Read kutep Ititatso 8 Bible Online

Ititatso 8 - kutep bible

Ititatso 8

¹Ama ti Mbae utam wu mbubta kupwa ti a fifxeb ti fa ti itsongfaen, uwog skirr skirr apupwen, ka ripye áwa kinjo.

²Ame sae atom Rimam ti apupwen itsongfaen, aba atom ti ku tsi uwe Rimam. A pu atumu itsongfaen na ba.

³Tiri atom Rimam ti apupwen kinjo ba tsi uwe kuta zinariya, uwog ti a ku twen ikentitwen atang na Rimam. Kuseb zinariya ta kujwo-wu. A nda wu umung iken ti ku nung kuyang yang-yi, ti wu na twen yi risu kuta zinariya, ti tsi uwe kutxomkwe atang na Rimam, renfa te itijwam meme ande Rimam ti sisaen ti a ku jwam.

⁴Ama akyang ikentitwen yine, ren fa ti itijwam ande Rimam, ku tso tsinene yi uwe Rimam.

⁵Cwucwo atom Rimam ti apupwen wune pu urwa risu kuta ti a ku twen iken atang, si munn kuseb wu, u ye jwunnsi uwae utense. Ama imam ku taen, ku jaen wur wur, ritum ku tum, uwog fxaekyi, utense meme kyi ijwe, tang tang tang tang.

⁶Ama atom Rimam ti apupwen itsongfaen aba ti ye su atumu itsongfaen, kyae ijwe-ba tsi ti ujwin ti a u kunn yi.

⁷Itikucang kunn ana-wu, ama akóng upwen ti urwa, naafa te anying, yaen si utense. Kujwo kyab iki na utense twen mbub, ya ta ajwo kyab ifaen. Kujwo kyab iki na ituku twen mbub, ya ta ajwo kyab ifaen. Meme irum ti tirisub twen mbub tag.

⁸Ti atom ti ifaen kunn kutumu-wu, a ye iken iki ti pangma rikwen tiyang, ti ku cwe urwa wur wur, jwunnsi uwae uyinn, ama kujwo kyab kinjo na uyinn kafe anying.

⁹Kujwo kyab kinjo uwae iken ita na iken ti ku nyang unyang ti ta uwae uyinn atang cwu tag. Kujwo kyab kinjo uwae iken ita na ayae tiyang ti uwae ambyi byinn mbub.

¹⁰Ama atom ti ita kunn kutumu-wu, kititaen tiyang jwunnsi apupwen ba, u ku cwé piin pangma amunn urwa kakongka. Awu jwunnsi kujwo ikyab iki na unyim, ti isatsub ambyi.

¹¹Rinyi kititaen wu baa, “Rikàen ti nungag.” Kujwo kyab ambyi uwog iki kafe rikàen. Ande yang-ba cwu, ikyaen ti, ambyi wu kafe rikàen titibi.

¹²Ti atom ti inje kunn kutumu-wu, a byinn kujwo kyab kinjo na usir ti ana ushaen ti ana atitaen ti nda yi kang mbeb. Ama kufub sikyi kujwo ikyab na usirtaen ti utitang meme.

¹³Tiri ame sae ikwen ti ku pinn apupwen. Ame fxen wu ku kunn ukunn baa, “Kukuuwu! Kukuuwu! Kukuuwu! Ande utense u nde rimang, isim ti atom ita ti tsitsi a kunn kutumu-ba?”