Read kutep Ititatso 17 Bible Online

Ititatso 17 - kutep bible

Ititatso 17

¹Isim ayine, atom kinjo uwae atom itsongfaen ti ye su kuseb itsongfaen yine, ru ba, u ri te m baa, “Ba ti m tatso fu ititwenji iyaen tiyang wu ti somtsa risu ambyi yang-yi né.

²Unda wune, abikwe ti utense nde iyaen te wu, ande ti utense meme ngwa ku shishaen uwae amae ti nae te unda wu.”

³Ama uwae Kusung, a ye ra m ru yi kutur khika. Ama ame ka nung unda iki somtsa risu ibye tibyaen iki ti patag ijwe-wu kum asu ti a ku txumbeb Rimam. Ibye wu site risu itsongfaen, ishin-wu ama si rijwe.

⁴Unda wu cwun atupwa tibyaen ti tibyir, u kyae ijwe-wu te iken atong zinariya, ti asuwa ti atxom ti titsen ti tsotso, ti ku jaen wur wur, u ye su kitu zinariya ti munn ti iken ti isor na amae ti nae-wu ayi.

⁵A bae rinyi iki kutxuwe-wu, ti unde iki nung-wu imbyi-yi be. Rinyi wu si: BABILA, UKA TI KUKO, IYA NA IYAEN MEME TI ANA IKEN TI KU TXI IYIB NA UTENSE.

⁶Ame nung unda wu ngwa ku shishaen te anying ande Rimam, ti anying ande ti a wen ba ikyaen ira Yesu. Kiye ti ame sae wu, tiyinn si m ijwe wabibi.

⁷Atom wu rang m baa, “Imi ti nde tiyinn si fu ijwe? Ame u tsag te fu imbyi rinyi unda wune, ti ana ibye wu ti awu somtsa risu-wu, ti site risu itsongfaen ti ishin rijwe.

⁸Ibye wu ti afu sae ne, ku nyang unyang kute, u ku nyang-wu unyang tine be, amaa, ayi u tsi-yi tsi be awu u nwunn kukwae ti itikuntsi-wu ta-yi be ba, u kaa twenji. Ama meme ande ti a bae-ba rinyi-ba uwae kutsingken na unyang, kiye ti a bag ku mam utense, tiyinn u si ba ijwe, kiye ti aba sae ibye wune ti ku unyang unyang kute, ama ku nyang-wu unyang tine be, ama ti u ba kyi cwucwo.

⁹“Ayine ku sha ben-ayib. Imbyi ira yi ta re: Risu itsongfaen yine, si rikwen itsongfaen, uwog ti unda wu ku som atang.

¹⁰Ayi ku tatso kujwokwe itsongfaen. Kujwokwe itsong uwae-yi mbub si pu yi, kinjo tsi ti atang, kinjo iki ama ba tsi-wu khika be. Kiye ti awu á ba, awu u tsi-wu tsi be u mbub si.

¹¹Ana ibye tibyaen wune, ti ku nyang unyang kute, ku nyang-wu tine be, awu ti si ukwe ti itsongta, amaa, awu si sí kinjo uwae itsongfaen yi. Awu ama ku ru ti wu kaa twenji.

¹²“Ishin rijwe ti afu sae né, si abikwe rijwe ti tso-ba kutxom ukwe-ba khika be. Amaa, a nda ba kuko ti aba te ibye ti ricwu wune ā nae ukwe kiye kpang.

¹³Meme-ba site ira ti kab kinjo, u sa ribom-ba ti kuko-ba na ibye ti ricwu wune.

¹⁴Aba u ta rika te Mbae Utam, ama Mbae Utam wu u ci ba rika, ikyaen ti, awu ti si Itsekuru na meme itsekuru, u si Ukwe ana abikwe. Aba ti ta te wu, a kunn ba kunn, u tsab ba tsab, aba ti tsi ti kubenti.”

¹⁵Ama atom wu ri te m baa, “Ambyi tiyang yi ti afu sae iyaen wu somtsa atang né, si kucwug ande meme uwae utense, ti ambukwen ande ti tsotso, ti unju ande txi txi txi.

¹⁶Ishin rijwe ti afu sae, ti ibye titibi wune, aba u sa iyaen wu kukà. Aba u nde wu iyìb, u waen wu ribam. Aba u kub ibye rimenn-wu, u twenmbub wu te urwa.

¹⁷Rimam sa yi si ba utob ti a na nde iken ti awu ku sha, u ren risu-ba, u sa kuko-ba ana ukwe na ibye titibi wune, se kiye ti ira Rimam a kumunn pu yi.

¹⁸“Unda wu ti afu sae, si uka tiyang ti ta risu akwe ti utense.”