Read kutep Mbaibrane 2 Bible Online

Mbaibrane 2 - kutep bible

Mbaibrane 2

¹Ikyaen yine, ti sa uwae tsi kang nyinyang risu ira ti ati fxen, ti ti jwe byinn-ti be.

²Ati nung pu ti baa, kutsa yi ti atom Rimam ti apupwen tswa né, na si kubenti[6]. Unde ti a kpag risu u nyatsa ira yi ne, a byinn wu kimbab ti pang atang.

³Ati u nwang rimang asiti ati a saeru rurob itinwangru wune? Ti kucang-yi, Itsekuru-ti tsag ira yi, ama ande ti fxen yi sa yi tsag te ti baa, ira yi na si kubenti.

⁴Rimam ti risu-wu munn isim-yi uwae wande ti ku fur ayib ti tsotso ti awu nde, ti uwae rinyangwae ti Kusung ti Saen Kyag pu ka na ande-wu pang ti iken ti awu ku sha.

⁵Wande na itinungkyi utense ti tishe ti ku ba uwe né ati ku ri ira risu-yi, Rimam sa yi na-wu atom-wu ti apupwen be.

⁶A bae uwog iki baa, “Ati ande si imi, ti afu u kab ira risu-ti? Ati ande ti si isa ukaen, ikyaen imi ti afu u nungkyi ti?

⁷Uwae kiye pang afu ko ande si ra skeb atom ti apupwen, u nda ba rurob ti riyinn.

⁸Afu nda ba nae ukwe risu iken meme ti tsitsi.” Tine ti Rimam pu meme iken na pu wu ande kujwo, iken iki ta-yi ti u nwangruye ajwo-ba be. Amaa tine ati nung-ti unde iki ti ta risu meme iken khika be.

⁹Amaa, ati nung unde wu ti a ko ra wu sī skeb atom ti apupwen, awu si Yesu. A nda wu rurob ti riyinn, ikyaen ti, awu ngwa rikaen iticwu. Ayine si ikyaen ti, yi rinyangwae Rimam, awu na u cwu kutunn unju ande meme.

¹⁰Rimam ti mam meme iken, u ye su yi, tsab sa ti wu nda anyisu-wu yang-ba riyinn. Ama ayi pang atang ti awu tom Yesu ba ngwa rikaen, ikyaen ti, yi fengo wune, awu unde ti nda ba nwangru, u si kang unde ti uwe-ba ti kumumunn.

¹¹Awu Yesu ti ku jwosaen utob ande, ti aba ti awu jwosaen ba, itse-ba si kinjo. Nee iken ti nde awu ku wae-wu rukwae ti wu kunn ba baa, ameinja be.

¹²Awu ri baa, “Ame u kunn tso rinyi-fu uwog ameinja-m, u teb-fu kiye ti ati a funn atso.[7]”

¹³Cwucwo, awu ri baa, “Ame u sa ijwe-m konje wu.” Awu ri kyi baa, “Nung! Ame ti anyisu ti Rimam pu na m ta re.”

¹⁴Ti anyisu Rimam bane si ande ti si anying ti ibye ijwe, awu ti risu-wu ama sa rimenn ijwe unde, ikyaen ti uwae iticwu-wu, awu u twenji Shetann, awu ti site kpakang iticwu,

¹⁵ama nwangru meme ande ti ikyenricwu iticwu nda ba kafe apyi-wu ti ti a mbae ba.

¹⁶Kubenti, awu ba-wu ikyaen itindeya atom Rimam ti apupwen be, amaa, ikyaen itindeya rishi Ibrahim.

¹⁷Ikyaen yine, awu kafe kang pangma ameinja-wu yi fengo ti tsotso, ikyaen ti wu ā site ayibrisi, u si kukwen tiyang ti kubenti uwae wande Rimam, u twen ikentitwen ikyaen ikentitibi ande.

¹⁸Awu u nde tu ti wu ndeya ande ti a ku myae ba kumyae ikyaen ti, awu ti risu-wu ngwa rikaen uwae kumyae ti myae.