Read kutep Mbaibrane 1 Bible Online

Mbaibrane 1 - kutep bible

Mbaibrane 1

¹Ti kute Rimam ku tswa kob kutsa-wu na abitse-ti yi fengo ti tsotso. Awu ku tswa kutsa yi ruye unju atom-wu ti ku ya iski ira-wu.

²Amaa, uwae kiye ti ricwunnkyi ne, awu tom Umbae-wu ba ri ira te ti. Awu tsab umbae-wu tsi ti wu na si risu meme iken ti awu kyae utense. Ayi si si umbae-wu ti Rimam kyae utense yi kujwo-wu.

³Awu ti ku tatso itisaen riyinn Rimam, u ku tatso itso ti Rimam tsi. Ayi si kpakang ira unju-wu ti ye su utense. Isim ti awu jwosaen ikentitibi ande, awu som kujwokwe Rimam ti skeb titag.

⁴A nda wu, awu skeb pu wu atom Rimam ti apupwen ti rurob. Rimam kunn wu baa, “Umbae,” ti si rinyi ti rob skeb tag ana-ba.

⁵Aye uwae atom ti apupwen ti Rimam kunn ji pu wu awu baa, “Afu si umbae-m, yaka ne, afu kafe pu fu ana-m”? Cwucwo, “Ame u si itse-wu, awu ama u si umbae-m[1]”?

⁶Cwucwo, kiye ti awu tom Umbae kucang-wu ba utense, awu ri baa, “Patag atom Rimam ti apupwen ā fen wu.[2]”

⁷Ana atom-wu ti apupwen, awu ri baa, “Awu ku nda atom-wu ti apupwen si ufunn, ama ande ti ku nde wande-wu, awu ku nda ba si ijaen urwa.”[3]

⁸Amaa, ana Umbae-wu, awu ri baa, “Kutxom ukwe-fu Rimam, ititsikunn-wu ta-yi be. Ukum kujwokwe-fu si ti kubenti.

⁹Wande ti kubenti ku tsen fu utob, Wande titibi ku ndembeb fu utob. Ikyaen yine, Rimam ti si Rimam-fu, yerkob pu wu afu, u nda fu utob titsen, u nda fu rurob skeb iraencwu-fu.”[4] Rimam ri ama baa,

¹⁰“Afu Itsekuru ti tā imbyi utense ti kucang akwen. Apupwen meme si kujwo wande-fu.

¹¹Iken yine u twenji tag, amaa, afu u tsi kukunn. Ayi meme u fwá tag pangma kutupwa,

¹²Afu u fur pu yi pangma arun, u fi wu pangma kutupwa. Amaa, afu ku kafe-fu fe ama be. Asang-fu u mam-yi mam ama be.”

¹³Atom titini ti Rimam ri ji pu wu te wu baa, “Som kujwo rici-m ike, se ti ame a nda meme ande rika-fu kafe pu ba iken ti afu u ceb pu fa afxen![5]”

¹⁴Atom Rimam ti apupwen si iken iki a. Aba si-ba asung ti ku ndeya Rimam be a. Awu ku tom ba ru ti a kaa ndeya ande ti a u tu itinwangru.