Read kutep 1 Bitrus 5 Bible Online

1 Bitrus 5 - kutep bible

1 Bitrus 5

¹Ikyaen ayine, ame ku ri ira te ande ndufu ti ta uwae-ni. Ame ti risu-m si unde ndufu u si kinjo uwae ande ti tsi u sae rikaen ti Kristi ngwa. Kiye ti awu a ru ba ku tatso kuko-wu uwog ande, ame u tu kutunn-m atang ama.

²Ni shi iken ti shi ti Rimam pu na ni, ti ni nungkyi ba nyinyang ti utob-ni kinjo, pangma ti Rimam ku sha ti ni na shi ba. Ni nde-ni ayi pangma a na tur ni tur be. Ayi ā si-yi ikyaen ti ni u sha aser atang be, amaa, ni nde yi ikyaen ti ayi si utob-ni.

³Ni si-ni pangma ukwe risu ande ti a pu ba na ni kujwo be, amaa, ni si ande ti ku ceb rifab, ti aba ā putsa afxen-ni.

⁴Ama, kiye ti Unde ti Uwe na ande ti ku shi iken a ka ru ba, ani u tu kubur ukwe, ti pangma ana ukwe ti kuko ti rinyang-wu ku fwa-wu fwa be.

⁵Ani anyisu taen ama, ni fxen ira ande ndufu-ni. Meme-ni, ni nae risu riben na atso, ayine ama ā si kutupwa ti ani si ko kiye titini, u ku ndeya atso ikyaen ti, a bae uwae Kutsingken Rimam baa, “Rimam ku tsi ikub te ande ti ku ndub ijwe, amaa, awu ku nda rinyangwae na ande ti ku nae risu riben.”

⁶Ikyaen yine, ni fur risu-ni riben uwe Rimam ti site kuko, ti awu ā shir ra ni nwunn ritsen uwae kiye ti pang atang.

⁷Ni su meme iken ti ku caeb ni uwae, ba uwog Rimam, ikyaen ti, awu ti ku nungkyi ni.

⁸Ni tsi ti ujwin! Ikyaen ti, unde ti rika-ni, ukwe kukyaefa, ku paen ritum ku kyang pangma itumu, ku sha unde ti wu ye wen kub.

⁹Ni pyir ira ukwe kukyaefa wu, ti ni tsi ting ting yi uwae kinjo-ni, ikyaen ti, ani nung pu ni baa, ameinja-ni ti tsitsi ti ta utense na ku ngwa itso rikaen yi ti ani ku ngwa ne ama.

¹⁰Ama, isim ti ani a ngwa rikaen uwae kiye ti kpang, Rimam, Ukwe Ayibrisi, awu ti kunn ni ba yi riyinn-wu ti tsi kukunn uwog Kristi, awu ti risu-wu ti u kyaenyang ni, u nda ni kpakang, u ye ni tsitsa risu kutxom ti ku kyi-wu kyi be.

¹¹Kujwokwe-wu ā tsi tsikunn ru fife yi uwe. Ayi ā si ahan.

¹²Ame bae ku na ni kutsingken ti pang ne ti itindeya Silivanu ti ame nung, awu si inja-ti ti kubenti. Ame ku sha ti m ri bom ni utob. Ira ti ame ku ri ne, si ira ti kubenti risu ayibrisi Rimam. Ni tsi ting ting te yi.

¹³Kaya-ni ti ta Babila ike ku kunnji ni ira atang, awu ti Rimam tsab wu tsab pangma ti awu tsab ni. Uyin-m Markus ku kunnji ni ama.

¹⁴Ni kunnji atso ira ti ni ye atso bur utob uwae ure na Kristi. Kujimshwur ā si ana-ni, meme-ni ande ti si ana Kristi.