Read kutep Yakubu 1 Bible Online

Yakubu 1 - kutep bible

Yakubu 1

¹Ame Yakubu, upyi Rimam ti ana Itsekuru-ti Yesu Kristi, ku nde na ni usuko, ani ande ti Yawudiya kumyaem rijwe asu ifaen ti shag kyi fe utense meme.

²Ameinja, asiti rikaen ti tsotso a tu ni, ni tsen utob!

³Ani nung pu ni, itimyae na uwae kinjo-ni u sa kpakang utob ba na ni.

⁴Ni tsi ti kpakang-ni kyig kyig kyig ru ka furu, ti ni si ande ti kwèn pu ni yi riyaen utob, ti a u tu-ba ani te riraen, ko ti ani u shanum iken iki be.

⁵Asiti unde iki uwae-ni a si-wu te ben-ayib be, awu ā jwam Rimam ti ku mbubta ajwo na ande meme, ku fxir-wu unde iki kufxir be, ama awu u nda wu.

⁶Amaa, unde wu ā jwam Rimam te uwae kinjo, u kab-wu uwae be. Ikyaen ti, unde ti ku kab uwae si pangma ambyi uwae uyinn ti ufunn ku kae wu, ama awu ku ye ka ye ba.

⁷Itso unde wune ā kab-wu baa, awu na u tu iken iki uwog Itsekuru be.

⁸Awu si unde ti unju ifaen, ku ka isim ba uwe.

⁹Unde Rimam ti a sae kyikyinn utense ike, awu ā tsen utob, ikyaen ti, uwe Rimam awu site rurob.

¹⁰Unde ti rifunn ama ā tsen utob uwae rikaen ti tu wu ikyaen ti, pangma ajwug irum, awu u wàen sī sī.

¹¹Ikyaen ti, usir a tso, u ku tsi ku fwaaan, ujwunn usir u nda ajwug irum yi myae jwoo, u skun ru, rinyang-yi ama u waen ru. Ti mbwe-yi ama unde ti rifunn u twenji uwae rifunn ti sha-wu ayi.

¹²Itinyang ā si ana unde ti ye utob u som ti uwae kinjo kiye ti itimyae a ba tu wu. Kiye ti awu a ruye uwae rikaen, Rimam u nae wu ukwe, u nda wu unyang ti tsi kukunn ti Rimam yer unju baa, awu na u nda unde ti site ure te wu.

¹³Unde iki a tu kutxae, awu ā ri-wu baa, Rimam ti na txae wu be. Iken iki ta-wu ti u nda Rimam u nde ikentitibi be. Rimam ti risu-wu ku txae wu unde kutxae be.

¹⁴Ayi si ijaen iken ti ku taen unde ayib ti ku nda unde pu kutxae ikentitibi.

¹⁵Ayib ti taen ayine ku kyaen rishwu u ku mbae ikentitibi. Ikentitibi ama, a ser ben pu wu, awu ku shir iticwu ba.

¹⁶Unde iki ā kyaefa-wu ani be ameinja.

¹⁷Meme rinyangwae ti tinyang, ti rinda ti nda ti pang atang, ku sī uwog Rimam ba. Awu ti si Ite-ti ti kyae usir ti ishaen apupwen. Awu ku kafe-wu fe pangma kubyi be.

¹⁸Ayi si utob-wu Rimam nee awu pu ni súnn utense yi fengo ira-wu ti kubenti, ikyaen ti ti na ta uwe meme iken ti tsitsi ti awu mam.

¹⁹Ameinja-m ti utob uwae-m, ni nung nyinyang, unde titini ā si unde ti ku fxen ira ti kufe, ama awu ā ri-wu ira, ko ti wu tso rinae fife be.

²⁰Ikyaen ti, rinae unde ku ndeya-yi unde ti wu nde iken ti kubenti ti Rimam ku sha be.

²¹Ikyaen yine, ni sa ru risu-ni uwae meme iken ti ajib, ti kujwo wande titibi ti shag kyife uwog meme. Ti risu ti nae riben, ni paembe ira ti a sa tso si utob-ni, ti u nwangru tu unyang-ni.

²²Amaa, ni nde wande te ira ti ani fxen. Ni si-ni ande ti ku fxen fa te atong amam, ku kyaefa risu-ni, be.

²³Unde ti a ku fxen nyang ira Rimam yi atong amam ku nde-wu wande te yi be, awu si pangma unde ti sae ijwe-wu uwae iken ti ku sae uwe,

²⁴u sae sae sae u ru ye, u munnji ijwe-wu.

²⁵Amaa unde ti a nùng putsa icwe Rimam ti sisaen, ti si icwe itisaenta, asiti awu a ye utob, u si-wu unde ti ku fxen ku munnji te yi be, ama ku nde wande te yi, awu u tu itinyang kujwo wande-wu.

²⁶Asiti unde iki a ri baa, awu na si unde ti Rimam, ama ku jwin-wu ira unju-wu jwin be, awu ku kyaefa risu-wu. Itiputsa-wu yi fengo Rimam si ukaen.

²⁷Itiputsa Rimam ti Rimam cwe ira yi si ti, awu ku sha ti unde na ndeya anyisu ti itse-ba ti iya-ba cwu pu ba, ti awa icwu, uwae rikaen-ba, cwucwo, ti ande na ye su ikyaen ti ande na ye su ijwe-ba nyinyang, ti ajib utense ā kwanbeb-yi utob-ba be.