Read kutep Ititatso 5 Bible Online

Ititatso 5 - kutep bible

Ititatso 5

¹Ama ame sae, kujwo rici Awu ti somtsa kutxomkwe wune, kupwa ti a bae iken uwae ti ise meme u fur ra wu, u fxebkyi wu atsepu itsongfaen.

²Ama ame sae atom iki ti kpakang, ku ya iski te ufxenjwin ti ribom baa, “Aye wu ti ko ti wu mbubta kupwa wu ti a fxifxeb ne?”

³Amaa, a tu-ba unde iki apupwen, ko utense, ko uwae kinjag, ti ko ti wu mbubta kupwa wu, ko ti wu sae iken ti a bae uwae atang be.

⁴Ame pù nae ukunn ricwu, ikyaen ti, unde iki ta-wu ti wu mbubta kupwa wu, u sae iken ti ta uwae atang be.

⁵Tiri, kinjo uwae ande ndufu bane je m baa, “Jwub-fu ira be. Sae! Itumu ti ta kumyaem na Yawuda, u si ipab Ukwe Dawuda, ci pu wu rika. Awu u ndetu ti wu mbubta kupwa wu ti a fxebkyi wu atsepu itsongfaen ne.”

⁶Ama ame sae Umbae utam iki tsi kutampwa kutxomkwe wu te iken ti ku nyang unyang inje ti ta kutampwa ande ndufu bane. Umbae utam wune si pangma a na yerwen pu ba wu, ama site ishin itsongfaen ti ayib itsongfaen. Iken itsongfaen itsongfaen yine ku tatso Asung ti saen kyag na Rimam itsongfaen ti a tom shag kyife utense meme.

⁷Umbae utam wune nwunn ka mbe kupwa wu kujwo rici Awu ti somtsa kutxomkwe wu.

⁸Ti awu mbe kupwa wune, ayi iken inje ti ku nyang unyang, ti ande ndufu rikom asu inje bane, jwunn ikyig uwe Umbae utam wu. Unde titini uwae-ba site kufwà ti kiticwae zinariya ti munn te iken ti ku nung kuyang, ti si itijwam ande Rimam.

⁹Ama aba yang kukyang tishe baa, “Afu ko pu fu ti fu mbe kupwa wune, u mbubta wu, ikyaen ti, a wen fu. Ti anying-fu, afu jaeb mbe utso ande, ti unju ande, ti ambukwen ande txi txi txi.

¹⁰Afu sa ba kafe mbukwen abikwe, u si akwen Rimam ti ku nde wande na Rimam-ti, Aba u nae ukwe risu utense.”

¹¹Cwucwo ame sae, u fxen afxenjwin atom Rimam ti apupwen, munnae shin, itipwen-yi ta-yi be. Aba jwunn pangma isa riben, u tsi pakob kutxomkwe wu, ti iken inje ti ku nyang unyang, ti ande ndufu bane.

¹²Aba meme-ba ku yang akyang ti ribom-ba baa, “Umbae utam wu ti a yerwuwen ko pu wu ti wu paembe kuko, ti rifunn, ti ben-ayib, ti kpakang. Kuko ti riyinn ti itiwaefa ā si ana-wu!”

¹³Ama ame fxen meme iken ti ku nyang unyang ti ta apupwen ti riben, ti uwae kinjag, ti uyinn, ti meme iken ti ta uwae atang, ku ri baa, “Itinyang, ti kuko, ti rurob, ti riyinn, ti kpakang, ā si ana Awu ti somtsa kutxomkwe ru fife yi uwe.”

¹⁴Ama iken inje ti ku nyang unyang yine, cwé baa, “Ayi ā si ahan.” Ande ndufu bane jwunn ikyig u fen Umbae utam wu.