Read kutep 1 Yohana 3 Bible Online

1 Yohana 3 - kutep bible

1 Yohana 3

¹Ni sae utso ure ti Itse-ti Rimam ye te ti, ti awu cwe ti a na kunn ti baa anyisu-wu. Kubenti, ati si anyisu-wu ara. Iken ti nde ne ande ti utense nung-ba ati be si ikyaen ti, aba nung-ba Itse-ti Rimam be.

²Ande-m ti ayib ricwu-m, tine, ati si anyisu Rimam, amaa, iken ti ati u ba si uwe ike, tso-yi risu-yi khika be. Amaa, iken ti ati nung si ti usir ti awu a ba tso risu-wu, ati u pangma awu. Ikyaen ti, ati u nungye wu pangma ti awu tsi.

³Unde ti a sa uwae tsi risu-wu, awu ku kwab ti wu som usom ti sisaen pangma ti Yesu ti risu-wu si unde ti sisaen.

⁴Unde ti a ku nde ikentitibi, awu ku nyatsa icwe, ikyaen ti, unde ti ku nde ikentitibi si unde ti ku putsa-wu icwe Rimam be.

⁵Ani nung pu ni baa, Kristi na ru ba ikyaen ti wu su ikentitibi-ti ru. Awu ku nde-wu ikentitibi ama be.

⁶Unde ti a sa ijwe-wu baefa Kristi, awu u tsi kunn-wu ikentitibi ti ti nde be. Ama unde ti a tsikunn ikentitibi ti ti nde, awu sae ji-wu Kristi be, ama u site-wu itinungye-wu be.

⁷Anyisu ne, unde iki ā kyaefa-wu ani be! Unde ti a ku nde iken ti pang atang, awu si unde ti tinyang, pangma ti Kristi si unde ti tinyang.

⁸Unde ti a tsikunn ikentitibi ti ti nde, awu si ana Shetann, ikyaen ti, awu Shetann ku nde ikentitibi bag ti kucang. Iken ti nda Umbae Rimam ba utense si ti wu na twenji wande titibi na Shetann.

⁹Unde ti a si umbae na Rimam, awu u tsikunn-wu ikentitibi ti ti nde be, ikyaen ti, itso Rimam ta anying-wu. Awu ama u tsikunn-wu uwae ikentitibi be, ikyaen ti, Rimam si Itse-wu.

¹⁰Iken ti nda ti nung itikata kutampwa anyisu Rimam ti anyisu Shetann si ti, unde ti a ku nde-wu iken ti si kubenti be, u ku ye-wu ure te inja-wu be, awu si-wu umbae Rimam be.

¹¹Ira ti ani fxen ti kucang si ti, ti na ye ure te atso.

¹²Ati ā si-ti pangma Kayinu be, awu umbae Shetann ti wen ra inja-wu. Imi ti nde awu wen ra wu? Ayi si ikyaen ti, kujwo wande-wu si titibi, ama ana inja-wu si ti tinyang.

¹³Ni fur-ni ayib be, ameinja, asiti utense a ku sa ni kuka.

¹⁴Ati nung pu ti baa, ati na nyatsa pu ti kukwae iticwu, u ta pu ti uwog unyang ti tsi kukunn. Ati nung ayine ikyaen ti, ati ku ye ure te ameinja. Unde ti a site-wu ure be, awu ta ti uwae iticwu.

¹⁵Unde ti a ku sa inja-wu kuka, awu si unde ti ku wen ande. Ani nung pu ni ama baa, unde ti ku wen ande na site-wu unyang ti tsi kukunn be.

¹⁶Fengo ti ati u nung ure ti kubenti ta re. Yesu cwe u cwu kutunn unju-ti. Ti ayi si ahan, ati ama ā cwe ti ti cwu ricwu ikyaen ameinja-ti.

¹⁷Asiti unde ti site rifunn a tu inja-wu iki ti site-wu iken kujwo be, ama u sae-wu inja-wu awu te ayibrisi be, awu u kyang rimang u ri baa, awu na site ure Rimam uwae utob-wu?

¹⁸Anyisu ne, ure-ti ā si-yi ti unju amam be, ayi ā si ure ti kubenti ti ku tso risu-yi uwae wande.

¹⁹Ayine ti ku tso baa, ati na si ande ti kubenti, u ku nda ti tsi ti kpakang uwe Rimam.

²⁰Ikyaen ti, ko kiye titini ti anying ijwe-ti a ri mbeb ti, ati nungye baa, Rimam skeb pu wu ira ti anying ijwe-ti ku ri te ti. Awu nung tag iken meme pab.

²¹Ameinja ti ayib ricwu-m, asiti anying ijwe-ti a ri mbeb-yi ati be, ati site kpakang utob ti ti u tsi uwe Rimam, ijwe u fwer-yi ati be.

²²Ama meme iken ti ati a jwam uwog-wu, ati u tu yi, ikyaen ti, ati ku nae risu riben te icwe-wu, u ku nde iken ti ku nyang uwae-wu.

²³Icwe-wu si ti, ti na ru kubenti yi rinyi Umbae-wu Yesu Kristi, ama ti ti na ye ure tetso pangma ti Kristi ri te ti.

²⁴Unde ti a ye su icwe Rimam, awu baefa pu wu Rimam, Rimam ama te wu ta tetso. Iken ti tatso ti baa, Rimam na te ti ta te atso si fengo Kusung-wu ti awu nda ti.