Read kutep 2 Timoti 2 Bible Online

2 Timoti 2 - kutep bible

2 Timoti 2

¹Ana-fu, uyin-m Timoti, tsi ti ribom uwae rinyangwae na Rimam ti si ana-ti ande ti ren risu ti Yesu Kristi.

²Afu fxen pu fu iken ti kwen-m ti ame kwen uwe ande yang-ba. Tine, kwen na ariki ti si ande ti kubenti, ti aba u nde tu ti a kwen na ariki ama.

³Sa kutunn rikaen-fu pangma akyirten na Yesu Kristi ti tinyang.

⁴Akyirten ti ku sha ti unde ti uwe-wu na tsen utob te wu, ku cwe-wu ira ti wu sa risu sang fa wande na ande ti ukaen be.

⁵Uwae kumyae inyae ti ter ama, unde u ci-wu be, se ti awu a putsa icwe.

⁶Unde ti ritom ti ku nde wande ti ribom-wu meme, awu ti tawe u bunn wuci.

⁷Tang ira risu iken ti ame ku ri ne, ikyaen ti, Itsekuru-ti u nda fu nungye tag iken yine meme.

⁸Tangsom te Yesu Kristi, awu ti a kunn nwunn uwae iticwu. Awu si rishi na itse-ti Ukwe Dawuda. Ayine ti si Ira Tinyang ti ame ku tsag te ande

⁹u ku ngwa rikaen ikyaen-yi ba sang ti uwog ti a yir me ti uji kiser pangma ame na raen ira. Amaa, a yir tu-ba ira Rimam be.

¹⁰Ikyaen yine ame cwe ti m u ngwa rikaen meme ikyaen na ande ti Rimam tsab tsi, ikyaen ti aba ama ā tu itinwangru uwog Yesu Kristi fa ti riyinn ti tsi kukunn.

¹¹Ira yine si ira ti kubenti: “Ati ti Yesu cwu tetso, awu nwunn ti unyang, ati ama u nwunn.

¹²Asiti ati a bom utob ka ricwunnkyi, ati te wu ama u nae ukwe te atso uwae kujwokwe-wu. Asiti ati a kafe isim ta wu, awu ama u kafe isim ta ti.

¹³Asiti ati a tsi-ti ti kubenti be, awu tsi ti kubenti ikyaen ti, awu u pyir fob-wu risu-wu be.”

¹⁴Tangsom na ande-fu ira yine, ti fwa ba kusen uwe Itsekuru-ti Rimam baa, aba na fxae ishaen ti shaen ti ukaen ti aba ku shaen. Ayi ku ndeya-yi unde be, ayi ku twenji unyang ande ti ku fxen yi.

¹⁵Kwab ti tu risu tinyang uwe Rimam, u si unde ti wande ti ku wae-wu rukwae risu wande-wu be, ku kwen na ande ira Rimam ti kubenti yi fengo ti pang atang.

¹⁶Itso ira ti askwab ti si-yi ana Rimam be ti ariki ku ri, sa risu-fu sang fa-fu atang be. Ayi ku shir pu ande ru ru uwe Rimam.

¹⁷Iken ti kwen-ba pangma ribang mbyìr ti ku ci ijwe rimenn ku ru. Humenayu ti Filetos fa uwae ande ti ku kwen itso iken yine.

¹⁸Aba ya fengo na kubenti ta pu ba u ku ri baa, itinwunn ande uwae iticwu na wur ru pu yi. Iken ti kwen-ba ne ku nda ariki nung-ba iken ti aba u ru uwae kinjo atang cwucwo be.

¹⁹Amaa, imbyi kusog ti Rimam tā, tsi ti atang ti ribom-wu. Ama a kwa pu ba kujwo atang baa, “Rimam Itsekuru nung pu wu ande ti si ana-wu.” Cwucwo, “Unde titini ti ri baa, awu na si ana Itsekuru-ti Rimam, awu ā ya ikentitibi-wu ta.”

²⁰Uwae kununn unde tiyang, usu ti tsotso ku munnae. Usu iki, a kyae yi te azurfa ti zinariya, iki ama, a mbye yi te ipxam, u skam ariki ru ijwe ituku. Usu iki, a pu yi tsi ikyaen ukwab tiyang, amaa ariki, a pu yi ku nde wande atang ti usir usir titini.

²¹Asiti afu a jwosaen utob-fu u cwe-fu ti ijwe-fu na kwan mbeb te ikentitibi be, afu u si pangma usu ti a sa tsi iyen ikyaeb ikyaen ukwab tiyang. Afu u si unde ti sa ijwe-fu na pu fu wande na itsekuru-fu Rimam, u som ku ji ti fu u nde wande ti tinyang ti tsotso.

²²Sa ru risu-fu uwae ikentitibi ti anyisu itaen ku sha, ti ren risu-fu te ande ti ku jwam itindeya na Rimam ti utob ti saen, u ku putsa iken ti pang atang, ti iken ti si kubenti, ti ure, ti kujimshwur.

²³Amaa, tsi rurwen te ira ti askwab ti ishaen ti shaen ti ru-yi risu be. Afu nung pu fu baa, ayi na ku shir kibyag ti fwan ba.

²⁴Unde ti si upyi na Itsekuru-ti Rimam ā fwan-wu kibyag be. Awu ā si unde ti ku nde iken ti tinyang te ande meme, u ku kwen tu iken, u ku ye utob te ande,

²⁵u ku nde iken sku sku, u ku kyaenyang fengo ande ti ku tsi wu ti uwe. Ikyaen ti, iki be Rimam u mbubta na ba fengo ti aba u ya ikentitibi-ba ta u ba putsa fengo ti kubenti,

²⁶titawe ayib-ba u mbubta, aba u ter ruye uwae kutxae Shetann ti ye ba tsi nee aba ku nae risu riben te ira-wu.