Read kutep Ititatso 19 Bible Online

Ititatso 19 - kutep bible

Ititatso 19

¹Isim ayine, ame fxen ritum iki ti pangma ana ujwunn ande ti funn apupwen ku ri baa, “Haleluya[4]! Itinwangru ru uwog Rimam-ti ba. Kuko ti riyinn si ana-wu.

²Rikwen-wu si rikwen ti kubenti u pang atang. Awu ye pu wu iyaen wune ti ye utense ndembeb u pwen wu rikwen. Awu ye pu wu upae anying apyi-wu ti unda wune tur yaenmbub.”

³Aba taen kyi ira cwucwo baa, “Haleluya! Akyang urwa ti ku twen ku tso tsig tsig tsig tine, ititsikunn-yi ta-yi be.”

⁴Aba ande ndufu rijwe asu inje bane, ti iken inje ti ku nyang unyang, jwunn ikyig uwe Rimam ti somtsa kutxomkwe-wu, u teb wu ku ri baa, “Ayi ā si ahan! Ti teb rinyi Rimam!”

⁵Tiri afxenjwin ruye kutxomkwe atang ku ri baa, “Ni teb rinyi Rimam, meme-ni apyi-wu, anyisu tinying ti ande ndufu, meme-ni ti ku nda wu rurob.”

⁶Ama, ame fxen afxenjwin ujwunn ande ti funn apupwen ti ku tum pangma ritum ambyi ti ku si utae, ti ana imam ti ku taen, ku ri baa, “Haleluya! Ikyaen ti, Itsekuru-ti Rimam, ti skeb titag, si Ukwe.

⁷Ti tsen utob, ti ti kam ashwu! Ti nda wu kuko, ikyaen ti, kiye ukwab unda ishe Mbae Utam, nde pu yi. Unda ishe wu ama kyae tag pu wu ijwe-wu.

⁸Rimam cwe na wu ti wu na kyae ijwe-wu ti atupwa tishe titsen porr porr.” Atupwa yi si wande ti tinyang na ande na Rimam.

⁹Isim ayine atom wu ri te m baa, “Bae ira yine. Itinyang ā si ana ande ti a yae ba ru ba uwog ukwab unda ishe na Mbae Utam wune.” Awu shem kyi cwucwo baa, “Ira yine si ira ti kubenti na Rimam.”

¹⁰Ame jwunn ikyig uwe-wu, ti m na fen wu, amaa, awu ri te m baa, “Ya ta! Fen-fu ame be, ame ama si sí upyi pangma afu, u si kinjo uwae ameinja-fu meme ti ku putsa ira ti kubenti ti Yesu ri. Fen Rimam.” Ikyaen ti, ira Yesu ku nda ande ya iskin ira Rimam ti kpakang.

¹¹Isim ayine ame sae apupwen mbubta, ama kakum ti tsen tsi! Rinyi unde wu ti ku tso wu tso si KUBENTI. Awu ku pwen rikwen, ku ta rika uwae kubenti.

¹²Ayib-wu ama ku jaen imam wur wur pangma urwa, ama awu bur ubur ukwe munnae risu-wu, u site rinyi iki rimenn-wu ti unde iki nung-wu imbyi rinyi wu be, nyáng awu amam.

¹³Arun ti awu si jwae tag te anying. Rinyi ti a ku kunn wu si “IRA RIMAM.”

¹⁴Meme akyirten ti apupwen putsa wu, u tso kakum ti tsen, u yir tag ijwe-ba te atupwa ti ti tsen ti saen por por.

¹⁵Kisim wen ti cin isim ti uwe, ru ku ye unju-wu, ti wu u byinn ta ambukwen ande. Awu u nae ukwe risu-ba te ukum ukwe na kiser. Pangma ti a ku ceb, ku kam awaen anam uwae kukúm-ricwo, awu ama u ceb kukúm na rinae na Rimam ti skeb titag.

¹⁶Rimenn arun-wu ti kusa-wu, a bae rinyi atang baa, “Ukwe na akwe, Itsekuru na itsekuru.”

¹⁷Isim ayine ame nung atom iki tsi uwae usir. Awu taen ira ti ribom, u ri te meme inung ti ku pinn apupwen baa, “Ni ru ba funn ikyaen ukwab tiyang na Rimam.

¹⁸Ni ru ba kub ibye rimenn akwe, ti ana ande ti uwe akyirten, ti ibye rimenn akyirten-ba, ti ana kakum, ti ana ande ti ku tso yi tso, fa ti ibye ande meme, apyi ti ande ti si-ba apyi be, ande ti rurob ti ande ti rob-ba rob be.”

¹⁹Ama ame nung ibye ti ricwu wu, ti abikwe ti utense, fa ti akyirten-ba, pu funn atso ti a u ta rika te unde wu ti somtsa kakum wune, ti akyirten-wu.

²⁰Aba ye ibye titibi-wu fa ti unde wu ti ku ya iskin ira ti tikong, awu ti nde iken ti ku fur ayib uwe ibye titibi, u kyaefa ande ba ti yer iwaen ibye wu, ti ande ti fen apxin yi ti awu kyae. Awu ibye wu ti unde wu ti ku ya iskin ira ti tikong, a ye ba ti user jwunnsi uwae uvum urwa ti ku ten ku jim-yi jim be.

²¹A yerwen tag akyirten-wu ti tsitsi te kisim ti cin isim ti uwe, ti ruye unju unde wu ti tso kakum wu. Meme inung ba kyebkyi rukom akyirten bane, u kub kyaen ibye rimenn-ba.