Read kutep Ititatso 9 Bible Online

Ititatso 9 - kutep bible

Ititatso 9

¹Ti atom ti itsong kunn kutumu-wu, ame sae kititaen iki jwunnsi apupwen ba yi utense. A nda wu iken ufu na kukwae ti itikunntsi-wu ta-yi be.

²Ama ti awu mbub kukwae wu, akyang ku tso tsig tsig tsig, u kang cwurr, pangma akyang kuvum urwa tiyang. Usir ti uwog meme kafe itibyir, ikyaen akyang ti ruye uwae kukwae wu.

³Tiri, icwag pinn ruye uwae akyang atang ba yi utense. A nda yi kuko pangma ana kinang uwae utense.

⁴A ri te yi baa, ayi na ci ndembeb-yi irum ko afub ko ituku tirisub iki utense be, amaa, ayi na sha nyáng ande ti a kum ba sitami na Rimam kutxuwe-ba be.

⁵A nda yi kuko ti yi na nde ande ba rikaen, ka ishaen itsong, amaa, ayi ā wen-yi aba wen be. Rikaen ti u tu ba, si pangma rikaen ti kinang a tā unde, ayi ku shir ndáe ndáe ndáe ndáe.

⁶Usir wu né, ande u sha iticwu ti aten ayib, iticwu u ba-wu be. A u sha ti a u cwu, ama iyee, iticwu u ter ba ter.

⁷Icwag yi pangma kakum ti a kyae ba tsi ti kujwin ikyaen rika. Iken iki ta risu-yi ti pangma ubur ukwe ti a kyae wu te zinariya. Kutxuwe-yi pangma kutxuwe na ande.

⁸Ikyinn risu-yi pangma ikyinn risu anda, anyi-yi pangma ana itumu.

⁹A burkyi kikog-yi te kupwa rika akyabser. Ritum asae-yi kiye ti ayi a ku pinn apupwen, pangma ritum keke kakum rika ti ujwunn-yi kiye ti ayi a ter ku ru ti inyae yi uwog rika.

¹⁰Ikyēn-yi pangma ana kinang ti ku tā ande. Ama ikyēn-ba ayi site kpakang ti rikàen-yi u caeb ande ka ishaen itsong.

¹¹Ayi site ukwe-yi ti si atom ti ku nungkyi kukwae ti itikunntsi-wu ta-yi be. Rinyi-wu unju Mbaibrane baa, Abadonn, unju Helene ama, a ku kunn wu baa, Apoliyon, ti imbyi-yi baa, “Twenji.”

¹²Iken ti ayae ti tawe yafe pu wu, tsi tsi ifaen ti ku ba ti uwe.

¹³Tiri atom Rimam ti apupwen ti fa ti itsongnjo kunn kutumu-wu, ame fxen ujwin ruye ishin inje na kuta zinariya ti tsi uwe Rimam.

¹⁴Ayi ku ri te atom ti itsongnjo ne ti site kutumu baa, “Ru ka saen atom inje ti a kya ba unju uyinn tiyang ti Yufiretis, ta.”

¹⁵Ikyaen yine, atom Rimam ti apupwen inje ba ti tsi mam pu ba ti ujwin ikyaen kiye wune, ti usir wune, ti ishaen wune, ti kusang wune, a saen ba ta ti aba na ka wen kujwo kyab kinjo na ande ti utense.

¹⁶Ujwunn akyirten ti a pwen nee ame fxen, ka miliyon ukob ifaen ti ku tso kakum rika.

¹⁷Itso ti ame sae kakum rika yi, te ande ti ku tso yi uwae kurwa-m ta re. Ande ti tso yi burkyi kikog-ba ti kupam akyabser ti tā ribae. Ribae ikyabser yi iki byaen pangma urwa, iki pangma kindob ikān, u kikang pangma kutxom safire, iki byaen pwafufong. Risu kakum yi pangma risu itumu. Urwa ti akyang ku ruye unju-yi.

¹⁸Kujwūnn titibi ita yine, urwa, ti akyang, ti umung ipung ti ku tutwen ti ruye unju kakum yine, twenji ande kujwo kyab kinjo uwae ita na ande ti utense.

¹⁹Ribom kakum yine ta unju-yi ti ikyēn-yi. Ikyēn-yi pangma risu ikentibi, ama ayi ku pye ande atang.

²⁰Ande ti tsitsi ti kujwūnn titibi yine twenji-yi aba be, kafe isim ta-ba kujwo wande titibi-ba ti a ku nde be. Aba tsikunn itifen apxin zinariya, ti ana azurfa, ti bronzi, ti atxom, ti ituku ti si iken ti ku sae-yi ayib be, ku fxen-yi ira be, u ku kyang-yi ikyin be.

²¹Aba ya ande ti wen, ti kisi ti ru, ti amae ti nae ti iyag ti nae, ti riyib ti yib, ta-ba be.