Read kutep 3 Yohana 1 Bible Online

3 Yohana 1 - kutep bible

3 Yohana 1

¹Kutsingken wune ru uwog-m, unde ndufu, ba uwog-fu urwan-m Gayus ti ame site ure te fu uwae kubenti.

²Unde ti ure-m, ame ku jwam Rimam ti meme iken ā kyang ikyin uwog-fu nyinyang, ama ti afu na site kujimshwur na ijwe pangma ti utob-fu jimshwur.

³Uwae-m saen si-yi ti ti ri be, kiye ti ameinja iki ru ba tsag te m baa, afu na byag timambe uwae ira ti kubenti, pangma ti afu ku nde ko kiye titini, ku som uwae kubenti.

⁴Ti ame ku fxen baa, anyisu-m na ku kyang ikyin uwae kubenti, utob ti tsen iki ta-yi ti skeb ayine be.

⁵Unde ti ure-m, ayi si wande ti kubenti ti afu ku nde kutampwa ameinja-ti, ko ti ariki uwae-ba si ande ti afu nung-fu aba be.

⁶Aba ku teb rinyi-fu uwe ande Rimam baa, ani na site ure timambe. Afu a cwe ira, ndeya ba uwae ikyin ti kyang-ba, yi fengo ti Rimam ku sha.

⁷Ikyaen ti, aba nwunn ruye yi rinyi na Kristi, u cwe u mbe-ba iken iki kujwo ande ti ise be, ko tikiyib.

⁸Ikyaen yine, ayi nyang ti ti ndeya kang utso ande bane, ti ti si ande ti ren risu tetso uwae wande ti kubenti.

⁹Ame bae kutsingken iki na pu m kumbug ande ti Rimam, amaa, Diyoterfe ti ku sha ti wu ú tsi kob ti uwe, cwe-wu ira-ti be.

¹⁰Kiye ti ame a ba, ame u tsag te ni ira titibi ti rifen ti awu ku yer risu-ti. Ayi si-yi nyáng ayine amam be, awu ku kyangte-wu ameinja-ti ti ku ba uwog-wu be, u ku byangkyi ande ti ku sha ti a u kyangte ba, ku jae ba ruye kutampwa ande Rimam.

¹¹Unde ti ure-m, putsa-fu ande ti ku nde wande titibi pangma awune be, amaa, putsa kufxen ande ti ku nde wande ti tinyang. Unde ti a ku nde iken ti tinyang, awu si ana Rimam, unde ti ku nde iken titibi, awu nung ji-wu Rimam khika be.

¹²Ande meme ku ri ira ti tinyang risu Demetiru, kubenti ama ku ri ti tinyang risu-wu.[1] Ati ama ri ira ti tinyang risu-wu. Afu nung pu fu baa, ati na ku ri kubenti.

¹³Ame site iken yang-yi ti m bae na fu, amaa, ame ku sha-m ti m bae yi uwae kutsingken be.

¹⁴Ame ku pwen ti m ba uwog-fu tsi-m tsi be, ama ati u tsag akaen tetso ayib ti ayib.

¹⁵Kujimshwur ā te ni som te atso. Arwan-ti ti ta ike ku kunnji fu ira. Kunnji arwan-ti atang ne ti kinjo ti kinjo nyinyang.