Read kutep Mbaibrane 3 Bible Online

Mbaibrane 3 - kutep bible

Mbaibrane 3

¹Ikyaen yine, ameinja ti sisaen, ti te ti tu itikunn Rimam tetso, ni tangsom te Yesu ti ati ku ri te ande baa awu na si Atom Rimam u si kukwen-ti tiyang.

²Awu nde wande ti kubenti na Rimam ti tsab ra wu, pangma ti Musa nde wande ti kubenti uwae kusog Rimam.

³A ku nda Yesu rurob skeb Musa, pangma ti unde ti ku mbye kusog site rurob skeb kusog ti awu mbye tsi.

⁴(Meme kusog, unde ti mbye yi, amaa, Rimam ti ku mbye meme iken.)

⁵Musa nde meme wande-wu ti utob kinjo uwae kusog Rimam. Awu si umbaefxen Rimam, u ri tso ira risu iken ti u ba nde uwe.

⁶Amaa, Kristi si umbae unde ti kununn, awu ku nde wande ti kubenti uwae kusog Rimam. Ati ama si kusog-wu, asiti ati a bom utob ru yi uwe, u pam ipam risu iken ti ati sa uwae tsi atang.

⁷Ikyaen yine, pangma ti Kusung ti Saen Kyag ri, “Yaka ne, asiti ani a fxen afxenjwin Rimam,

⁸ni yirkyi-ni utob-ni pangma kiye ti ani kpag risu te m, u myae me kumyae uwae kutur be.

⁹Uwae kutur atang, abitse-ni myae m kumyae, ko ti aba nung kujwo wande-m,

¹⁰ka asang mae ifaen. Ikyaen yine, ame tso rinae te ba, ama u ri baa, ‘Uwae utob-ba, aba tsikunn ti ku jwujwe, u nung-ba fengo-m be.’

¹¹Ame tso rinae te ba, u ben uben baa, ‘aba u tu-ba itisang yi uwog-m ana unyang ti pu be.’ ”

¹²Ameinja, ni nung nyinyang be, unde iki uwae-ni ti a site utob titibi, ti ru-wu kubenti be, u pu ni jwe byinn, u nda ni ter ya Rimam ti site unyang ta.

¹³Ni ri bom atso utob ti usir usir ti a kunn baa, “Yaka ne,” ikyaen ti ikentitibi ā kyaefa-yi ani, u nda utob-ni kwenkyi be.

¹⁴Ati te Kristi ta tetso asiti ati a kpag utob pangma ti ati nde kucang u ru yi uwe ka kwer ricwunnkyi.

¹⁵Pangma ti Kusung ti Saen Kyag ri, “Yaka ne, asiti ani a fxen afxenjwin Rimam, ni yirkyi-ni utob-ni pangma kiye ti ani kpag risu te m, u myae me kumyae uwae kutur be.”

¹⁶Aba si arimi ti fxen ira Rimam, u kpag risu te wu? Si-yi meme ande ba ti Musa pu ba ruye uten Ejib be a.

¹⁷Aba arimi ti tsikunn ku nda wu rinae uwae kutur ka asang mae ifaen? Si-yi aba ti nde ikentitibi u twenji tag uwae kutur be a.

¹⁸Aba arimi ti awu tso rinae te ba, u ben uben baa, aba na u tu-ba itisang yi uwog unyang ti pu-wu be? I si aba ande ti kpag risu te wu.

¹⁹Aba tu-ba itisang be ikyaen ti, a ru-ba uwae kinjo be.