Read kutep Yakubu 4 Bible Online

Yakubu 4 - kutep bible

Yakubu 4

¹Imi ti ku shir rika ti kibyag sang ba kutampwa-ni? Ayi ku ruye-yi uwae ayib ti taen-ni ti ku ta rika te ni be a.

²Ani ku sha iken u ku tu-ni ayi be. Ayine nda ni, ani ku wen ande. Ani taen ayib iken unde u tu-ni ayi be. Ikyaen yine ani ku fwan kibyag u ku kum atso kutxu. Ani tu-ni be, ikyaen ti ani jwam-ni be.

³Ani ku jwam ama ku tu-ni be, ikyaen ti, ani ku jwam-ni iken ayi yi fengo ti pang atang be. Ti fa kyi, ani ku pu yi ka wen yi fengo na ijaen rimenn ijwe.

⁴Ani ande ti ku nde-ni kubenti be[2]! Ani nung-ni ti ure ti ye te utense si rika ti tā te Rimam be a. Ikyaen yine, unde ti a ku ye urwan te utense, awu ku sa risu-wu kafe unde rika na Rimam.

⁵A bae uwae Kutsingken Rimam baa, “Awu na site kitsinn risu kusung-wu ti awu sa sang ti.” Ani ku tang baa, ayine na si ira ti ukaen a.

⁶Amaa, awu ku nda rinyangwae ti siskeb. Nee iken ti nde, a bae ama baa, “Rimam ku tsi ikub te ande ti ku ndub ijwe, amaa, awu ku nda rinyangwae na ande ti ku nae risu riben.”

⁷Ikyaen yine, ni sa ijwe-ni konje Rimam! Ni tsi ti kpakang ti ni shaen ira Shetann, ama awu Shetann u ter ru u ya ni ta.

⁸Ni ko ra ba fer Rimam, awu ama u ko ra ba fer ni. Ani ande ti ku nde ikentitibi, ni ya ikentitibi ti ti nde ta. Ni jwo saen utob-ni, ani ande ti uwae ifaen.

⁹Ni byir utob ikyaen ikentitibi-ni! Ni jwub ira ti aten ayib, ti ni skaen-ni ikyaen ko kam ashwu be!

¹⁰Ni nae risu riben uwe Rimam, awu u ye ni nwunn ritsen.

¹¹Ameinja, ni ri-ni ira titibi risu atso be. Unde ti a ri ira titibi risu inja-wu iki, ko awu a ku pwen wu rikwen, awu ku rimbeb icwe Rimam, u ku pwen icwe Rimam rikwen. Amaa, asiti afu a pwen icwe rikwen, afu si-fu unde ti ku putsa icwe be, afu si unde ti ku pwen rikwen.

¹²Rimam kinjo-wu amam ti ku nda icwe, u ku pwen rikwen. Awu ti u ndetu ti wu twenji ande, awu ti u ndetu ti wu nwangru ande. Afu unde si aye ti fu pwen unde ice-fu rikwen?

¹³Ni naa atong, ani ande ti ku ri baa, “Yaka ati u ru yi uten ne, ucwe ati u ru yi uten iki, kaa nde kusang atang, u kaa nde kujaeb, u tu iken yang fa kujwo,”

¹⁴amaa, ani nung-ni iken ti u nde ucwe be, ikyaen ti, unyang-ni si pangma imenn ti ku sur uwae kiye pang, u fwer ru.

¹⁵Iken ti nyangskeb si ti, unde ā ri baa, “Rimam a cwe ira, u ya ti ta ti unyang, ati u nde ayine ko ayine.”

¹⁶Ayi a si-yi ahan be, ani ku ndub risu u ku tso risu-ni baa, ani na si iken iki. Itso ijwe ti ndub yine si ikentitibi.

¹⁷Unde titini ti a nung iken ti tinyang ti ti nde ama u nde-wu ayi be, uwog-wu, ayi si ikentitibi ti awu nde.