Read kutep Ititatso 13 Bible Online

Ititatso 13 - kutep bible

Ititatso 13

¹Isim ayine, ame sae ibye titibi iki tsoye uwae uyinn ba. Awu site ishin rijwe, risu-wu ama si itsongfaen, u site ubur ukwe rijwe risu ishin-wu ayine. Meme risu-wu ayine site rinyi ti ku txun mbeb Rimam.

²Ibye wu ti ame sae, ru icwu, afxen-wu pangma ana mbuku, unju-wu ama pangma ana itumu. Ama tiri usang ti ricwu wu, sa ribom-wu, ti kutxom ukwe-wu, ti kuko na utense, na ibye titibi wune.

³Kinjo uwae risu ibye titibi wune mbub ribang bebebeb, amaa, ribang-wu ben ra, ama ayib fur ande ti utense meme ti ku putsa ibye wu.

⁴Patag ande fen usang wune ikyaen ti, awu sa kuko-wu na ibye titibi wune, ama aba fen ibye wune, u ri baa, “Aye wu ti pangma ibye wune? Aye ti u ta tu rika te wu?”

⁵A nda ibye wu riyae ti wu ri ira kum kpag risu kpag risu ti ku txunmbeb Rimam. A nda wu kuko ti wu na nae ukwe ka ushaen mae ifaen asu ifaen.

⁶Awu mbubta unju-wu, ku txunmbeb Rimam, u ku ri unju titibi risu rinyi Rimam fa ti uwog ti som Rimam apupwen, ti aba ti som atang.

⁷Ama a nda wu riyae ti wu na ta rika te ande Rimam, ti wu na ci ba rika. A nda wu kuko risu ande ti utense meme, ti unju ti tsotso ti meme kumbub ande ti utense pab.

⁸Meme ande ti ta utense u fen wu, aba ande ti a bae-ba rinyi-ba be, ti ti a mam-ba utense khika be, uwae kutsingken na unyang na Mbae Utam ti a yer wuwen.

⁹“Unde ti a site atong, awu ā fxen ira yine,

¹⁰Asiti a u ye unde upyi, awu u ru kang usom upyi. Asiti a u wen unde te kisim rika, a u wen kang unde wu te kisim rika ama.” “Ayine si itikunn uwog ande Rimam ti sisaen, ti a ye kang utob u tsi kunn ti ku ru uwae kinjo ru ka furu.”

¹¹Ama ame nung kyi ibye titibi iki ndub tsoye riben ba. Awu site ishin ifaen pangma umbae iwentam, ku ri ira ti ufxenjwin na usang ti ricwu titibi.

¹²Awu sa kuko ibye titibi ti kucang, u ku nde wande te yi. Awu nda meme ande ti ta utense fen ibye titibi ti kucang wu ti ribang-wu ben ra pu wu.

¹³Awu nde iken ti ku fur ayib, ka ti awu nda urwa si apupwen ba utense uwe ande meme.

¹⁴Uwae iken yi ti ku fur ayib ti a nda wu nde uwe ibye titibi wu ti kucang, awu kyaefa tag ande meme ti ta utense baa, aba na kyae apxin ti ru ibye ti kucang wune ti a ter wu te kisim rika, amaa, awu cwu-wu be.

¹⁵A nda ibye ti ifaen wune riyae ti wu na jwu unyang na sang ruwen apxin wune, ti awu ndetu ti wu ri ira, u wen ande ti ku fen-ba apxin wu be.

¹⁶Cwucwo, awu nda ti meme ande ti rurob ti ande ti rob-ba rob be, ande ti rifunn ti ande ti rikaen, apyi ti ande ti si-ba apyi be, a site iwaen kujwo rici ko kutxuwe-ba.

¹⁷Ayine si ikyaen ti, unde iki ā jaeb-wu iken be, u jaebci-wu be, se ti awu a taen pu wu iwaen yine, ti si rinyi usang ti ricwu wu, numba rinyi-wu.

¹⁸Ayine ku sha ben-ayib. Unde ti a site itinungye, awu ā pwen numba ibye wune, ti si numba unde. Numba wu si ukob itsongnjo ti mae ita asu itsongnjo (666).