Read kutep Yawuda 1 Bible Online

Yawuda 1 - kutep bible

Yawuda 1

¹Kutsingken wune ru uwog-m Yawuda ti si upyi Yesu Kristi, u si inja Yakubu ama, ru ba uwog-ni ande ti Itse-ti Rimam kunn ni kunn, ani ande ti ure na Rimam, ti Yesu Kristi ku nungkyi ni.

²Ayibrisi, ti kujimshwur, ti ure, ā ko fufa risu-ni ru fife yi uwe.

³Ande ti ure, ame sa uwae tsi ti m na u bae na ni ira risu itinwangru yi ti meme-ti tu, u ba nungye baa, ayi na nyang skeb ti m na bae na kang ni ira iki ti ritsen, ti m ri bom ni utob, u nda ni kwab itikwab ikyaen Iken ti kwen Rimam ti a nda ande Rimam ti kucang akwen.

⁴Ame ku ri ira yine ikyaen ti, ande titibi tam sang ba pu ba uwae-ti. Aba ti si ande ti a bae ira risu-ba ti kucang baa, Rimam na u pwen ba rikwen iticwu. Aba ti ye rinyangwae Rimam cebfur ikyaen ti a u tu riyae u nde iken ti ajib ti tsotso ti unghae, u pyir Yesu Kristi, awu amam ti si Itsekuru-ti, u si unde ti uwe-ti.

⁵Ame ku sha ti m tangsom na ni ira ti ani nung tag pu ni baa, ko ti Itsekuru-ti nwangru Isirela, u pu ba ruye uwae uten ti Ejib, isim-yi, kiye ti ariki uwae-ba ru-ba uwae kinjo uwog-wu be, awu twenji ba.

⁶Aba atom Rimam ti apupwen ti ye su-ba wande-ba ti rurob be, u nwunn ya uwog ti som-ba ta, Rimam cwong ba te iji kiser, u nda ba nae uwog ti kufub tsi ku ji usir ti kuko ti awu u pwen ba rikwen.

⁷Ti mbwe-yi ama, ande ti uten Sodom ti Gomora, ti uten ti ta fer ba, sa rimenn ijwe-ba nde iken ti ajib ti iken ti ku txi iyib. Rimam twen mbub ba te urwa-wu ti tsi kukunn ikyaen ti ande ti tsitsi na kwen iken uwog-ba.

⁸Ayi si ahan ama te ande bane ti ta kutampwa-ni. A sa ijwe-ba tajwae na kurwa-ba ti a ku sunn, u ku sormbeb uwae amae ti nae, u ku saeru kuko ti Rimam ye tsi, u ku txunmbeb atom Rimam ti apupwen ti site riyinn.

⁹Mikayel ti si ukwe rika atom Rimam ti apupwen ri-wu itso ira yine be, kiye ti awu te Shetann ku txwa rukom Musa. Awu txun-wu Shetann asu be, awu ri nyáng baa, “Rimam ā byinn fu kimbab.”

¹⁰Amaa, ande bane ku rimbeb iken ti aba nung-ba risu ti umbyi-yi be. Aba pangma ibye kutur u ku nde iken ti ijwe-ba ku sha amam, u ku kab-ba ira be, ama ayi u twenji ba.

¹¹Ayae-ba! Ikyaen ti, aba putsa kufxen Kayinu, u sa ijwe-ba tajwae na ikentitibi Balam, ti aba na u tu aser. Ikyaen risu ti kpag-ba, aba twenji pangma Kora.

¹²Aba si ajib uwog-ni kiye ti ani ku nde ukwab-ni na ure, ikyaen ti, aba ku ci ku ngwa te ni, ku kyen-ba ikyenricwu be, ku sae nyáng ijwe-ba amam. Aba pangma kubyi ti ku tsa-yi upwen be, ti ufunn ku kae pu ru. Aba pangma ituku ti ku waen-yi awaen uwae kiye-yi be, ti cwu u cwu shishem, ama a sub yi ti ipab-yi tso.

¹³Aba pangma ufunn ti kpakang ti nwunn uwae uyinn, u ku paen yi tso kumum kumum, ama isim-yi, nyáng úfúnn iken ti rukwae-ba amam ti kag tsi. Aba si pangma aswer ti ku tsi-yi skirr be. Uwog ti som-ba si uwog ti byi tititang ti ititsikunn-yi ta-yi be, ti a kyae tsi ba.

¹⁴Enoki ti si ti itsongfaen uwae abitse-ti ti ba isim Adamu, Rimam nda wu ri ira risu ande bane kute baa, “Ni nung! Itsekuru-ti Rimam ru ku ba ti atom-wu ti sisaen, ti ujwunn-ba.

¹⁵Awu ku ba ti wu ba pwen meme ande rikwen, u ye ande ti ku nde ikentitibi ikyaen meme kujwo wande titibi ti aba nde, ti ira titibi ti aba ri risu-wu uwae risu ti bom-ba.”

¹⁶Ande bane si ande ti ku pwen kob unju, ti ku sha nyáng ti a u ye unde te riraen. Aba ku putsa ijaen iken ti ijwe-ba ku sha. Aba si ande ti ku kub unju, ku kag ande ikyaen ti a u tu risu tinyang.

¹⁷Ande ti ure, ni tangsom kang te ira yi ti ani fxen ti kucang uwog atom na Itsekuru-ti Yesu Kristi.

¹⁸Aba ri te ni baa, “Ande ti kutxir u ba kiye ti ricwunnkyi, ti u putsa nyang iken ti rimenn ijwe-ba ku sha, ti ru-yi uwog Rimam ba be.”

¹⁹Ande bane ti ku shir itikanta sang ba kutampwa ande. Utob-ba tsi skeb risu iken ti utense. Kusung Rimam ta-wu utob-ba be.

²⁰Amaa, ani ande ti ure-m, Uwae kinjo-ni ti sisaen ā si imbyi kusog-ni ti ani ku mbye ijwe-ni tsi tsa risu-yi. Ni jwam Rimam yi kuko Kusung ti Saen Kyag.

²¹Ni tsikunn ti ni ye su atso uwae ure na Rimam, ti ani som ku ji usir ti Itsekuru-ti Yesu Kristi u ba tatso ayibrisi-wu, u nda ti unyang ti tsi kukunn, ni som uwae ure na Rimam, ti u ba nda ni unyang ti tsi kukunn.

²²Ni nung risi itaen ti ku kab uwae.

²³Ni nwangru ariki pangma ani na ku shir ba ruye uwae urwa. Ariki ama, ni nung risi-ba uwae ikyenricwu. Ko atupwa-ba ti kwanmbeb ti ikentitibi-ba, ni sae yi pangma iken ti ku txi iyib.

²⁴Ititeb ā si ana Rimam, awu ti site kuko ti wu nda ni ani u kyen-ni kufxen be, awu ti u ndetu ti wu tae ni kaa tsi uwae riyinn-wu, uwog ti ani u tsen utob u shwu ashwu, ama riraen iki u ta-yi uwog-ni be.

²⁵Meme riyinn ā si ana-wu, awu amam ti si Rimam ti nwangru-ti yi fengo wande na Yesu Kristi Itsekuru-ti. Rurob ti riyinn ti Kujwokwe ā si ana-wu, sa ti kucang akwen, ba kwer tine, ru fe yi uwe, ayi ā si ahan.