Read kutep Ititatso 10 Bible Online

Ititatso 10 - kutep bible

Ititatso 10

¹Tiri ame sae atom iki ti kpag timambe si apupwen ku ba yi riben. Kubyi kukyi wu pangma kutupwa ti yiyáb, usirwowo ta risu-wu. Kutxuwe-wu ku jaen wur wur pangma usir. Afxen-wu pangma kufwá urwa.

²Awu ye su kimbae kupwa ti a bae iken atang, ti mbub ti ta, kujwo-wu. Awu sa kufxen ti kujwo rici-wu tsi risu uyinn, u sa kufxen ti kujwo ife tsi tsa ukunn ise,

³ama taen ira pangma ritum itumu. Ti awu taen ira yine, imam itsongfaen taen.

⁴Isim ti imam itsongfaen yine taen, ame ku pwen ti m bae ira yi ti ame fxen, ama ame fxen afxenjwin si apupwen ba baa, “Ira ti afu fxen uwae imam itsongfaen ti taen ne, ayi ku cwucwe, bae-fu ayi be.”

⁵Awu atom ti ame sae, ti sa kufxen tsi si uwae uyinn u sa kufxen ti ifaen tsi tsa ukunn ise ne, ye ra kujwo rici-wu tso yi apupwen,

⁶u ben uben uwog Rimam ti tsi yiyer, ti mam apupwen ti riben ti uyinn ti iken ti ta uwae-yi meme. Awu ri baa, a na u nde-ba kukyib cwucwo be.

⁷Amaa, kiye ti atom ti itsongfaen a kunn kutumu-wu, ira ti titam na Rimam u mbubta, pangma ti awu tsag te apyi-wu ti ku ya iskin ira-wu kute.

⁸Ufxenjwin ti ame fxen si apupwen ba, ri kyi cwucwo te m baa, “Ru ka mbe umbae kupwa ti mbub tita ti ta kujwo atom ti tsi tsa risu uyinn ti ukunn ise né.”

⁹Ikyaen ayine, ame nwunn ru ka uwog atom wu, u ka jwam wu ti wu na nda m kimbae kupwa wu. Awu ri te m baa, “Mbe ti sa kub meme. Awu u nunn ngag ngag rishwu-fu, amaa, uwae unju-fu, awu u nyang tug tug, pangma ijaen iwog.”

¹⁰Ame mbe kimbae kupwa wu kujwo atom wu, u sa kub tag ara, awu nyang tug tug pangma ijaen iwog unju-m, ama, u nunn ngag ngag uwae rishwu-m.

¹¹Tiri a ri te m baa, “Afu u kafe ru kang kaa ya iskin risu utso ande yang-ba, ti ambukwen ande yang-ba, ti unju ande txi txi txi, ti abikwe.”