Read kutep 2 Bitrus 3 Bible Online

2 Bitrus 3 - kutep bible

2 Bitrus 3

¹Awune si kutsingken ti ifaen ti ame bae ku na ni. Uwae-yi meme, ame kunn ku nwunn ira ti kab-ni risu ira ti kubenti,

²ikyaen ti ni na tangsom te ira ti ru unju ande ti ya iskin ira Rimam kute, fa te icwe na Itsekuru-ti Yesu Kristi unde ti nwangru ti, ayi icwe ti ani mbe uwog atom ti ru ba uwog-ni.

³Ira tiyang ti ni u nung si ti, usir ti ricwunnkyi, itaen ti atxir, ti ku sha nyang iken ti risu-ba amam, u ba nwunn kutampwa-ni, u txir ni atxir.

⁴Aba u ri baa, “Yesu yer unju baa, awu na u kafe ru ba. Awu ta-wu aka? Ti kucang akwen ti abitse-ti cwu, iken iki kafe-yi uwae utense be! Ayi tsi ti mbwe-yi.”

⁵Uwae unghae, aba pyir ira ti kubenti ti ku tatso baa, apupwen na ta atang ti kucang akwen, utense ama, tsoye kutampwa ambyi, yi ira unju Rimam.

⁶Ama Rimam nda ambyi tso, u yaen shag kyife uwog meme, u twenji utense kiye wu.

⁷Amaa, apupwen ti riben ti tsi tine, ayi si si yi fengo ira unju Rimam ti awu ku txen yi tsi ku ji urwa ti ku ba uwe. Awu txen yi tsi ku ji usir ti a u pwen ande ti pyir ira Rimam rikwen u twenji ba.

⁸Amaa, ande-m ti ayib ricwu-m, ni saeru-ni ira kinjo wune be. Ni tangsom baa, uwe Itsekuru-ti usir kinjo pangma asang kumbub kinjo, asang kumbub kinjo ama, pangma usir kinjo.

⁹Itsekuru-ti ku nde-wu kukyib ti wu kumunn unju ti yer-wu pangma ti ariki ku kab be. Awu ku ye utob te ni, ikyaen ti, awu ku sha-wu ti unde iki ā twenji be. Awu ku sha ti ande meme ā kafe isim ta ikentitibi-ba.

¹⁰Amaa, usir na Itsekuru-ti u ru ba kpugfa ni pangma unde ti riyib. Ti ritum ti tum, apupwen u yafe ru, ama urwa u ye meme iken ti ta apupwen, ayi u yagsur. Utense ama, ti kujwo wande ti a nde uwae-yi meme, a u shaen yi nae ise.

¹¹Ti meme iken yine u twenji ne, ani u si utso ande ti rimang uwae usom ti som-ni? Ni som usom ti sisaen, u som usom yi fengo Rimam.

¹²Ni som ti ujwin, ti ni fae usir itiba Rimam fae. Usir wu si usir ti apupwen u ye urwa, ama meme iken ti ta uwae-yi u twen u yagsur!

¹³Amaa, ati som ku ji iken ti Rimam yer unju risu-yi, ti si apupwen tishe ti utense tishe, uwog ti usom ti sisaen amam, ti ta atang.

¹⁴Ikyaen yine, ande-m ti utob uwae-m, ti ani som ku ji Usir wu, ni kwab ti ni som usom ti sisaen, ti Rimam ā tu-wu ani te riraen be. Ni kwab ti ni som usom ti kujimshwur.

¹⁵Ni nung nyinyang baa, utob ti ye na Itsekuru-ti ku nda ande riyae ti a nwangru, pangma ti inja-ti Bulus bae na ni uwae ben ayib ti Rimam nda wu.

¹⁶Awu ku bae kob ira yine uwae meme iken ti bae-wu kiye ti awu a ku ri ira risu iken yine. Ira iki uwae atsingken-wu ayi kpukpag ti ande u nungye. Ande iki ti nungtu-ba ira be, ti utob-ba ku tsi-yi uwog kinjo be, ku cebfur ira-wu ayi, pangma ti a ku nde te atsingken Rimam iki. Ama aba ku shir na ijwe-ba ititwenji.

¹⁷Ikyaen yine, ani ama, ti ani nung pu ni ira yine, ni nung nyinyang ti ikentitibi ande ti ku nyatsa icwe bane ā ci ra-yi utob-ni, u fen pu ni afxen riben be.

¹⁸Amaa, ni siser yi rinyangwae ti ben-ayib ti ani ku tu uwog Itsekuru-ti Yesu Kristi Unde ti Nwangru ti. Rurob ti riyinn ā si ana-wu ru fife yi uwe! Ayi ā si ahan.