Read kutep 1 Yohana 2 Bible Online

1 Yohana 2 - kutep bible

1 Yohana 2

¹Anyisu ne, ame bae ku na ni ira yine ikyaen ti ni na nde-ni ikentitibi be, amaa, asiti uriki uwae-ni a nde ikentitibi, ati site Úkā rikwén tiyang ti ta te Itse-ti Rimam, awu si Yesu Kristi, unde ti ku nde kob iken ti kubenti.

²Awu Kristi ti si fengo ti Rimam ku yata na ti ikentitibi-ti, ama ayi si-yi nyang ikentitibi-ti amam be, amaa, fa ti ikentitibi na ande ti utense meme.

³Iken ti u tso paenine baa, ati na nung Rimam si ti ati a ku ye su Icwe-wu.

⁴Unde ti a ri baa, “Ame nung Rimam,” ama ku ye su-wu icwe Rimam be, unde wune si unde ti rifen. Kubenti ta-yi uwog-wu be.

⁵Amaa, asiti unde a ku nae risu riben te ira Rimam, ayi tso baa, ure Rimam na kumunn pu yi uwae usom ti som unde wu. Yi fengo wune, ati u nung kubenti baa, ati te Rimam na ta te atso.

⁶Unde ti a ri baa, awu na baefa te Rimam, awu ā kyang putsa rifab Yesu.

⁷Ande ti ure-m, icwe ti ame ku bae ne si-yi icwe ti tishe be. Ayi si sí icwe ti tikyi ti ani fxen pu ni pu ti kucang uwog-ti.

⁸Amaa, ko ti ayi si ahan, ayi si icwe ti tishe ti ame bae ku na ni tine, ama usom ti som Kristi, ti ana-ti, tatso baa, icwe yi na si kubenti, ikyaen ti, kufub ter ru ku pu wu, itisaen ti kubenti ama ta pu wu ti ti jae.

⁹Unde ti a ri baa, awu na ta uwog ti sisaen, ama ku sa inja-wu kuka, awu ta ti uwae kufub bwe.

¹⁰Amaa, unde ti a ye ure te inja-wu, awu baefa pu wu te itisaen, iken iki ta-yi ti awu u kyen kufxen atang be[1].

¹¹Amaa, unde ti a ku sa inja-wu kuka, awu ta ti uwae kufub, u ku kyang rururunn uwae kufub, u nung-wu uwog ti ru-wu be, ikyaen ti, kufub sikyi wu ayib.

¹²Ame bae ku na ni anyisu ne, ikyaen ti, a yata na pu ba ani ikentitibi-ni, yi rinyi Yesu Kristi.

¹³Ame bae ku na ni abitse, ikyaen ti, ani nung pu ni awu ti kucang akwen. Ame bae ku na ni anyisu itaen ikyaen ti, ani ci pu ni rika risu awu titibi wune. Ame bae ku na ni anyisu tinying, ikyaen ti, ani nung pu ni Itse-ti Rimam.

¹⁴Ame bae ku na ni abitse ikyaen ti, ani nung pu ni awu ti ta atang ti kucang akwen. Ame bae ku na ni anyisu itaen, ikyaen ti, ani site ribom ijwe. Ira na Rimam ama baeye te ni. Ani ci pu ni rika risu awu titibi wune.

¹⁵Ni ye-ni ure te utense ko iken ti si ana utense be. Asiti unde iki a ku ye ure te utense, awu si-wu ti ure te Itse-ti Rimam be.

¹⁶Ikyaen ti, meme iken ti si ana utense, ayi iken ti ku taen ayib, ti iken ti ijwe ku sha, ti meme iken ti ande ku ndub ijwe risu-yi, meme iken yine ru-yi uwog Rimam ba be. Ayi si iken utense.

¹⁷Utense ti meme iken ti ku taen ayib ti ta uwae-yi, nyae ku tsitsa, amaa, unde ti ku nde iken ti Rimam ku sha, awu u som kukunn.

¹⁸Anyisu-m, ricwunnkyi utense kyang ku yaen ku pu yi. Pangma ti a ri te ni baa, unde ti kuka Kristi na u ru ba, tine ande ti kuka Kristi yang akwen ba pu ba. Ikyaen yine ati nung pu ti baa, ayine na si ricwunnkyi kiye wu.

¹⁹Aba ter ya ti ta, ikyaen ti, aba fa-ba uwae-ti be. Á baa, aba na fa uwae-ti, aba ú som kunn te ti. Amaa, aba ter nwunn ikyaen ti ayi ā nae ise paenine baa, aba na fa-ba uwae-ti be.

²⁰Amaa, ana-ni, Awu ti Saen Kyag yerkob pu wu ani, ama meme-ni nung pu ni kubenti.

²¹Ame bae ku na ni, si-yi ikyaen ti ani na nung-ni kubenti be, be, amaa, ikyaen ti, ani nung yi, u nung pu ni ben ben baa, itikong na si-yi kubenti be.

²²Aye ti si unde ti tikong? Awu si unde ti a pyir baa, Yesu na si-wu Unde ti Rimam Tsab Tsi be. Unde wune si unde ti kuka Kristi. Awu pyir Itse-ti Rimam ti Umbae-wu meme.

²³Unde ti a pyir ira Umbae Rimam, awu pyir pu wu Itse-wu ama. Unde ti a kyangte Umbae Rimam, awu kyangte pu wu Itse-wu ama.

²⁴Ni sa ira Rimam ti ani fxen ti kucang tsi utob-ni. Asiti ira ti ani fxen ti kute a tsi riyaen utob-ni, ani ama u baefa Umbae ti Itse meme.

²⁵Ama, iken ti awu yer unju te ti baa awu na u nda ti si unyang ti tsi kukunn.

²⁶Ame bae ira yine ku na ni risu ande ti ku kwab ti a na kyaefa ni.

²⁷Amaa, ana-ni, itiyerkob ti Kristi yerkob ni, baeye pu yi te ni, si-yi ti unde iki u kwen na kyi ni cwucwo be. Ti itiyerkob-wu ku kwen na ni meme iken ti si kubenti, u si-yi rifen be, u si pangma ti awu kwen na ni, ni baefa te wu.

²⁸Ama tine anyisu ne, ni baefa te ira Yesu, ikyaen ti, kiye ti awu a ru ba, ati u site ribom utob u wae-ti rukwae be.

²⁹Ti ani nung pu ni baa, Kristi na si Unde ti Sisaen, ani u nung ama baa, unde ti a ku nde iken ti pang atang, awu na si umbae Rimam.