Read kutep Ititatso 1 Bible Online

Ititatso 1 - kutep bible

Ititatso 1

¹Ira yine si ira ti Yesu Kristi tatso. Rimam ti nda wu ikyaen ti wu na tatso apyi-wu iken ti u tsi-yi tsi be u nde kang. Yesu Kristi tom atom-wu ti apupwen ti wu na sa ira ayi tsag te upyi-wu Yohana.

²Yohana ama tsag tag meme iken ti awu sae te ayib-wu, u ri tan ira na Rimam fa ti ira ti kubenti ti Yesu Kristi ri.

³Itinyang ā si ana unde ti ku pwen ira yine tso ise na ande. Itinyang ā si ana ande ti naa atong ku fxen iskin ti ya yine, u nae risu riben te ira ti a bae uwae kutsingken wune, ikyaen ti, kiye fer ku pu wu.

⁴Ame Yohana ti bae ira yine na ande na Rimam ti ta uwae uten itsongfaen na uten ti Asiya. Rinyangwae ti kujimshwur ā si ana-ni ru ye uwog Rimam, awu ti ta atang tine, u si Rimam ti kute, u si Rimam ti ku ba uwe, ama ru ye uwog Kusung itsongfaen ti ta uwe kutxomkwe-wu,

⁵ti uwog Yesu Kristi, awu ti ku ri tan ira Rimam te ande, awu ti tawe uwe nwunn uwae iticwu, awu ti si ukwe na abikwe utense. Awu ti site ure te ti, u sa anying-wu yaen mbub ikyaen ti wu saen ti ta uwae ikentitibi-ti.

⁶Awu nda ti kafe mbukwen abikwe, u nda ti kafe akwen ti ku nde na itse-wu Rimam wande. Riyinn ti kuko ā si ana-wu ru fe yi uwe. Ayi ā si ahan.

⁷Nung! Awu ru ku ba uwae abyi ti apupwen. Meme ayib u sae wu, kwer ti aba ti ter wu uti. Meme ande ti utense patag u jwub ira, u kub kujwo anyi ikyaen itiba-wu. Een, ayi ā si ahan.

⁸Itsekuru-ti Rimam ri baa, “Ame ti si itikucang u si itiricwunnkyi.” Awu ti ri ira yine si Rimam ti ta atang tine, u si Rimam ti kute, u si Rimam ti ku ba uwe. Awu si Rimam ti site kuko patag.

⁹Ame si Yohana inja-ni, ti te ni ku ngwa rikaen, u tsikunn utob ti ye ikyaen Yesu ti Kujwokwe-wu. A yir m u ye m ka nae ukunn uwae uyinn ti rinyi-wu baa, Patamos ikyaen ira Rimam ti ira Yesu ti ame ku riyae yi te ande.

¹⁰Uwae usir Itsekuru, ame ta uwae Kusung ti Saen Kyag. Ame fxen afxenjwin pangma kutumu ti a kunn.

¹¹Ufxenjwin wu ri baa, “Bae meme iken ti afu sae sī uwae kutsingken, ti fu tom yi ru ka na ande Rimam itsongfaen ayine: Afisa ti Simirna ti Pergamum ti Tiyatira ti Sardis ti Filadefiya ti Lodikeya.”

¹²Ame kafe uwe ti m sae unde wu ti ku ri ira yi te m, ama sae iken itsongfaen ti a kyae yi te zinariya, ti fitila ku tsitsa atang.

¹³Kutampwa iken itsongfaen ti fitila ku tsitsa atang yine, iken iki tsi atang ti ru umbae unde.[1] Awu si arun ti riwae. Kutupwa ti a kyae wu te zinariya yir sang kikog-wu.

¹⁴Ikyinn risu-wu tsen porr porr pangma umung kitub titsen. Ayib-wu ama ku jaen imam wur wur pangma urwa.

¹⁵Afxen-wu ama jaen wur wur pangma kiser ti tibyaen ti a kyae yi ti urwa. Ufxenjwin-wu pangma ritum ambyi ti ku si utae.

¹⁶Uwae kujwo rici-wu awu ye su atitaen itsongfaen. Kisim wen ti cin isim ti uwe, ru ku ye unju-wu. Kutxuwe-wu ku jaen kab kab kab pangma usir ti usirtaen.

¹⁷Kiye ti ame sae wu, ame jwunnsi uwe-wu mbyog, pangma rukom. Awu sa kujwo rici-wu naetsa m, u ri te m baa, “Kyen-fu ikyenricwu be. Ame ti si itikucang, u si itiricwunnkyi,

¹⁸u tsi yiyer. Ame cwucwu kucang, amaa tine, ame tsi user ru fife yi uwe. Iken ti ku mbub ufu Iticwu, ti Kinjag, ta kujwo-m.

¹⁹Ikyaen yine, bae iken ti afu sae ti kucang, ti iken ti afu ku sae tine, ti iken ti u ru ba nde uwe ike.

²⁰Imbyi atitaen itsongfaen ti afu sae kujwo rici-m, ti iken fitila itsongfaen yine ta re. Iken fitila itsongfaen yi si ambub ande Rimam itsongfaen. Atitaen itsongfaen yi ama si ande ti atom itsongfaen ti ta risu-ba.”