Read kutep 1 Timoti 4 Bible Online

1 Timoti 4 - kutep bible

1 Timoti 4

¹Kusung ti Saen Kyag ri te ti paenine baa, kiye ti ricwunnkyi, ande iki na u ya ira Rimam ta u sa utob-ba na asung titibi ti ku kyaefa ande. Aba u putsa iken ti kwen ti tikong ti ru uwog asung titibi ba.

²Iken ti kwen yine ru uwog ande ti rifen ba. Abane, utob-ba kwen kyi kyi. I si-yi ti a u fxen ira be.

³Ande bane ku kwen na ande baa, ayi na nyang-yi ti unde na mbe unda be. Cwucwo a ku kwen baa, wuci iki na ta atang, ande na ci-ba yi be ko ti Rimam kyae wuci yi ikyaen itici, ama ande ti ru uwae kinjo u nung ira ti kubenti, aba u nde tu ti a ci yi ti fxaefa.

⁴Meme iken ti Rimam kyae si ti tinyang. Ti pyir-ti iken iki uwae-yi be. Ti kyangte yi te fxaefa u ci,

⁵ikyaen ti, ira ti Rimam ri, fa ti kufxaefa ti ati ku nde risu wuci yi, ku nda yi nyang ti ti ci.

⁶Asiti afu a ku kwen na ameinja-ti ande na Rimam ira yine, afu u si upyi ti tinyang na Yesu Kristi. Afu ti risu-fu ama u ser u bom ribom fengo Rimam ikyaen na iken ti kwen na ira Rimam ti ira ti kubenti ti afu ku putsa.

⁷Sa ruye ijwe-fu uwae ira ti ukaen ti ariki ku tsag ti si-yi ana Rimam be. Ayi si ira ti kuskwab amam. Tsikunn ti ti kwab ti som usom-fu pangma unde ti si ana Rimam ti kubenti.

⁸Ikwab ti ani anyisu itaen ku mam, ayi ku ndeya ijwe kpang, amaa, itikwab uwae ira Rimam ku ndeya unde yi fengo meme, ko uwae utense ike, fa kyi ti uwae unyang ti ku ba uwe isim ti awu a cwu.

⁹Ira ti ame ri ne si kubenti. Ayi pang atang ti ande meme ā kyangte yi.

¹⁰Né iken ti nde ati ku kwab u ku nde rikaen, ikyaen ti, ati sa uwae tsi pu ti uwog Rimam ti site unyang, awu ti nwangru ande meme u ku nwangru skeb ande ti ku ru kubenti uwog-wu.

¹¹Kwen na ande-fu iken yine, ti ri te ba ti a putsa yi nyinyang.

¹²Unde iki ā saeru-wu afu ikyaen ti afu na si umbae ti kitinying be. Som usom-fu yi fengo ti ande na Rimam u sae fu u putsa afxen-fu yi uwae ira ti ri-fu, ti ikyi ti kyang-fu, uwae ure, ti uwae fengo ti afu ru kubenti uwog Yesu, ti uwae usom ti som-fu ti sisaen.

¹³Sa tine ba sang kiye ti ame a ba pu m, sa utob-fu tsi risu itinùng putsa iken ti a bae uwae Kutsingken Rimam ti saen kyag, ti itiri bom utob ande, ti iken ti kwen.

¹⁴Saeru-fu rinyangwae na Kusung ti a nda fu yi fengo na ira Rimam ti a ya iskin risu-fu kiye ti andufu pu ajwo cwutsa fu risu be.

¹⁵Nde iken yine ti utob-fu meme ti sa rimenn-fu na yi, ikyaen ti ande meme ā nung baa, wande-fu na ku ru yi uwe.

¹⁶Nung afxen-fu ti iken ti kwen-fu nyinyang, ti kwen iken ti pang atang. Tsi kukunn ti ku nde iken yine, ikyaen ti, asiti afu a nde yi, afu u nwangru risu-fu ti ana ande ti kyangte ira-fu ti afu ku ri meme.