Read kutep Titus 2 Bible Online

Titus 2 - kutep bible

Titus 2

¹Amaa, afu ti risu-fu, kwen na ande iken ti rukwer te iken ti kwen na Ira Rimam ti kubenti.

²Ri te ande ndufu ti aba ā si-ba ande ti ku ngwa ku shishaen be. Aba ā kab ira ti tinyang risu iken ti aba ku nde. Aba ā ye su risu-ba. Aba ā tsi ti ribom fengo Rimam, u ye ure te ande, u tsi ti kpakang uwae rikaen-ba.

³Kwen na anda ndufu ama, ti aba ā som usom ti ikyenricwu Rimam utob-ba. Aba ā si-ba anda ti ku rimbeb rinyi ande ko anda ti ku ngwa ujwab ku kyang be. Aba ā kwen na ariki usom ti som ti pang atang

⁴u kwen na awaribaen fengo ti aba u ye ure te abaen-ba ti anyisu-ba,

⁵u ye su risu-ba, u som usom ti sisaen, u nung kununn-ba nyinyang, u nung risi ande, u nae risu riben na abaen-ba, ikyaen ti unde iki ā tu-wu riyae ti wu rimbeb ira Rimam be.

⁶Cwucwo, ri bom anyisu itaen ti aba ā ye su risu-ba.

⁷Uwae iken ti afu ku nde meme, tso ande baa, afu na ku nde wande ti tinyang, ti aba ā kwen putsa afxen-fu. Nde-fu uru te iken ti kwen-fu be. Sa utob tsi atang.

⁸Ira ti ri-fu ā si kubenti ikyaen ti unde rika-fu iki ā tu-wu riyae ti wu rimbeb ti be, ti rukwae ā wae ande ti ku pyir ira Yesu.

⁹Apyi ā nae risu riben te ande ti uwe-ba uwae meme iken ti aba ku nde. Aba ā nde iken ti ku sa ba utob ti nae riben, si-yi iken ti u shir ishaen ti shaen ba be.

¹⁰Aba ā yib-ba riyib be. Amaa, aba ā tatso uwae kinjo ti kubenti ko kiye titini, ikyaen ti ayi ā nda iken ti kwen ira Rimam ti nwangru ti rurob.

¹¹Ikyaen ti, ayibrisi Rimam mbubta na ti ayib u nde fengo ti ande meme na nwangru.

¹²Ayi kwen tatso ti ti ti na pyir usom ti som ti si-yi ana Rimam be, u sa uwae tsi-ti risu ajaen utense cwucwo be, u ye su risu-ti, u som usom ti kpang atang, ti ikyenricwu Rimam utob-ti, uwae kiye wune,

¹³ti ati som ku ji iken ti tinyang nee ati sa utob tsi atang, ti si usir tiyang ti Rimam-ti ti kuko, ti Itsekuru-ti Yesu Kristi unde ti nwangru ti u ba tatso riyinn-ba.

¹⁴Awu cwu ricwu risu-ti ikyaen ti wu na nwangru ti uwae itso ikentitibi meme, u jwosaen utob-ti, u sa ti kafe ande ti ana-wu, ande ti sa utob na wande ti tinyang ti ti nde.

¹⁵Kwen na ba meme iken yine, ti ri bom ba utob atang. Tsi ting ting risu kuko ti a nda fu ti fu fwa ba kusen ti ufxenjwin ti ribom. Cwe-fu ti unde iki ā sae ru fu be.