Read kutep Mbaibrane 5 Bible Online

Mbaibrane 5 - kutep bible

Mbaibrane 5

¹Kukwen Rimam tiyang titini ti a tsabsa kutampwa ande, a tsab wu ikyaen ti wu nde wande kutunn unju ande uwe Rimam. Awu ku pu rinyangwae ande na Rimam, u ku twen ikentitwen na Rimam ikyaen itiyata ikentitibi-ba.

²Awu ku nde iken sku sku, u ku ye utob te ande ti nung nyang-ba ira be u ku jwujwe, ikyaen ti, awu ti risu-wu ku pu iskin ama.

³Kiye ti awu a ku yer wen iken ande-wu na Rimam ikyaen ikentitibi-ba, awu ku sa kang ana-wu fa ti atang, ikyaen ti, awu ti risu-wu si unde ti ku nde ikentitibi ama.

⁴Unde ko-wu ti wu nda risu-wu rurob wande tiyang wune be, se Rimam ti a tsab sa wu, pangma ti awu tsab sa Aruna ti kute.

⁵Ayi si ti mbwe-yi ama Kristi ye tso-wu risu-wu ti wu u si kukwen Rimam tiyang be, i si Rimam ti risu-wu ti ye wu tso, u ri baa, “Afu si Umbae-m. Yaka ne, ame si pu m itse-fu[8]”

⁶Awu ri kyi uwog iki baa, “Afu si kukwen ti tsi kukunn, ti finkyi kufxen Melkizedeg.”

⁷Kiye ti Yesu Kristi ta uwae rimenn ijwe, awu sa itijwam-wu ru ba uwog Rimam ti site kuko ti wu nwangru wu uwae iticwu, u jwub ira, u si aten ayib. Ama Rimam fxen itijwam-wu, ikyaen ti, awu jwam ti risu ti nae riben uwog Rimam.

⁸Ko ti awu si umbae Rimam, awu kwen risu ti nae riben uwae rikaen ti awu ngwa.

⁹Ti awu site-wu riraen be, awu kafe ipab na itinwangru ti tsikukunn uwog patag ande ti nae risu riben na wu.

¹⁰Rimam tsab sa wu ti wu si kukwen tiyang ti awu ā finkyi kufxen Melkizedeg.

¹¹Ati site ira yang-yi ti ti ri te ni, amaa, ayi caeb ti ti ri, ikyaen ti, ani ku fxen tan-ni ira cwucwo be.

¹²Tine, ani serben pu ni ti ani ú kwen na ande ira Rimam, amaa, ani ku sha ti unde iki na kwen na kang ni icwe Rimam cwucwo. Ani ku sha akang abyaen, si-yi wuci ti kpakang be.

¹³Asiti unde a tsikunn ti kubyaen ti nyam, awu si umbae ibyaen ti atang bwe. Awu nung-wu iken ti si kubenti ti iken ti si tikong khika be.

¹⁴Amaa, asiti unde a ku kab tu ira u kwen ye pu wu iken ti si kubenti ti iken ti si rifen, unde wune serben pu wu u fxae pu wu abyaen ti nyam u ku ci kiraen tiri.