Read kutep 2 Tesalonika 3 Bible Online

2 Tesalonika 3 - kutep bible

2 Tesalonika 3

¹Ameinja, ira-ti ti ricwunnkyi si ti ni na jwam Rimam ikyaen-ti. Ni jwam wu ti ira na Itsekuru-ti Yesu ā ru yi uwe, ti ayi ā tu rurob uwog ande ti tsitsi pangma ti ayi nde te ni.

²Ni jwam Rimam ti awu ā nwangru ti kujwo ande titibi ti ku kab ira titibi risu-ti. Ayi si-yi meme ande ti ru kubenti uwae ira yi be.

³Amaa, Itsekuru-ti ku kafe-wu unju be. Awu ti u nda ni kpakang utob u nungkyi ni, ti Shetann, awu Unde Titibi Tiyang, ā nde-wu ani ira iki be.

⁴Rimam nda ti, ati sa uwae tsi baa, ani na ku nde wande te iken ti ati fwa ni kusen risu-yi, ama na u ru yi uwe te yi.

⁵Itsekuru-ti ā nde wande uwae utob-ni, ti ni na nungye ure na Rimam, ti ni na kaen kutxom sur utob uwae rikaen-ni pangma ti Yesu Kristi nde.

⁶Ameinja, ati ku fwa ni kusen yi rinyi na Itsekuru-ti Yesu Kristi baa, unde titini kutampwa-ni ti a cwe-wu ti wu na nde wande be, ni ren-ni risu te wu be.

⁷Ani ti risu-ni nung pu ni baa, ayi na nyangskeb ti ni putsa afxen-ti uwae ira yine, ikyaen ti, kiye ti ati te ni ta tetso ati som-ti usom ti uyáng be.

⁸Ati ci-ti wuci na unde iki ti ukaen amen be. Ati pae aser risu-yi u kwab wande ti ajwo-ti usirtaen ti utitang meme. Ati ngwa rikaen ahan ikyaen ti, ati ku sha-ti ti ti na nde ni rikaen be.

⁹A baa, ati na jwam itindeya uwog-ni, ayi u si-yi riraen be, amaa ati nde-ti be. Ati nde wande ti ajwo-ti ikyaen ti ani na nung itso usom ti som ti ati som u putsa kufxen-ti.

¹⁰Ira yi ti ati ku ri te ni ne, ati fwa pu ti pu kusen risu-yi uwog-ni ti kucang baa, unde titini ti a cwe-wu ti wu u nde wande be, awu ā ci-wu wuci be ama.

¹¹Ati ku ri ira yine te ni ikyaen ti, ati fxen baa, ande iki kutampwa-ni na ku nde-ba wande be, ku som kum usom ti uyáng amam u ku sa kujwo sang wande na ariki.

¹²Ati ku fwa utso ande bane kusen yi rinyi na Itsekuru-ti Yesu Kristi baa, aba na som usom-ba ti kujimshwur u sha itici ti itingwa uwae wande ti aba u ku nde ti ajwo-ba.

¹³Ame ku ri te ni meme, ameinja, baa, ni tsikunn ti ku nde iken ti tinyang.

¹⁴Asiti unde iki a ta atang ti cwe-wu ti awu u nde wande ti ira ti ati bae uwae kutsingken wune be, ni nung wu nyinyang. Ni ren-ni risu te wu cwucwo be, ikyaen ti awu ā wae rukwae.

¹⁵Ni sa-ni awu pangma unde ti rika-ni be, amaa ni nung wu baa, awu na si inja-ni ti raen ira ti ni fwa wu kusen.

¹⁶Ati ku jwam Itsekuru-ti Yesu, awu ti ku nda ande utob ti jimshwur ko fengo titini. Itsekuru ā te ni som tetso.

¹⁷Ame Bulus ti ajwo-m bae ira ti kunnji-m ba ku na ni. Ayine si iken ti ame ku nde uwae atsingken-m meme ti ame bae, ti ande na nung baa, ame ti na bae yi.

¹⁸Itinyang na Itsekuru-ti Yesu Kristi ā te ni som tetso meme-ni.