Read kutep Ititatso 3 Bible Online

Ititatso 3 - kutep bible

Ititatso 3

¹“Bae ka na atom Rimam ti ta risu kumbug ande Rimam ti ta Sardis baa, “Ira yine ruye unju Awu ti site Asung Rimam itsongfaen, ti atitaen itsongfaen. Ame nung itikwab-fu. Ame nung ti rinyi-fu kob uten baa, afu na site unyang, amaa, afu si-fu rukom ti tsi.

²Shwu tiri, ti fu kyaenyang iken ti tsitsi kujwo-fu ti ta unju iticwu, ikyaen ti, ame nung baa, kujwo wande-fu na ben-yi uwe Rimam-me be.

³Tine, tangsom te ira ti afu fxen u paembe yi ti kucang. Ye su yi, ti kafe isim ta ikentitibi-fu. Asiti afu a shwu-fu be, ame u ba purug fu pangma unde ti riyib, afu u nung-fu usir ti ame u ba be.

⁴Ko ti ayi si ahan, ariki ta uwae uten Sardis kpang, ti pu atupwa-ba kwan mbeb-ba uwae ajib be. Aba u si kutupwa ti tsen u putsa m, ikyaen ti aba pang pu ba ti a u nde ahan.

⁵Unde ti a ci rika, a u sī na wu atupwa ti tsen, ama ame u fen mbeb-m rinyi-wu uwae kutsingken unyang be. Ame u ri unju ti tinyang risu-wu uwe Itse-m ti atom-wu ti apupwen.”

⁶“Unde ti a site atong, awu ā fxen ira ti Kusung ti Saen Kyag ku ri te ande Rimam.”

⁷Bae ka na atom Rimam ti ta risu kumbug ande Rimam ti ta Filadefiya baa, “Ayine si ira ti ruye unju Awu ti Sisaen, Awu ti kubenti, ti ye su iken ti ku mbub ufu na Ukwe Dawuda kujwo-wu. Asiti awu a mbub ufu, unde iki ta-wu ti u cwunnkyi wu be, awu a cwunnkyi, unde iki ta-wu ti u mbub be.

⁸Ame nung itikwab-fu. Nung, ame mbub ufu tsi pu m afu, ti unde iki ta-wu ti u cwunnkyi wu be. Ame nung, afu site-fu ribom be, amaa, afu ye su ira-m, u pyir-fu ame be.

⁹Naa atong! Ande ba ti ta kusog Shetann, ti ku kunn ijwe-ba baa, aba na si ande Rimam, amaa, a si-ba ande Rimam be, ku wer rifen, nung, ame u nda ba, aba u ba ku riben uwe-ni, ama u nung baa, ame na ye ure te ni.

¹⁰Afu putsa pu fu ira ti ame ri te fu baa afu na ye utob uwae rikaen. Ikyaen yine, ame u nungkyi fu kiye kumyae ti ku ba risu utense meme.

¹¹Ame u tsi-m tsi be u ba. Ye su iken ti afu site nyinyang, ti unde iki ā fxaen mbe ra-wu ubur ukwe-fu be.

¹²Unde ti a ci rika, ame u sa wu sim pangma kufwá uwae kusog Rimam-me. Awu u ruye-wu ye atang be. Ame u bae rinyi Rimam-me rimenn-wu, ti rinyi uka na Rimam-me, ti si Urushelima tishe, ti u sī apupwen uwog Rimam-me ba. Ame u bae rinyi-m ti tishe rimenn-wu ama.”

¹³“Unde ti a site atong, awu ā fxen ira ti Kusung ti Saen Kyag ku ri te ande Rimam.”

¹⁴Bae ka na atom Rimam ti ta risu kumbug ande Rimam ti ta Lodikeya baa, “Ayine si ira ti ruye unju Awu ti rinyi-wu si ‘Aminn,’ awu ti si kubenti, ti ku ri tan ira ti kubenti, u si utitawe na meme iken ti Rimam mam.

¹⁵Ame nung itikwab-fu, afu byag-fu byag be, u jim-fu jim be. Á baa, afu na jijim ko afu na byibyag amam, ayi ú nyang.

¹⁶Amaa, ikyaen ti afu bwé bwé, afu byag-fu byag be, u jim-fu jim be, ame u tub ra fu ruye unju-m.”

¹⁷“Afu ku ri baa, ‘Ame site rifunn, u shanum-m iken kujwo be.’ Amaa, afu nung-fu ti afu si iken ti ayae, u jang pangma utúr unju mbapxu, u mbub ayib, u tsi ribam be.”

¹⁸“Tine, kumyae-m si ti, afu na jaeb ayib zinariya uwog-m, zinariya ti a fufug te urwa, ikyaen ti fu kafe unde ti rifunn. Jab atupwa ti tsen ti fu pu cwunnkyi ribam-fu, ikyaen ti ande ā sae-ba rukwae-fu be. Jab acin ti fu kam si ayib-fu, ikyaen ti fu sae uwog paenine.

¹⁹Ande ti ame ye ure te ba, si aba ti ame ku fwan ba kibyag, ku byinn ba kimbab. Ikyaen yine, sa uwae-fu tsi ira-m ne, ti fu kafe isim ta ikentitibi-fu.

²⁰Nung, ame tsi ufu kusog ku kwer kujwo. Unde ti a fxen ufxenjwin-m, u mbub ufu ta, ame u sang ba tu wu, u te wu ci tetso, awu ama u ci te m.

²¹Unde ti a ci rika, ame u cwe na wu ti wu som te m kutxomkwe-m, pangma ti ame ci rika u som te Itse-m kutxomkwe-wu.”

²²“Unde ti a site atong, awu ā fxen ira ti Kusung ti Saen Kyag ku ri te ande Rimam.”