Read kutep Filimon 1 Bible Online

Filimon 1 - kutep bible

Filimon 1

¹Ame Bulus, ti ku ngwa rikaen pursuna ikyaen Yesu Kristi, ti inja-ti Timoti, ku bae ira yine ku na Filimon urwan wande-ti ti utob uwae-ti,

²ti kaya-ti Afiya ti Arkipu, urwan-ti ti ati ku ta rika tetso yi Kristi, ti kumbub ande na Yesu ti ku fen Rimam uwae kununn-fu[1].

³Rinyangwae ti kujimshwur na Itsekuru-ti Rimam, ti Yesu Kristi, ā si ana-ni.

⁴Ame ku tso na Rimam-m fxaefa ko kiye titini ti ame a tangsom te fu uwae itijwam-m,

⁵ikyaen ti, ame ku fxen iten kubenti ti afu site yi uwog Itsekuru-ti Yesu, ti ure ti afu ku ye te ande Rimam meme.

⁶Ame ku jwam Rimam baa, uwae kinjo ti ren ti tetso yi fengo Kristi u nda fu nungye tag iken meme ti si ana-ti uwae usom ti som-ti te Kristi.

⁷Inja, ame tu utob ti tsen ti kpakang utob timambe yi ure ti afu site, ikyaen ti, meme ande Rimam tu pu ba utob ti nae riben uwog-fu.

⁸Ikyaen yine, ko ti ame site kpakang ti m ri te fu ti fu na nde iken ti pang atang,

⁹amaa, ikyaen ure, ame tsabsa ti m jwam fu jwam, ame Bulus ti si undufu, u ta pursuna tine ikyaen Yesu Kristi.

¹⁰Ame ku jwam fu risu Onesimu ti si uyin-m tine yi Kristi, ti ame kafe itse-wu uwae ira Rimam kiye ti ame ta pursuna.

¹¹Kute awu si-wu itindeya[2]uwog-fu be, amaa tine awu si itindeya uwog-m timambe, ti uwog-fu ama.

¹²Ame tom wu kafe ru ku ba yi uwog-fu, awu ti si riyaen utob-m apyib.

¹³Á baa, awu na u som te m, ayi ú nyang timambe ikyaen ti, awu ú ndeya m kutunn unju-ni uwae kiye wune ti ame ta-m pursuna ikyaen ira tinyang na Yesu.

¹⁴Amaa, ame ku sha-m ti m nde iken iki ti si-yi ti itinungye-fu be, ikyaen ti itinyang-fu ā si-yi ti a tur fu tur be, ayi ā si iken ti afu nde ti utob-fu.

¹⁵Ame nung pu m ti afu ti Onesimu kata pu ni uwae kiye kpang. Iki be ayi si ahan ikyaen ti wu na kafe ba som te fu uwae kiye ti ititsikunn-yi ta-yi be.

¹⁶Tine awu si-wu upyi cwucwo be, awu skeb pu wu upyi tiri. Awu si Inja uwae ira Rimam. Awu nyang uwae-m si-yi ti ti ri be. Ame tang baa, awu u nyang uwae-fu siskeb, ikyaen ti, awu u si upyi, u si inja-fu fa, yi fengo Itsekuru.

¹⁷Ikyaen yine, asiti afu a nungye baa, ame na si urwan wande-fu, kyangte wu pangma ti afu u kyangte m.

¹⁸Asiti awu a nde raen fu, ko awu a ci ripab iki uwog-fu u pae-wu be, pwen yi fa uwae ana-m.

¹⁹Ame Bulus ti bae ira yine ti ajwo-m baa, ame na u pae na fu meme ripab yi. Ame u ri-m ira iki risu ripab-fu uwog-m be, amaa nung baa, unyang tishe ti afu tu uwae wande-m ti m nde ne, skeb pu yi ripab yi.

²⁰Ame ku jwam fu, inja, ndeya m uwae ira yine yi rinyi Itsekuru, ti utob-m ā tu ribom uwae usom ti som-ti tetso uwog Kristi.

²¹Ti ame ku bae ira yine, ame sa uwae tsi yi risu ti nae riben-fu, u nung baa, afu na u nde skeb iken ti ame jwam fu ne.

²²Cwucwo, ame ku sha ti fu na sha kusog ti nae tsika m ikyaen ti, ame ku tang baa, ikyaen ira ti jwam ti ani ku jwam uwog Rimam, awu u nda m riyae ti m ba uwog-ni.

²³Epafira ti te m som tetso pursuna ike ikyaen Yesu Kristi ku kunnji ni ira.

²⁴Aba Markus, ti Aristarku, ti Demas ti Luka ku kunnji ni ira ama. Aba ti te m ku nde wande Rimam tetso.

²⁵Rinyangwae na Itsekuru-ti Yesu Kristi ā te ni som tetso meme.