Read kutep Mbaibrane 9 Bible Online

Mbaibrane 9 - kutep bible

Mbaibrane 9

¹Unju ti yer ti kucang site icwe itifen Rimam, u site uwog ti ku cwucwe ti a ku fen Rimam atang.

²A sim kufug u kag ye wu uwae ifaen. Uwae ti tawe, a sa fitila tiyang, ti tebur tsi atang, u pu kubyí ti a ku fen Rimam atang cwutsa risu tebur wu. A kunn rishwu kusog wune baa, Uwog ti ku Cwucwe.

³Isim awune, kutupwa kyensi atang ti kag uwae iki, ti a ku kunn wu baa, Uwog ti Cwe Siskeb.

⁴Uwae Uwog ti Cwe Siskeb wune, a kyae kuta ti a ku twen iken ti ku nung kuyang, ti akpati unju ti yer ti a shi tag yi te zinariya, tsi atang. Uwae akpati wu, a pu kiten zinariya ti wuci ti ku cwucwe ta atang[9], ti ukum Aruna ti shab atsing, fa ti afxae atxom icwe Rimam ifaen, si atang.

⁵A pab kerub ifaen ti ku tatso riyinn Rimam, ndabta asae-yi takyi tag kubur akpati, ti si uwog ti som ayibrisi Rimam. Iken yine, ati u ri tu-ti ira risu yi tan tan, tine be.

⁶Ti aba kyae tag pu ba iken yine, akwen Rimam ku sang uwae Uwog ti ku Cwucwe ti a ku nde wande-ba atang ti usirsir.

⁷Ama kusog ti uwae, kukwen tiyang amam ti ku sang ka atang kipaen kinjo uwae kusang. Ko kiye titini ti awu a ku sang yi atang, awu ku sa anying ibye ye su ikyaen itijwosaen ikentitibi-wu ti ana ande-wu ti aba nde uwae kujwe.

⁸Uwae iken yine meme Kusung Rimam ku tatso ti baa, ti ti uwog ti cwucwe wu tsi ti atang, fengo ti ande u sang ka uwae kusog ti cwe siskeb mbubta tag-wu khika be.

⁹Ayine si itimyae iken ti a ku nde uwae kiye ti ati ta uwae-yi tine. Rinyangwae ti iken ti twen ti akwen ku pu na Rimam ndetu-yi ti yi jwosaen riyaen utob ande ba ti ku pu iken-yi ba be.

¹⁰Meme icwe yine ta nyáng risu itici ti itingwa, ti fengo itijwosaen iken. Ayi si nyáng icwe na ijwe, u tsi ku ji kiye ti a u ye itishe tsi.

¹¹Amaa, kiye ti Kristi ru ba bag wande-wu na kukwen tiyang risu iken itinyang ti ati si te yi, awu sang kufug itifen ti site rurob skeb, u nyang skeb kufug itifen ti tikyi ti ta utense ike. Kufug tishe wune, ayi si-yi unde ti kyae wu be, u si-yi kinjo uwae iken ti a kyae uwae utense be.

¹²Kristi sang yi uwae ufug wu ti cwe siskeb, kipaen kinjo amam, u sang-wu te anying iwen ti indag be. Ayi si anying-wu ti awu sa u sang te yi, u jab mbe unyang ti tsikukunn ikyaen-ti.

¹³Yi uwae icwe ti tikyi, anying iwen ti ana indag ti a ku pu sam, ti itong ti a ku pu mbub ande ti raen ira, ku jworu ikentitibi-ba.

¹⁴Amaa, anying na Kristi u nde kang wande ikyaen ti, uwae itindeya Kusung ti Saen Kyag, awu ti si unde ti si-wu te riraen be, sa risu-wu na Rimam, ama jwo ru tag ajwo wande titibi uwae utob-ti ikyaen ti ti u fen tu Rimam ti site unyang.

¹⁵Ikyaen yine, Kristi tsi kutangpwa ti te Rimam, u ye unju ti yer tishe tsi, ikyaen ti ande ti tu itikunn-wu ā paembe itinyang ti tsikukunn ti Rimam yer unju risu-yi. Ayine nde ikyaen ti, Yesu ru ba cwu ricwu u nwangru ande uwae ikentitibi-ba.

¹⁶Ti mbwe-yi ama risu kutā ti unde a tā tsi, se kiye ti unde wu ti tā kutā wu a cwu pu wu, itawe a u nde wande te kutā wu.

¹⁷Ikyaen ti, kutā ku nde wande isim iticwu unde ti tā kutā yi. Ayi ku nde-yi wande kiye ti awu tsi ti user be.

¹⁸Nee iken ti nde unju ti yer na Rimam ti kucang ku nde-yi wande be, se te anying ibye.

¹⁹Kiye ti Musa sa Icwe na Rimam tsag tag te ande, awu sa anying indag, ti ana iwen, fa te ambyi, u sa soso ti asing iwen ti byaen si atang u sa sam si risu kutsingken icwe, ti risu ande ti funn atang meme,

²⁰u ri baa, “Ayine si anying unju ti yer ti Rimam yer te ni.”

²¹Ti mbwe-yi, awu pu anying yi sam si risu kufug itifen, ti meme isu ti a ku fen Rimam te yi.

²²Kubenti, Icwe ti tikyi wu si-yi te fengo iki ti a u jwosaen iken be, se ti anying amam.

²³Né iken ti nde a jwosaen kang iken yine ti ta utense ike, ti si iken ti rukwer iken ti apupwen. Amaa, itijwosaen iken ti apupwen, iken ti twen-yi u bom skeb anying ibye.

²⁴Ufug itifen ti Kristi sang atang si-wu ufug ti ande kyae ti ajwo be. Awu ti ike ru kusog Rimam ti kubenti ti ta apupwen. Uwog ti Kristi sang atang si uwog ti Rimam ta atang apupwen. Tine awu tsi uwe Rimam kutunn unju-ti.

²⁵Si-yi ti wu tsikunn ku sa ijwe-wu twen shem twen shem pangma ti kukwen tiyang ti riben ike ku nde be. Awu ti utense ike ku sang kusog ti ku cwucwe, te anying ti si-yi ana-wu be, kusang ti kusang. Ana Kristi si-yi ahan be.

²⁶Á baa, ayi na si ahan, awu ú tsikunn rikaen ti ngwa, ti ti Rimam mam utense ba ku sang yaka ne. Ana-wu, awu tso risu-wu kipaen kinjo ru fife ricwunnkyi, ti wu fen ru ye ikentitibi ande, yi fengo na iticwu-wu.

²⁷A sa tsi baa, unde na u cwu ricwu kipaen kinjo, ti somtsa, si rikwen ti pwen.

²⁸Ti mbwe-yi ama, Kristi cwu pu wu ricwu risu ikentitibi ande yang-yi. Awu kafe ku ba kyi ti atsepu ifaen, si-yi ti wu ba ta rika te ikentitibi cwucwo be, amaa, ti wu ba nwangru ande ti som ku ji itiba-wu te atenyib.