Read kutep 2 Bitrus 2 Bible Online

2 Bitrus 2 - kutep bible

2 Bitrus 2

¹Amaa, atom ti ku ya iskin ira tikong ta atang ama ti kute, pangma ti ande ti ku kwen ira ti rifen u nwunn kutampwa-ni. Aba u tam sang ti iken ti kwen ti ku mbub ira na Rimam, u pyir Itsekuru-ba wu ti jab mbe ba te anying-wu, u shir ititwenji si ijwe-ba risu ti kufe.

²Ariki yang-ba u tum putsa ba uwae fengo-ba ti ku wae rikwae, ama ikyaen-ba, ande ti ise u rimbeb fengo ira ti kubenti.

³Ikyaen rimenn ti sam-ba, aba u ci rug tag ni te ira unju ti rag. Ti kucang akwen, Rimam yer mam pu wu rikwen risu utso ande bane, ititwenji-ba ama u tsi-yi tsi be u ba.

⁴Rimam ya atom ti apupwen ti nde ikentitibi ta-wu be, u pu ba jwunn sang uvum urwa, u cwong ba afxen te ajwo som uwae kufub, som ku ji usir na rikwen.

⁵Cwucwo, kiye ti ande ti kute nde ikentitibi, Rimam ya ba ta-wu be. Ayi si nyáng Nuhu ti ya iskin risu usom ti kubenti uwe Rimam, ti ishikununn-wu ti nwangru, kiye ti Rimam twenji ande ti pyir ira-wu te ambyi.

⁶Ama cwucwo, Rimam pyir ira uten ti Sodom ti Gomora, u twenji ba te urwa, ikyaen ti wu tso ande ti tsitsi baa, ayine na si ira ti u tu ande ti pyir ira-wu.

⁷Ama awu nwangru Lotu, unde ti som sisaen, ti ndembeb utob risu usom ti som ti ku txi iyib na ande ti Sodom.

⁸Ti unde ti tinyang wune som kutampwa-ba, u sae u fxen itso iken titibi-ba ayine, ayi nda wu, awu tu-wu utob ti nae riben be ti usir usir.

⁹Ti ayine meme si ahan, Rimam nung pu wu fengo ti wu nwangru ande ti ta uwog kumbwa. Awu nung pu wu fengo ti wu kwer ande titibi kupong, tsi ku ji usir rikwen.

¹⁰Awu u nde yi siskeb te ande ba ti sa uwae tsi risu ijaen iken na ijwe ti ku txi iyib, ti ande ti ku sae ru ande ti ta risu-ba. Ande bane uwae usom ti som ikentitibi-ba, a ku kyen-ba iken iki ama be, u ku nde iken-ba wurr. Aba ku kyen-ba ikyenricwu be, u ku txunmbeb atom Rimam ti apupwen.

¹¹Amaa, ko atom Rimam ti apupwen, ti bom, u rob skeb ba skeb, ku txunmbeb-ba ande ti tikong bane uwe Rimam ama be.

¹²Amaa, ande bane ku nde iken-ba pangma ibye ti site-yi ira ti kab be, ti ande ku ye yi wen. Aba ku ri ira risu iken ti a nung tan-ba imbyi-yi be. Aba ti risu-ba ama, a u twenji ba.

¹³A u ngwa rikaen ti si kujwojang ikentitibi-ba. Aba ku ngwa ku shaen, ku nae atso kyife rishin, ti ayib wurr usirtaen, ku tang baa, aba na ku ci utug utense, ku wae-ba rukwae be. Aba si iken ti ku wae rukwae kutampwa-ni, pangma iken ti ku txi iyib. Aba ku kyaefa ande ku pam upam atang ama ku ci ku ngwa te ni.

¹⁴Ayib-ba ku reee ikyaen amae ti nae, ku num-ba num te ikentitibi ti ti nde be. Aba ku bwa itaen ti kwèn-ba yi fengo Rimam be, ka pu kutxae. Ijaen iken na ijwe sang tag pu yi aba anying ijwe. Aba si ande ti kufaen ta risu-ba!

¹⁵Aba pyir fengo ti pang atang, u jwe byinn pu ba kutur. Aba putsa rifab Balam umbae Beyor ti sa utob-wu tsi risu rifunn ti awu tu yi fengo na ikentitibi.

¹⁶Amaa, a fwan Balam kibyag risu ikentitibi-wu. Ikyinnsu-wu ri ira pangma unde, u rwaekyi iken ti ku shaén Balam ayib.

¹⁷Ande bane pangma ribung ti wuwom, abyi upwen ti tso u kae yag. Ayi si ikyaen-ba ti a kyae uwog ti byi titang tsika.

¹⁸Aba ku ndub ijwe u ku ri ira ti kuskwab, ku txae ariki kutxae te ira iyag ti nae. Ama ande ti a txae-ba txae ne si ande ti nwangru-ba ru kujwo ande ti kufub nyinyang khika be.

¹⁹Ande ti kwen iken tikong ne yer unju itisaenta te ande, amaa, ande ti risu-ba si apyi kujwo wande titibi, ikyaen ti, unde si upyi iken ti a ci rika risu-wu.

²⁰Isim ti ande a ter nwang pu ba wande titibi na utense u ba nungye Itsekuru-ti Yesu Kristi, ama asiti aba a kafe ka sang kyi uwae ikentitibi ti ti nde, usom-ba ti ricwunnkyi u beb skeb ti kucang.

²¹A baa, a na nungji-ba fengo usom ti som ti kubenti be, ayi ú nyang skeb pu yi, ti ti aba nung wu, ama u kafe isim ta icwe ti ku cwucwe ti a nda ba.

²²Iken ti tu ba ru kwar ti ira ti a ri baa, “Mbapxu u ku kafe ka jang iken ti awu cwo si.” Cwucwo ande ndufu ri baa, “Ko afu a jwo na ingog ijwe, awu u kafe sang ti uwae ipxam.”