Read kutep Mbaibrane 13 Bible Online

Mbaibrane 13 - kutep bible

Mbaibrane 13

¹Ure na ameinja ā tsi ru fife yi uwe.

²Ni saeru-ni itikyangte rikyen uwae asog-ni be. Ariki kyang te rikyen, u nung-ba ti ayi si atom Rimam ti aba paembe be.

³Ni tangsom te ande ti ta pursuna, pangma ti ani na te ba ta tetso uwae pursuna atang. Tangsom te ande ti a ku nde ba rikaen. Ni sa yi tsi pangma ani na te ba ku ngwa rikaen tetso.

⁴Ko aye ā ye su icwe ribaen-ba ti rurob. Unda ti urom ā pu ajib tso-ba risu uwaen ribaen-ba be. Ikyaen ti, Rimam u pwen meme ande ti amae ti iyag rikwen.

⁵Ni si-ni ande ti ku ye ure te aser skeb risu be. Ni kyikyaen ti iken ti ani site kujwo-ni, ikyaen ti, Rimam ri baa, “Ame u ya fu ta-m be, u sa fu jwunn tika-m be.”

⁶Ikyaen yine ati u ndetu ti ti ri ira wurr baa, “Itsekuru si itindeya-m. Ame u kyen-m ikyenricwu be. Unde u nde m imi?”

⁷Ni tangsom te ande ti uwe-ni, aba ti ri ira Rimam te ni. Ni nung itso usom ti som ti aba som, ti itinyang ti ru ye unyang-ba, ti ni kwen putsa itso uwae kinjo ti aba site.

⁸Yesu Kristi, si si awu ti ire, u si ti yaka, u tsi kukunn ru fife yi uwe.

⁹Iken ti kwen ti tsotso ti tishe ā shir-ni jwe byinn-yi be. Ayi nyang ti utob-ti ā tu kpakang uwae ayibrisi Rimam, si-yi uwae icwe iki risu wuci be. Itaen ti putsa icwe wuci yine, ayi ndeya-yi aba be.

¹⁰Ati site kuta uwog ti ati ku fen Rimam atang. Aba akwen ti ku yer wen iken uwae ufug Rimam, aba si-ba ti riyae ti aba u ci iken atang be.

¹¹Kukwen tiyang ku sa anying ibye sang yi uwae Uwog ti Cwe Siskeb, u ku yerwen yi na Rimam ikyaen itiyata ikentitibi na ande. Ijwe ibye yi ama, a ku twen mbub yi isim uten.

¹²Nee iken ti nde, Yesu ama cwu isim uten ti awu ā jwo saen ikentitibi ande ti anying-wu.

¹³Ikyaen yine, ati ama ā nwunn ruye ka tu wu ise atang ti ti te wu ngwa rikaen na rukwae ti wae yi tetso.

¹⁴Ati u som kunn-ti kunn uwae utense ike be. Ati pu ayib tsi ku sae uten ti ku ba uwe.

¹⁵Ikyaen yine, ti putsa wande Yesu, u tsi kukunn ti ku teb Rimam ko kiye titini. Ayine ti si rinyangwae ti ati ku nda wu. Ayi si iken ti ande ti ku nda rinyi Rimam kuko uwe ande ku nde.

¹⁶Ni saeru-ni kujwo wande ti tinyang ti ti nde be. Ni ndeya atso ti iken ajwo-ni. Ayine si itso iken ti ti twen ti Rimam ku sha.

¹⁷Ni nae risu riben na ande ti uwe-ni ti ni nde iken ti aba ku ri, ikyaen ti, aba ku nungkyi ni. Usir ku ba ti Rimam u pwen ba rikwen risu fengo ti aba nungkyi ni. Ikyaen ayine, ni nda ba, ti aba ā nde wande-ba ti utob ti nae riben, si-yi ti unju ti pwen be, ikyaen ti, ayine u ndeya-yi ani be.

¹⁸Ni jwam Rimam ikyaen-ti. Ikyaen ti, ati u si te utob ti nae riben uwae ira yine, ama ati site utob ti ti u nde meme wande-ti yi fengo ti kpang atang.

¹⁹Ame pu isa tso ukwae, ni jwam Rimam risu-m, ti awu ā tom m kafe ru ba tu ni ti kufe.

²⁰Rimam na kujimshwur, awu ti kunn nwunn Itsekuru-ti Yesu uwae iticwu, Rimam ti ku shi iwentam na-wu, uwae anying unju ti yer ti tsi kukunn,

²¹awu ā nda ni iken ti tinyang meme ikyaen ti ni u nde wande ti nyang uwae-wu. Awu ā nde wande riyaen utob-ti yi fengo ti u nyang uwae-wu, putsa uwog Yesu Kristi, ti riyinn ti kuko ā si ana-wu, tsikunn ike ru fe yi uwe. Ayi ā si ahan!

²²Ameinja, ame ku jwam ni, ni ye utob te ira ti kpang ne ti ame bae na ni ti m ri kpag ni ijwe atang.

²³Ame ku sha ti ni na fxen baa, a saen inja-ti Timoti ta pu ba uwae pursuna. Asiti awu a ba fife, ame te wu u ba uwog-ni tetso.

²⁴Ni kunnji patag ande ti uwe-ni ti ande Rimam ti ta atang meme. Itaen ti ru uten Itali ba ku kunnji ni ama meme.

²⁵Rinyangwae Rimam ā te ni meme ta tetso.