Read kutep Mbaibrane 8 Bible Online

Mbaibrane 8 - kutep bible

Mbaibrane 8

¹Imbyi ira yi ti ati ku ri ta re: Ati site kukwen tiyang ne, ti som kujwo rici kutxom ukwe Rimam ti skeb titag, yi apupwen.

²Awu ti si kukwen Rimam ti ku nde wande kusog Rimam ti kubenti. Kusog Rimam wune si kusog Rimam ti apupwen ti Rimam kyae ti ajwo-wu, si-yi unde iki ti kyae wu be.

³A tsab meme akwen tiyang ti a na pu rinyangwae na Rimam, u twen ikentitwen na wu. Ikyaen yine, kukwen-ti tiyang ti ta apupwen ama site kang iken ti awu ku pu na Rimam.

⁴Á baa, awu na ta ti utense ike awu ú si-wu kukwen be, ikyaen ti, a tsab mam pu ba akwen ti ku twen ikentitwen na Rimam uwae utense ike pangma ti a ri uwae icwe.

⁵Meme wande-ba ti a ku nde utense ike si kubyung iken ti apupwen. Kiye ti Musa ku pwen ti wu kyae kufug Rimam ti Saen Kyag, Rimam ri te wu baa, “Nung! Nde tag meme wande yi putsa iken ti ame tso fu kitaen rikwen akwen.”

⁶Amaa iken ti ati nung si ti, a nda pu ba Yesu wande na kukwen apupwen ti rob skeb wande kukwen ti tikyi ti riben ike. Ti mbwe-yi ama itimyae ti Rimam myae te ande kujwo na Yesu nyang skeb pu wu itimyae-wu ti kucang, ikyaen ti, unju ti yer ti awu yer fa atang nyang skeb ayi ti kucang.

⁷Á baa, unju ti yer ti kucang na nde pu yi wande, a ú nda-ba ati unju ti yer ti tishe cwucwo be.

⁸Rimam ye ande-wu te riraen. Awu ri baa, “Nung, kiye ku ba ti ame u ye unju ti yer tishe tsi te ande Isirela, ti ande umbyi na Yawuda.

⁹Unju ti yer ayine u txi ra te ira ti ame ri te abitse-ba ti kute, kiye ti ame tae ba ruye uwae uten ti Ejib. Kiye wu, aba nae-ba risu riben te ira-m be, ame ama sae ru ba, u fxen-m ira ti jwub-ba be.

¹⁰Tine, ame u yer unju te anyisu Isirela cwucwo. Kiye ku ba ti ame u nda ba kab kob ira risu ira-m, u sa ira-m bae tsi uwae utob-ba. Ame u si Rimam-ba, aba ama u si ande-m.

¹¹Kiye wu, unde iki u kwen na-wu inja-wu ko unde ice-wu baa, ‘Ru ba putsa ira Rimam’ be, ikyaen ti, uwae kiye wu, meme-ba u nung pu ba ame, ande ndufu ti anyisu tinying meme.

¹²Ame u nung ba te ayibrisi ikyaen riraen-ba, u tangsom-m te ikentitibi-ba cwucwo be.” Rimam ti ri.

¹³Ti awu ku ri ira risu unju ti yer ti tishe yine, itikyi fa-wu ukwab cwucwo be. Iken ti a fa-wu ukwab be, u kyaen mbeb pu wu, a u sa wu jwunn tika.