Read kutep Ititatso 20 Bible Online

Ititatso 20 - kutep bible

Ititatso 20

¹Isim ayine, ame nung atom iki si apupwen ba, u ye su iken ufu na kukwae ti itikunntsi-wu ta-yi be, u ye su uji kiser.

²Awu atom wune faén ra usang ti ricwu wu, awu ikentibi ti kute, awu ukwe kukyaefa, Shetann, u cwong wu nae, ka asang kumbub kinjo.

³Awu atom wu ye wu jwunnsi uwae kukwae wune ti itikunntsi-wu ta-wu be, u fxebkyi usang wu fa uwae atang ikyaen ti awu ā tu-wu riyae ti wu kyaefa ande cwucwo be, se isim asang kumbub kinjo. Isim-yi ama, a u saen wu ta kang uwae kiye kpang.

⁴Isim ayine, ame nung atxomkwe, ama itaen ti somtsa atang si aba ti a nda ba kuko ti a na pwen ande rikwen. Cwucwo ame nung unyang ande ti a pyera risu-ba ikyaen ti aba cwé iticwé ira ti kubenti na Yesu, ti ira na Rimam. Aba ti fen-ba ibye titibi wune, ko ti a u ku riben na iken ti awu mbye tsi be, u yer-ba iwaen na ibye titibi wune kutxuwe-ba ti ajwo-ba be. Aba shwur, u ti Yesu Kristi nae ukwe tetso ka asang kumbub kinjo.

⁵Itikicwu ti tsitsi nwunn-ba be, se isim asang kumbub kinjo. Ayine ti si itikunnwunn uwae iticwu ti tawe.

⁶Utob ti tsen ti itisaen kyag si ana ande ti fa uwae ti ti nwunn ti tawe yine. Iticwu ti apu-ifaen si-wu te kuko risu-ba be, amaa, aba u si akwen na Rimam ti ana Kristi. Aba te wu u nae ukwe uwae kuru Rimam ka asang kumbub kinjo.

⁷Ama isim ti asang kumbub kinjo yine a yafe pu yi, a u saen Shetann ta uwae pursuna.

⁸Awu u ruye kaa kyaefa ambukwen ande ti ta ikub inje ana utense, aba ti si Gog ti Magog. Awu u kunnbyir ba ikyaen rika ti ta. Ujwunn-ba pangma isa ti tsen ti ta unju uyinn.

⁹Aba pu atso tso yi utab ti yaen na utense, u ka tsi pakob ufug rikae ande Rimam ti sisaen, ti si uten ti nyang uwae Rimam. Amaa urwa si apupwen ba twenji ba burrr.

¹⁰Ama awu fáen-ra Shetann wu ti kyaefa ba, u ye wu jwunnsi uvum urwa ti ku ten ku jim-wu jim be, uwog ti ibye titibi wune, ti unde ti ku ya iskin ira ti tikong ta atang. Aba u ngwa rikaen atang usirtaen ti utitang, ititsikunn-yi ta-yi be.

¹¹Isim ayine, ame nung kutxomkwe tiyang ti ti tsen iki ti unde iki somtsa atang. Ikyaen riyinn-wu ti kuko-wu, apupwen ti riben ter nwunn uwe-wu, u ru fe uwog ti a nung-ba ayib-ba cwucwo be.

¹²Ama ame nung itikicwu, ande ti rurob ti ande ti rob-ba rob be, tsi uwe kutxomkwe wu. Atsingken ti mbub ti ta cwu atang yang-yi. Ama a mbubta kyi kutsingken iki cwucwo, ti si kutsingken na unyang. Ama a pwen itikicwu rikwen pang ti iken ti a bae uwae atsingken yi, pang ti kujwo wande ti aba nde.

¹³Ande ti ngwa cwu uwae uyinn, uyinn cwo pu ba tso. Iticwu ti Kinjag cwo pu itikicwu ti ta riben ama tso. A pwen ba rikwen meme pang ti iken-ba ti aba nde.

¹⁴Isim ayine a ye Iticwu ti Kinjag jwunnsi uwae uvum urwa. (Ayine si iticwu ti apu-ifaen.)

¹⁵Unde ti rinyi-wu ta-yi uwae kutsingken na unyang ne be, a ye wu jwunnsi uwae uvum urwa wune.