Read kutep Mbaibrane 11 Bible Online

Mbaibrane 11 - kutep bible

Mbaibrane 11

¹Uwae kinjo si itinung ting ting baa, iken ti ati sa uwae tsi atang na u nde kang. Ayi si itisa utob tsi risu iken ti ande saetu-ba te ayib be.

²Ayi si uwae kinjo ti nda abitse-ti ti kute, tu risu tinyang uwe Rimam.

³Ikyaen uwae kinjo, ati nungye baa, Rimam na mam meme iken ti ta utense yi fengo na ira unju-wu, ama iken ti a ku sae ti ayib ne, a kyae yi ruye uwae iken ti a ku sae-ba te ayib be.

⁴Ayi si uwae kinjo ti nda Abila ru ba uwe Rimam te rinyangwae ti pang atang skeb ana Kayinu, ti si iken ti nde nee Rimam cwe ira-wu, u kyang te rinyangwae-wu baa, awu na si unde ti kubenti. Ama ko ti awu cwu rwen pu wu, uwae kinjo-wu ku ri ira ti atang.

⁵Ikyaen uwae kinjo, a ye ra Enoki tso yi apupwen ti user. Awu cwu-wu cwu be, ikyaen ti Rimam ye ra wu tso pu wu. Ti ti a ye ra wu tso-ba khika be, a ri ira tinyang risu-wu baa, awu na nde iken ti tsen Rimam utob.

⁶Ayi a si-yi te uwae kinjo be, unde u nde tu-wu iken iki ti u nyang uwae Rimam be. Unde ti a ko ba ku fer Rimam, awu ā ru kang uwae kinjo baa, Rimam na ta atang, ama na ku nda ande ti a ku sha wu kujwojang.

⁷Ayi si ti mbwe-yi ama uwog Nuhu. Ikyaen uwae kinjo, kiye ti Rimam fa wu kusen risu iken ti ku ba uwe, ti a nung-ba ayi te ayib be, awu nae risu riben, u pab kuyae tiyang ikyaen itinwangru ishikununn-wu. Yi fengo wune, awu rimbeb itibi utense, ama u kafe unde ti u ci rifunn usom ti pang atang ti a ku tu yi ruye fengo na uwae kinjo.

⁸Kiye ti Rimam kunn Ibrahim baa, awu na ya uten-wu ta, ti awu na ru yi uten ti awu Rimam na u nda wu, Ibrahim ru uwae kinjo, u nae risu riben te ira Rimam ayi. Awu nde ayine ko ti awu nung-wu uwog ti awu ku ru yi atang be.

⁹Ikyaen uwae kinjo-wu, awu ru ka som usom na unde ti rikyen uwae uten wu ti Rimam yer unju risu-wu. Awu te Ishaku ti Yakubu ku nae uwae afug. Aba ama te wu ci rifunn unju ti yer Rimam tetso.

¹⁰Ibrahim som ku ji ti wu som uwae uka iki ti a tā umbyi-yi ti yi tsi kukunn, ti ayi si Rimam ti myae wu u mbye wu te ajwo-wu.

¹¹Uwae kinjo Saraya nda wu, awu kyaen rishwu ko ti awu kyáen tag pu wu. Awu nung pu wu baa, Rimam ti yer unju te wu na si Rimam ti kubenti.

¹²Ko ti Ibrahim kyáen mbeb pu wu ti yi nyangskeb ti wu cwu-wu tiri, Rimam nda wu, awu kinjo-wu mbae jwunn uten. Anyisu-wu, ande u pwen tu-ba aba be, ikyaen ti, a ko pangma aswer ti ta apupwen, ti isa riben.

¹³Ande bane meme cwu ti uwae kinjo-ba, u tu-ba iken ti Rimam yer unju risu-yi te ba be. Amaa, aba sae yi ti fengo ti rwen u shwu ashwu atang u cwe baa, aba na si ande ti rikyen ti si-ba ti kununn utense ike be.

¹⁴Ande ti ku ri itso ira yine, ku tatso paenine baa, aba na ku sha uten ti a na u ru ka som atang.

¹⁵Á baa, aba na ku kab ira risu uten ti aba nwunn atang, aba ú kafe ru pu ba ti atang.

¹⁶Amaa, aba sa uwae-ba tsi risu uten iki ti nyang siskeb, ti si uten ti apupwen. Ikyaen yine Rimam wae-wu rukwae kiye ti aba ku kunn wu baa Rimam-ba be. Awu ti risu-wu kyae uka tsika pu wu aba.

¹⁷Ikyaen uwae kinjo, kiye ti a myae Ibrahim kumyae, awu Ibrahim ti Rimam yer unju te wu, cwe ti wu sa umbae-wu Ishaku ti si kum awu, yerwen na Rimam.

¹⁸Ti kucang-yi Rimam yer pu wu unju te Ibrahim baa, Ishaku ti na u mbae jwunn rishi-wu.

