Read kutep Ititatso 6 Bible Online

Ititatso 6 - kutep bible

Ititatso 6

¹Cwucwo ame sae Mbae utam wu mbubta kupwa kinjo uwae ayi ti a fxeb, u kum sitami atang itsongfaen yine, ama ame fxen kinjo uwae iken inje ti ku nyang unyang yine, taen ira pangma imam ti ku taen, baa, “Ba!”

²Ama ame sae, ti m nunung, kakum ti tsen tsi! Unde ti tso wu ye su ukokuta, ama a sa kubur ukwe na wu. Ama awu ruye ku mbúb rika ku ru, ti wu ci rika.

³Ti Umbae utam wu mbubta kupwa ti fxifxeb, u kum sitami atang ti ifaen, ame fxen itifaen uwae iken inje ti ku nyang unyang yine ri baa, “Ba!”

⁴Ama kakum iki ba tsi, u byaen nwameme. A nda unde ti ku tso wu kuko ti wu na kpag ra kujimshwur ruye uwae utense, ti ande ā wen atso. A nda wu kisum wen tiyang.

⁵Ti awu mbubta kupwa ti a fxeb ti fa ti ita, ame fxen iti ita uwae iken inje ti ku nyang unyang yine ri baa, “Ba!” Ama ame sae, ti m nunung, kakum tibyir tsi! Unde ti ku tso wu ye su kitu kumyae kujwo-wu.

⁶Ame fxen kyi ujwin iki ti ruye kutampwa iken inje ti ku nyang unyang, ri baa, “Aser kitu kumyae kinjo na umung awum ā si dinari kinjo[3]. Aser kitu kumyae na umung bali ita ama ā si dinari kinjo. Amaa, kyi-fu kujwo yi aser kindob ti ambyi anam be.”

⁷Ama ti Mbae utam wu mbubta kupwa ti a fxeb ti fa ti inje, ame fxen ujwin iti inje na iken inje ti ku nyang unyang, ri baa, “Ba!”

⁸Ama ame sae, ti m nunung, kakum ti pafoong tsi! Rinyi unde ti ku tso wu baa, Iticwu, kinjag ku putsa wu isim. A nda ba kuko ti a na twenji ande kujwo ikyab kinjo uwae inje ana utense te rika, ti rimenn, ti iticwu kufùm, ti ibye anyi ti ta utense, ti a na ya ajwo kyab ita na ta ti user.

⁹Ama ti Mbae utam wu mbubta kupwa ti a fxeb ti fa ti itsong, ame sae kuta itifen Rimam tsi, ama imbyi-yi, ame nung unyang ande ti a wen ba ikyaen ira Rimam, ti ira risu Rimam ti a ri.

¹⁰Aba jwub ira te afxenjwin ti ribom baa, “Itsekuru ti skeb titag, ti si itisaen kyag, u si kubenti, isinn ti afu u ba pwen rikwen, u ye ripab anying-ti kujwo ande ti utense, ti tur yaenmbub?”

¹¹Isim ayine, a nda ko unde titini uwae-ba arun ti titsen, u ri te ba baa, “Ni tsi tum titawe, se iken ti ujwunn arwan wande-ni ti ameinja-ni ti a u wen ba pangma ti a wen ni, a ren pu-yi.”

¹²Ama ti Mbae utam wu mbubta kupwa ti a fxifxeb ti fa ti itsongnjo, ame sae, ti m nunung, utense kyi ijwe, riben taen punn punn, usir kafe tibyir kang cwurr, ushaen ama kafe tibyaen pangma anying.

¹³Kititaen ti apupwen mbub ru, u jwunn si ba yi riben pangma awaen kututung ti tikong, ti ufunn ti ribom a ku kae, ayi ku suskun.

¹⁴Apwa apupwen yagta pangma kucwo ti a fur ra wu nwunn. Ama meme rikwen ti riben ti uyinn pakob wu fa uwae, mbub nwunn uwog ti tsi-yi.

¹⁵Isim yine meme ande ti utense, akwe, ande ti uwe uten, ande ti uwe akyirten, ande ti rifunn, ande ti kuko, apyi ti ande ti si-ba apyi be, a pu atso meme ka tam uwae inya atxom ti uwae uwáe rikwen.

¹⁶Aba ku kunn ira, ku ri te rikwen ti atxom baa, “Ni kyaen si burkyi ti, ti ni tamkyi ti uwe Awu ti somtsa kutxomkwe ne, ama ti rinae Mbae utam wune ā si-yi risu-ti be.

¹⁷Ikyaen ti, usir rinae-ba ba pu yi. Aye wu ti u tsi tu?”