Read kutep Mbaibrane 6 Bible Online

Mbaibrane 6 - kutep bible

Mbaibrane 6

¹Ikyaen yine, ti ya iken ti kwen ti a ku sa kwen na anyisu tinying risu Kristi ta, ti ti ru yi uwe te iken ti kwen ti rurong. I si-yi ti ati u kwen shem ira risu itiyata kujwo wande titibi be. Si-yi ti ati u kwen shem fengo ti unde u ru uwae kinjo uwog Rimam be.

²Si-yi ti ati u tsikunn iken ti kwen risu batisima, ti ajwo ti a ku pu cwutsa ande risu, ti itikunn nwunn ande uwae iticwu, ti ira rikwen ti ku ba uwe cwucwo be.

³Rimam a cwe ira, ati u ru yi uwe.

⁴Asiti unde a nung pu wu itinyang ti rinyangwae Rimam, u tu pu wu kutunn-wu na Kusung ti Saen Kyag, ama u kaensi, ayi u caeb timambe ti a u shir wu kafe ba.

⁵Ikyaen ti, aba mbwa pu ba utug ira Rimam, u nung pu ba rurob ira ti ku ba uwe.

⁶Asiti aba a jwunnsi, a sa yi ti ukwae-ba, ikyaen ti, a kwer ku shem umbae Rimam risu kutuku, u ku nda kyi wu rukwae ayib ujwunn ande.

⁷Risaen ufang ti ambyi upwen ku tsa atang timambe, ama ti wuci ku waen atang timambe ikyaen na ande ti tom wu tom, risaen wune site itinyang na Rimam.

⁸Amaa, asiti ikajwo ti irum amam a ku tsokyi risaen wune, risaen wu si-wu te itindeya be, ama pang ku pu wu ti a u faen wu kufaen. Ricwunnkyi-wu si urwa ti u twenmbub wu.

⁹Arwan-ti ti utob-ti, ko ti ati ku ri ira yine, ati nung pu ti baa, ani na ku putsa iken ti tinyang ti si fengo na itinwangru ikyaen na ni.

¹⁰Rimam tsikukunn ti kubenti. Awu u saeru-wu wande-ni, ko ure ti ani ku tso ba uwog-wu yi fengo ti ani ndeya ande-wu ti sisaen, pangma ti ani ku nde ti atang ne be.

¹¹Ayi si utob-ti ti ni tsikunn ti itikwab yine ka ti ricwunnkyi, ikyaen ti ni u tu kang iken ti ani sa uwae tsi atang.

¹²Ni nde-ni uyáng be, amaa, ni putsa afxen ande ti ru uwae kinjo, u ye utob, u tu kutunn-ba uwae rifunn ti Rimam yer unju risu-yi.

¹³Kiye ti Rimam yer unju te Ibrahim, awu ben ijwe-wu, ikyaen ti Rimam iki ta-wu ti skeb wu be,

¹⁴u ri te Ibrahim baa, “Kubenti ti ame ku ri te fu, ame u nde fu itinyang, afu u mbae jwunn.”

¹⁵Ibrahim ye utob u somji kiye ti iken yi u nde. Ama Rimam kumunn unju ti yer-wu.

¹⁶Ande ku ben iken ti skeb risu-ba. Asiti unde a ben uben risu iken, awu ku tso baa, ishaen ti shaen na ta-yi cwucwo be.

¹⁷Isim ti Rimam yer unju te Ibrahim, awu sa tsi ti wu tatso anyisu ti u ci rifunn-wu paenine baa, ira ti awu myae tsi na u kafe-yi fe ama be. Ikyaen yine awu ben uben.

¹⁸Rimam nde ayine ikyaen ti ti tu ribom utob atang. Awu yer unju, u yir unju ti yer ti uben ti ben, awu ku yer-wu rifen ama be. Iken ifaen yine u kafe-yi be. Ikyaen yine ati ande ti tu ititam uwog-wu ā yer-ti anying utob be.

¹⁹Ira yine si kutsinn iken ti ati sa uwae tsi atang. Ayi pu ti sang fife yi kusog ti uwae uwog ti a kag wu te kutupwa,

²⁰uwog ti Yesu Kristi ti si kukwen-ti tiyang, pu uwe sang pu wu yi atang kutunn unju-ti, ikyaen ti, awu kafe pu wu kukwen tiyang, ti fikyi kufxen Melkizedeg.