¹⁹Ama awu ru kubenti baa, Rimam na u ndeye ti wu kunn nwunn umbae-wu uwae iticwu. Ayi si ahan ara Rimam sa Ishaku kafe ba na wu ti atang, pangma a na kunn nwunn wu uwae iticwu.

²⁰Ikyaen uwae kinjo, Ishaku wae itinyang si anyisu-wu Yakubu ti Esuwa risu iken ti ku ba uwe.

²¹Yi uwae kinjo, kiye ti Yakubu ta unju iticwu, awu sa ijwe konje ukum-wu u fen Rimam, u wae ira na anyisu Yusufu, ti kinjo ti kinjo.

²²Yusufu ama, ayi si uwae kinjo ti nda wu ri ira risu itiruye ande Isirela uten Ejib. Awu nda ba unju risu akub-wu baa, kiye ti aba a ku nwunn, aba na su akub-wu ru te yi ka nji uten ti Rimam na u nda ba.

²³Ayi si uwae kinjo na itse ti iya Musa ti sa na ba tam wu ka ishaen ita isim ti a mbae wu. Aba sae umbae wu nyang timambe ama aba kyen-ba ikyenricwu icwe ukwe uten Ejib be.

²⁴Yi uwae kinjo na Musa, kiye ti awu ser ben, awu cwe-wu ti a na kunn wu baa, umbae unda ukwe ti Ejib be.

²⁵Awu tsabsa ti wu ngwa rikaen te ande Rimam, ti ti awu u ci ashab rifunn ikentitibi.

²⁶Awu sa rikaen ti Kristi ngwa, tsi uwe skeb rifunn uten ti Ejib, ikyaen ti ayib-wu tsi risu kujwojang ti ku ba uwe.

²⁷Yi uwae kinjo, awu nwunn uten ti Ejib, ama nde-wu ikyenricwu rinae na ukwe ti Ejib be. Awu ye utob u ru yinn yi uwe, pangma awu na ku sae Rimam ti a ku sae-ba wu te ayib be.

²⁸Yi uwae kinjo-wu, awu nde Ukwab Itiyafe u pu anying sam kyi fe ufu kusog-ba, ikyaen ti atom ti apupwen ti ku wen anyisu rifèn ā sang ba wen-wu anyisu Isirela ama be.

²⁹Yi uwae kinjo, aba abitse-ti yen Uyinn Tibyaen ti afxen pangma riben ukaen. Amaa, ande ti Ejib kwab ti a na u yen, u ngwa cwu tag.

³⁰Yi wande uwae kinjo, kupwe ti pakob uten ti Jeriko kyaensi riben bxib, bxib, bxib, isim ti anyisu Isirela pakob wu ka usir itsongfaen.

³¹Yi uwae kinjo, Rahaba ti si iyaen, cwubur-wu te ande ti uten-wu ti kpag risu te Rimam be, ikyaen ti, awu kyangte ande ti ba ku baen uten.

³²Imi ti ame u ri kyi cwucwo tine? Kiye ta-yi ti ame u tsag tag ira risu Gideyon, Baraki, Samson, Jefita, Dawuda, Samuwel ti ande ti tsitsi ti ku ya iskin ira Rimam be.

³³Abane ru uwae kinjo, ama ariki uwae-ba ru ka ci rika risu ukwe ti uten iki, ariki nae ukwe ti kubenti, ariki tu iken ti Rimam yer unju te ba risu-yi, ariki ama, cwunnkyi unju itumu.

³⁴Ariki tsi uwae urwa, iken iki nde-yi aba be. Ariki nwangru kujwo ande ti putsa ba ti kisim rika. Ariki ama bom-ba bom be, amaa, yi uwae kinjo, aba kafe ande ti ribom. Aba kafe ukwe rika tiyang u jae akyirten na uten iki ru ka yag byinn.

³⁵Anda iki ti ru uwae kinjo, ande-ba ti cwucwu kafe ba ti unyang. Ariki, a nde ba rikaen, a cwe iticwu ikyaen ti aba ā nwunn u tu unyang ti nyang skeb awune ike.

³⁶Ariki ngwa rikaen itxir ti txir, ti kimbab ti byinn. Ariki, a cwong ba u ye ba ru ka cwunn pursuna.

³⁷Ariki, a jwunn ba atxom, u pogta ariki ifaen, a yerwen ariki te kisum wen. Ariki shanum atupwa, u ku sī apwa iwen. Aba si-ba te iken iki be, a nde ba iyib beb si-yi ti ti ri be.

³⁸Utso ande bane, utense ru ba uwae. Aba ku yaen uwae kutur khika ti risu rikwen ku nae uwáe rikwen, ti uwae uwáe.

³⁹Meme ande bane rinyi-ba pu iten ikyaen uwae kinjo-ba, amaa, aba tu-ba iken ti Rimam yer unju risu-yi be,

⁴⁰ikyaen ti, Rimam nde fengo iki ti nyang siskeb tsika ti baa, kumyae-wu na si-yi kum ana-ba be, amaa, ana-ba te ti meme itawe ayi u kumunn.