Read kutep 1 Timoti 6 Bible Online

1 Timoti 6 - kutep bible

1 Timoti 6

¹Uwae-ni ande Rimam, ande ti si apyi uwae anunn ande, aba ā nda itsekuru-ba rurob ti pang atang, ikyaen ti unde iki ā tu-wu riyae ti wu ri unju titibi risu Rimam ko iken ti kwen-ti be.

²Aba apyi ti ku nde wande imbyi ande ti si ande Rimam, aba ā sae kyinn-ba itsekuru-ba baa, aba na si ameinja be. Aba ā nde wande ti tinyang, ikyaen ti, aba ande ti uwe-ba ti ku tu kujwojang-ba ayi si sí ande ti ure-ba, ande Rimam. Kwen na ba iken yine, ti ri bom ba ijwe.

³Unde titini ti ku kwen na ande ira iki txi ti ayine, u cwe-wu ira ti kubenti na Itsekuru-ti Yesu Kristi ti iken ti kwen na fengo Rimam be,

⁴awu ku ndub ijwe amam u nung-wu ira iki be. Utso ande bane site utob titibi, u ku sha ti a na shir ishaen ti shaen ti ufxaen ru ba kutampwa ande. Ayine ku shir kitsinn ti asu ti txun ru ba kutampwa ande. Ayi ku nda ande kata atso u kab ira titibi risu atso

⁵u fwan atso kibyag ko kiye titini. Utso ande ti a shir ba sang ishaen ti shaen yine, utob-ba cwu pu yi, a ku kab tu-ba ira ti kubenti cwucwo be. Aba ku tang baa, ira Rimam na si iken iki ti ande na u tu rifunn atang.

⁶Ayi si kubenti, unde u tu rifunn uwae ira Rimam, asiti utob-wu a nae riben ti iken ti awu site.

⁷A mbae ti ti ribam imbyi. Ati pu iken iki kyang su-ti be. Ayi si ahan ama kiye ti ati a cwu ati u ru ti ajwo ukaen.

⁸Ikyaen yine, asiti ati a tu itici ti itingwa ti itisi, ati cwe baa, ayi na pang pu yi ati.

⁹Amaa, ande ti a sa uwae tsi risu rifunn ku pu kob kutxae Shetann. A ku jwunnsi ikyaen iken ti kuskwab ti iken ti ku ndembeb ande ti aba sa utob tsi atang. Itso iken yine ku shir ande ru ka twenji.

¹⁰Itiye ure te aser ti si ipab ti ira titibi ti tsotso meme ku mbug ruye atang. Ayi si ikyaen itisha aser nee ariki shi yaen ru pu ba u pyir ira Rimam ku ru-ba uwae kinjo cwucwo be, u shir ijwe-ba ka si uwae ikajwo titibi.

¹¹Amaa afu Timoti, afu si unde Rimam. Sa ru ijwe-fu uwae iken ti kuskwab yine meme. Kwab ti nde iken ti pang atang ko kiye titini. Tsi ti ribom ti fu ru uwae kinjo uwae fengo na Rimam ti afu ku putsa. Kwab ti si unde ti ku ye ure te ande ko kiye titini. Ko kiye titini ti afu a ku ngwa rikaen, ye utob ye. Som usom-fu ti kujimshwur.

¹²Kwab ti kpakang-fu meme uwae fengo Rimam, ti ye su ira na kuru Rimam ti apupwen nee, afu fxir tso ira ti tinyang risu-wu ayib ujwunn ande.

¹³Uwe Rimam, awu ti ku nda iken meme nyang unyang, ti uwe Yesu Kristi, awu ti tsi ting ting u ri ira ti kubenti uwe Bilatus Buntus, ame ku ri te fu ben ben baa,

¹⁴nae risu riben ti icwe ti a nda fu ne. Ye su yi nyinyang ikyaen ti iken iki ā ndembeb-yi atang be, sa tsi ike ru fe yi Usir ti Itsekuru-ti Yesu Kristi a ru ba.

¹⁵Rimam u tom wu ru ba na ti uwae kiye ti awu sa tsi baa, ayi na pang atang. Ati teb rinyi Rimam ti si ti tinyang, awu kinjo-wu ti ta risu iken meme, awu ti si Ukwe na akwe ti Itsekuru na itsekuru meme.

¹⁶Awu kinjo-wu amam ti ku cwu-wu cwu be. Awu ti som uwog ti sisaen, uwog ti unde iki u ka fob-wu atang be. Awu ti unde iki ta-wu ti nung wu ti ayib be. Awu ti unde iki u nung tu-wu awu te ayib be ama. Kuko ā si ana-wu. Kujwokwe-wu ā tsi kukunn ru fe yi uwe! Ayi ā si ahan!

¹⁷Ri tan ande ti rifunn atong baa, aba na ndub-ba ijwe be, aba na sa uwae tsi-ba risu rifunn ti ku mumam be, amaa a sa uwae tsi uwog Rimam, awu ti sa iken meme yaen si ti ikyaen ti ati na tsen utob atang.

¹⁸Ri te ba ti a na nde wande ti tinyang. Aba ā yata ti wande ti tinyang ā si rifunn-ba. Aba ā ndabta ajwo uwae ure ru ba uwog ande ti tsitsi.

¹⁹Yi fengo yine, wande ti tinyang ti aba ku nde u si rifunn ti u ndeya ba uwe ike. Ayi u si imbyi kusog ti aba ku ta ti ribom. Ayi u nda ba aba u tu unyang ti si unyang ti kubenti.

²⁰Timoti! Nung iken ti a sa fae si fu kujwo nyinyang. Sa ru ijwe-fu uwae ira na ande ba ti a ku kunn ba baa, “Ande ti nung kutsingken.” Iken ti nung-ba si-yi iken ti nung ti kubenti be. Ayi si ira ti ukaen ti ti kuskwab na utense, ti risu ti imbyi-yi ta-yi be.

²¹Ariki ndub ijwe baa, aba na nung kutsingken, amaa aba ya ira Rimam ta pu ba. Itinyang Rimam ā te ni ta tetso meme.