uwae kutsingken na ni, ni ye su yi nyinyang.

¹⁶Ameinja, ati ku jwam Itsekuru-ti Yesu Kristi risu-ni, ti Itse-ti Rimam ti site ure te ti, ama tatso ti itinyang-wu yi fengo na kpakang utob ti tsikukunn fa te uwae ti tsi risu iken ti tiyang ti ku ba uwe.

¹⁷Aba ā nda ni kpakang utob, u ye ni tsi ti ribom uwae wande ti tinyang ti ani ku nde, ti ira ti tinyang ti ani ku ri.