Read kutep Ititatso 4 Bible Online

Ititatso 4 - kutep bible

Ititatso 4

¹Isim ayine, ame sae, ama ti m nunung, ufu iki mbub tita apupwen! Ame fxen afxenjwin pangma ti ame fxen ti kucang ma kutumu. Awu ri te m baa, “Tso ba ike, ti m tatso fu iken ti u ba nde kang uwe ike.”

²Ti ritsen, ame ta uwae Kusung, ama sae kutxomkwe tā apupwen, unde iki som tsa atang.

³Ijwe-wu ku jaen wur wur pangma atxom jasipa ti karneliyann. Usirwowo ti pangma kutxom emeral, wae pakob uwog ti som-wu.

⁴Ame sae atxomkwe iki ka rikom asu inje, tā pakob kutxomkwe wune. Ande ndufu rikom asu inje, si atupwa ti tsen, u bur ubur ukwe ti a kyae yi te zinariya, u somtsa risu atxom ukwe yine.

⁵Imam ku jaen wur wur, ku taen, ritum ku tum uwog kutxomkwe atang. Amunn urwa ka itsongfaen ku cwé piin uwe kutxomkwe wu, ti si Asung Rimam itsongfaen.

⁶Uwe kutxomkwe wu, iken iki ta atang ti ku jaen wur wur pangma ambyi uyinn, u saen pangma iken ti ku sae uwe. Iken inje ti site unyang som pakob kutxomkwe wu, ayib-yi ku shag shag shag shag, uwe ti isim meme.

⁷Iken ti site unyang ti tawe ru itumu, iti ifaen ru indag, iti ita kyae uwe-wu pangma ana unde, iti inje ama ru ikwèn ti ku pinn apupwen.

⁸Iken inje yi ti ku nyang unyang, site asae itsongnjo itsongnjo, u site ayib ti ku shag shag shag shag yine. Usirtaen ti utitang, ayi tsi kunn akyang ti yang baa, “Saenkyag! Saenkyag! Saenkyag! Itsekuru-ti Rimam saen kikyag! Awu ti site kuko patag, ti ta atang tine, u si ti kute, u si ti ku ba uwe!”

⁹Iken ti site unyang yine ku teb Awu ti somtsa kutxomkwe, ti tsi yiyer wune, u ku nda wu kuko ti riyinn ti fxaefa. Ko kiye titini ti aba a ku nde ahan,

¹⁰ande ndufu rikom asu inje bane ku jwunn ikyig uwe Awu ti somtsa kutxomkwe, ti tsi yiyer ru fife yi uwe, u ku fen wu. Aba ku mbub ubur-ba cwu riben uwe kutxomkwe atang, u ku teb wu baa,

¹¹“Rimam Itsekuru-ti, afu pang pu fu ti fu paembe riyinn ti kuko, ti a u nung fu te rurob. Afu ti mam iken meme, ayi si utob-fu nee afu mam yi, ama ayi tsi.”