Read kutep Yakubu 5 Bible Online

Yakubu 5 - kutep bible

Yakubu 5

¹Ani ande ti rifunn, ni fxen. Ni jwub ira u mbub ukunn ikyaen rikaen ti u tu ni uwe ike.

²Rifunn-ni rwambub tag pu yi, ibyaen ama ci tag pu yi atupwa-ni.

³Zinariya-ni ti azurfa-ni ayi pù pu-yi rukwēn. Rukwēn yine ku tatso ikentitibi-ni ti u ci tag ijwe-ni pangma urwa. Ani pu rifunn-ni byir tsi pu ni kiye ti ricwunnkyi.

⁴Nung, kujwojang ande ba ti nde na ni wande uwae risaen-ni nee ani byangkyi u pae-ni aba be, ayi ku kunn rikwen-ni uwog-m. Ira ti jwub na ande ti ku bunn wuci-ni sang pu yi kutong Itsekuru ti si Ukwe Rika.

⁵Ani ku ci ku myam myam myam ku kam ijwe-ni uwae rifunn-ni utense, ku shi nyang ijwe-ni ku kim, tsi ku ji usir itiyerwen.

⁶Ani pwen rikwen ye ande ti raen-ba ira be, u wen pu ni ande ti ku nde iken ti kpang atang, aba mbub-ba unju be.

⁷Ikyaen yine, ameinja, ni ye utob ti ni som ji itikafe ba Itsekuru pangma ti unde ti ritom ku som ji awaen wuci uwae risaen. Awu ku ye utob, u som ji upwen ti u nda ritso ti upwen ti ku taen mbae awum.

⁸Ani ama, ni ye utob, ti ni som ti ujwin ku ji itikafe ba Itsekuru ti fer mam pu wu.

⁹Ameinja, ni pwen-ni unju risu atso be, ti a pwen-ba ni rikwen be. Nung, ufwa rikwen tsi ufu ti wu sisang tiri.

¹⁰Ameinja, ni tangsom te ande ti ku ya iski ira Rimam ti kute. Aba ngwa rikaen u kaen kutxom sur utob. Ni putsa afxen-ba.

¹¹Nung, ande ti som ti kpag utob ka usir ti ricwunnkyi, ati ku ri baa, ana-ba nyang. Ani fxen pu ni ira risu utob ti ye na Yuba, u nung pu ni ira ti myae Itsekuru risu-wu, ti itso ti Rimam tso wu ayibrisi ti rinyangwae-wu.

¹²Iken ti skeb meme ameinja si ti, ni ben-ni uben be. Ni ben-ni apupwen ko riben, ko iken iki be. Ira ti ani a cwe, ni cwe kukunn. Ira ti ani a pyir ama, ni pyir kukunn, be Rimam u pwen ni rikwen.

¹³Unde iki uwae-ni ku ngwa rikaen a. Awu ā jwam Rimam. Unde iki uwae-ni ku tsen utob a. Awu ā yang akyang ititeb.

¹⁴Unde iki uwae-ni nae kicaeb a. Awu ā kunn andufu ande Rimam ti aba ā ba jwam na wu itijwam, u ca kindob si wu yi rinyi na Itsekuru.

¹⁵Itso itijwam yine ti a jwam yi ti uwae kinjo, u nwangru unde ti kicaeb wu, ama Itsekuru u kunwunn wu. Asiti awu a nde ikentitibi, Rimam u yata na wu.

¹⁶Ikyaen yine, ni fxirtso ikentitibi-ni te atso, ti ni jwam Rimam na atso ti ni nwangru. Itijwam unde ti som sisaen site kpakang ti yi nde wande.

¹⁷Eliya si unde pangma ati ama. Awu jwam itijwam ti kpakang baa, upwen na tsa-wu be, ama upwen tsa-wu be ara ka asang ita ti ishaen itsongnjo.

¹⁸Awu jwam kyi itijwam, ama apupwen mbubta, upwen tswa, ama ituku ti irum ta itishab ku waen awaen.

¹⁹Ameinja, asiti unde iki uwae-ni a jwe u ya fengo ti kubenti ta, ama unde iki a pu wu kafe ba,

²⁰ni nung nyinyang baa, unde titini ti a ka tae unde ti ku nde ikentitibi ti ku jwujwe, kafe ba ti uwog Rimam, awu nwangru pu wu unyang unde wu uwae iticwu, ama u burkyi pu wu ikentitibi yang-yi.