Read kutep 1 Timoti 3 Bible Online

1 Timoti 3 - kutep bible

1 Timoti 3

¹Kubenti ti ame ku ri te ni, unde ti ku kwab ti wu si unde ti uwe uwae ande na Rimam, ayi si wande ti rurob ti awu ku sha.

²Ikyaen yine, unde ti uwe uwae ande na Rimam ā si unde ti a tu-ba wu ti riraen be. Awu ā mbe nyang unda kinjo amam, u si-wu unde ti ku ngwa ku shishaen be. Awu ā si itsekuru na ira ti kab-wu, u ku nde wande-wu skuu skuu ti ben-ayib. Cwucwo awu ā si unde ti ku kyangte ande ti rikyen kununn-wu. Awu ā si unde ti ku kwen tu ande iken.

³Awu ā sa utob tsi-wu risu iken ti ngwa be. Awu ā si-wu unde ti ku nde iken ti ribom be, amaa, awu ā si unde ti ku nde iken-wu ti kujimshwur. Awu ā si-wu unde ti ku sha isum be. Awu ā sa utob tsi-wu risu aser be.

⁴Awu ā si unde ti ye su kununn-wu nyinyang, u site anyisu ti ku nda wu rurob ku nae risu riben te wu,

⁵ikyaen ti, asiti awu a ye su tu-wu kununn-wu be, awu u nde rimang u nungkyi kumbug ande na Rimam?

⁶Awu ā si-wu unde ti ba putsa ira Rimam tishe tishe be, ikyaen ti, awu a si unde ti putsa ira Rimam tishe tishe, iki be awu u ndub ijwe u jwunnsi pangma ti Shetann jwunnsi ne, ama Rimam pwen wu rikwen.

⁷Cwucwo, awu ā si unde ti ande ti ise ku nung wu te rurob, ikyaen ti awu ā shir rikwae ti wae si-wu risu-wu, u pu kutxae Shetann be.

⁸Aba ande ti a tsab ba tsi ti a na ndeya ande ti uwe, aba ā si ande ti ku kab tu ira u ku ri-ba ira ti unju ifaen be. Aba ā si-ba ande ti ku ngwa iken ku shishaen be. Aba ā si-ba ande ti ku sha aser yi fengo ti tikong be.

⁹Uwae usom ti som-ba, aba ā ye su ira Rimam ti rurong, ama nde yi ti fengo ti utob-ba pwen-yi aba rikwen be.

¹⁰Ayi nyang ti ni myae ba myae titawe. Asiti ani a tu-ni aba te riraen be, ni cwe na ba ti a nde wande tiri.

¹¹Anda[1] uwae-ba ama ā si anda ti site utob ti tinyang, ku tsag-ba ande be. Aba ā si anda ti ye su ijwe-ba nyinyang, u ku nde iken meme uwae kubenti.

¹²Aba ande ti a tsab tsi ti a na ndeya ande ti uwe, aba ā site unda kinjo amam. Aba ama ā si ande ti ku nung anyisu-ba ti awa-ba nyinyang,

¹³ikyaen ti, aba ande ti ku nde wande yine nyinyang, aba ku tu rinyi ti tinyang uwe ande u ku tu kpakang uwae itiputsa Yesu Kristi.

¹⁴Ame ku bae na fu kutsingken wune ku kab baa, ame na u tsi-m tsi be u ba nung fu.

¹⁵Asiti ame a ru ba-m fife be, ira ti ame bae uwae kutsingken wune u ndeya fu ti fu nungye usom ti som ti pang atang uwog ande ti Rimam. Aba ti si kumbug ande ti ana Rimam, awu ti site unyang. Aba ti si umbyi kusog, ti kufwá-wu ti ribom.

¹⁶Ira ti kitam ti Rimam mbubta u tatso ti si iken ti ku fe ayib! Rimam tso risu-wu uwae ijwe unde. Kusung ti Saen Kyag cwe ira-wu baa, awu na site kubenti. Atom na Rimam ti apupwen sae wu te ayib. A sa ira-wu kyang ka ri te ande ti utense meme. Ande uwae utense ru uwae kinjo uwog-wu. A ye ra wu tso yi uwog ti tinyang apupwen.