Read kutep Ititatso 2 Bible Online

Ititatso 2 - kutep bible

Ititatso 2

¹“Bae ka na atom Rimam ti ta risu kumbug ande Rimam ti ta uten Afisa baa, “Ayine si ira na awu ti ye su atitaen itsongfaen kujwo rici-wu. Awu ti ku kyang kutampwa akyikya fitila itsongfaen ti a kyae yi ti zinariya.

²Ame nung pu m itikwab-fu uwae wande, te ti afu tsikunn utob ti ye, te ti afu ku cwe-fu ira ande titibi be, ama u myae nung pu fu aba ti ku kunn ijwe-ba baa, aba na si atom, u nungye pu fu baa, aba na si ande ti tikong.

³Ame nung afu tsikunn utob ti ye, ku ngwa rikaen ikyaen ira-m, u num-fu be.

⁴Amaa, ame site ira wune risu-fu, afu ya ure-fu ti afu ye te m ti kucang ta pu fu.

⁵Ikyaen yine, tangsom uwog ti afu jwunnsisi atang. Ya ikentitibi-fu ta, ti nde iken ti afu nde kucang. Ayi a si-yi ahan be, ame u ba ye ra fitila-fu ru ye uwog ti wu tsi atang, ru.

⁶Amaa, afu site iken ti tinyang wune, afu pyir kujwo wande Nikolaita ti ame ti risu-m pyir.”

⁷Unde ti a site atong, awu ā fxen ira ti Kusung ti Saen Kyag ku ri te ande Rimam. “Unde ti a ci rika, ame u cwe ti wu na ci awaen kutuku na unyang ti tsikukunn uwae risaen na Rimam apupwen.”

⁸Bae ka na atom Rimam ti ta risu kumbug ande Rimam ti ta uten Simirna baa, “Ayine si ira ti ruye unju awu ti si itikucang, u si itiricwunnkyi, awu ti cwu, u kafe ba ti unyang.

⁹Ame nung pu m rikaen ti afu ku ngwa, te ti afu si unde ti rijang. Amaa, kubenti, afu si unde ti rifunn. Ame nung ira ande ti ku txun mbeb Rimam, ama ku kunn ijwe-ba baa, ande Rimam[2], ira titibi ti aba ku ri risu-fu, ame fxen tag pu m ayi. Ama aba si-ba ande Rimam ti kubenti be. Aba si kusog Shetann.

¹⁰Kyen-fu ikyenricwu rikaen ti u tu fu uwe ike be. Kubenti, Shetann ku kwab ti wu pu ariki uwae-ni kaa cwunnkyi pursuna, ikyaen ti a u myae ni myae. Ani u ngwa rikaen ka usir rijwe. Uwae kubenti-ni, ni cwe iticwu, ame ama u nda ni kubur unyang ti tsikukunn.”

¹¹“Unde ti site atong, awu ā fxen ira ti Kusung ti Saen Kyag ku ri te ande Rimam. Unde ti a ci rika, iticwu ti apu-ifaen u tu-yi awu be.”

¹²Bae ka na atom Rimam ti ta risu kumbug ande Rimam ti ta uten Pergamum baa, “Ira yine ruye unju awu ti site kisum wen ti cin isim ti uwe.

¹³Ame nung uwog ti som-fu, ti si uwog ti a ta kutxomkwe Shetann atang. Amaa, afu baefa m ting ting, u pyir-fu ti fu ru uwae kinjo uwog-m be ko uwae kiye ti a wen Antipas ti tsi ti kubenti uwae ira ti ana-m.

¹⁴Amaa, ame site ira iki kpang risu-fu. Ariki uwae-ni putsa iken ti kwen na Balam, unde ti kwen na Balag ti wu na sa kupong cekyi anyisu Isirela, ti aba na ci wuci apxin u nae amae ku kyang.

¹⁵Cwucwo, afu site ariki uwae-ni ti putsa iken ti kwen na Nikolaita.

¹⁶Ikyaen yine, ya ikentitibi-fu ta, be, ame u tsi-m tsi be u ba uwog-fu, u pu rika tu ba, u twenji ba te kisum wen ti ta unju-m.”

¹⁷“Unde ti a site atong, awu ā fxen ira ti Kusung ti Saen Kyag ku ri te ande Rimam! Unde ti a ci rika, ame u nda wu wuci ti ti tam, fa ti kutxom ti tsen ti a bae rinyi tishe atang, ti unde iki nung-wu rinyi wu be, nyáng unde ti mbe kutxom wu amam.”

¹⁸Bae ru ka na atom Rimam ti ta risu kumbug ande Rimam ti ta Tiyatira baa, “Ira yine ruye unju Umbae Rimam ti site ayib ti si pangma ujaen urwa, ti afxen-wu ama si pangma ikyab kiser tibyaen ti kong ren.

¹⁹Ame nung pu m itikwab-fu, ti ure ti afu site, u nung pu m uwae kinjo-fu, ti itindeya ti afu ku nde na ariki, ti utob ti ye-fu uwae rikaen. Ame nung itikwab-fu ti tine skeb pu yi itikucang.

²⁰Amaa, ame site ira wune risu-fu. Afu cwe ira unda wune, Jezebel ti ku kunn ijwe-wu baa, unda ti ku ya iskin ira Rimam, ama ku kwen itikwen ku kyaefa apyi-m ti aba na nae amae, u ci wuci ti a fen apxin te yi.

²¹Ame nda wu riyae ti wu na ya ikentitibi-wu ta, amaa, awu shaen-wu ti wu ya iyag ti nae ta.

²²Ikyaen yine, ame u nda wu, awu u jwunn kicaeb bebebeb. Ame u nda itaen ti ku nae te wu kafe iken ti ayae, se iken ti aba a kafe isim ta pu ba kujwo wande titibi-wu ayi.

²³Cwucwo ame u twenji ande ti ku putsa wu. Meme kumbug ande Rimam u nung baa, ame na si Awu ti ku fxaen ira ti ta utob ande nae ise. Ame u pae na unde titini pang ti kujwo wande-wu.”

²⁴“Amaa, ani ande ti tsitsi uten Tiyatira, ti putsa-ni iken ti kwen titibi ayine be, u kwen-ni iken ti ariki ku kunn baa, ‘Iken ti rurong na Shetann’ be, ame ku ri te ni, ame u ye isu ti rurob iki su-m ani be.

²⁵Ni ye su iken ti ta kujwo-ni ting ting, se usir ti ame á kafe ba.

²⁶Unde ti a ci rika, u ye su kujwo wande-m ka kwer ricwunnkyi, ame u nda wu nae ukwe risu ambukwen ande.

²⁷Awu u nae ukwe risu-ba te ukum ukwe na kiser. Aba u ta kujwo-wu, awu u byinmbub ba pangma atutong kwèn ti a byinmbub skiskiskir, ti si sí itso kujwokwe ti itse-m nda m.

²⁸Ame u nda wu kititaen ti utencwe.”

²⁹“Unde ti a site atong, awu ā fxen ira ti Kusung ti Saen Kyag ku ri te ande Rimam.”