Read lambya MATAYI 13 Bible Online

MATAYI 13 - lambya bible

MATAYI 13

¹Pisiku lila-lila u Yesu akepapo panyumba yila nukubuka pakwikala pasi mulubazu ulwa nyanja.

²Abantu babo bakamuzyungulila bakaba binji nkani, umwakuti akinjila mubwato nukwikala mula-mula, bo abantu bimiliye mulubazu ulwa nyanja.

³Akababuzya ivintu ivyinji muvyili akati, “Kukabako umuntu yumo yuyo akabuka pakupesa imbeyu mumughunda wache.

⁴Bo ali pakupesa, imbeyu zimo zikawila muzila, po iviyuni vikiza nukuzizompola.

⁵Zimo zikawila pilyalabwe pakuti pakaba itope linandi. Umwalubilo-lubilo imbeyu zila zikamela pakuti patakabapo itope ilyinji.

⁶Loli bo izuba lyakwela, imbeyu zila zikababuka pakuti amagululuzi ghakaba ghachili ghatayiye nkani pasi, sona imbeyu zila zikuma.

⁷Imbeyu zimo zikawila pakasi pamivwa, ghagho ghakakula nukufyululusya imbeyu zila.

⁸Loli imbeyu zimo zikawila pitope ilyiza, po imbeyu zikela iseke; zimo zikela iseke 100, zimo 60, izinji 30.”

⁹U Yesu akati, “Yuyo ali na makutu aghakwivwila, ivwe!”

¹⁰Pisinda pache abamanyili bala bakamulaluzya u Yesu bakuti, “Nkimba choni chicho ukubombezya ivyili nanti ukunena na bantu?”

¹¹U Yesu akamula akati, “U Chala abavumbulila vivyo vifisiwe ivya Bumwene ubwa Kumwanya, loli abantu bosi abanji, awe.

¹²Pakuti umuntu yuyo ali nako kale kamo, akwiza pakumonjelezyapo ivyinji, ukuti abanje navyo ivyinji ukuchila. Loli umuntu yuyo ate nako kamo akwiza pakufyuliwa na kanandi bulo kako ali nako kale.

¹³Ifundo yiyo inkubombezya ivyili, bo inkunena na bantu yakuti, bakwennya loli batakwennya kamo, bakuteghelezya loli batakwivwa pamo ukuvwisya.

¹⁴Amazyu agha mulaghuzi u Yesaya ghakwanilisiwe kukwabo ukuti: ‘Abantu banaba naloli bakwiza pakwivwa, loli bate bakivwisye. Bakwiza pakwennya, loli bate bakennye nakamo-kamo.

¹⁵Ichifukwa amoyo ghabo makafu nkani, sona basindiye amakutu ghabo, basizilite amaso ghabo. Pakuti ngali amaso ghabo ghakwennya, amakutu ghabo ngali ghakwivwa ni nyinong'ono zyabo ngali zikwivwisya. Po ngali bapindukila kukwane, u Chala akunena, ngali imbapozizye.’

¹⁶“Loli mwe basayiwa pakuti amaso ghinyu ghakwennya, sona amakutu ghinyu ghakwivwa.

¹⁷Naloli inkubabuzya ukuti abalaghuzi abinji na bantu abinji aba Chala bakalondagha nkani pakwennya zizyo mukwennya, loli batakazyennya. Bakalongagha nkani pakwivwa zizyo mukwivwa, loli batakazyivwa.”

¹⁸“Polelo ivwa kuno nukumanyila ukuti ichili icha mupesambeyu chikung'anamula ichoni.

¹⁹Abantu babo bakwivwa amazyu ghagho ghakunena nizya Bumwene ubwa Kumwanya loli batakwivwisya bayanite bulo ni mbeyu zizyo zikawila muzila. Umubibi yula akwiza nukuzompola vivyo vikapesiwa mumoyo ghabo.

²⁰Imbeyu zizyo zikawila pilyalabwe, zikwimilila babo bakupokela amazyu nu buhobosu pakabalilo kako baghivwila.

²¹Loli ghatakwinjila nkani mumwabo, sona ghatakwikala akabalilo akatali. Po nanti intamyo pamo ukuvwimiwa kwafika pachifukwa icha mazyu, bakuwa umwalubilo-lubilo.

²²Imbeyu zizyo zikawila pakasi pamivwa zikwimilila abantu babo bakwivwa amazyu agha Chala. Loli ukwikolezannya nivya muchisu ichapasi pano, ukuchighana ichuma vikufyululusya amazyu ghala, po batakupa iseke.

²³Imbeyu zizyo zikapesiwa mwitope ilyiza zikwimilila abantu babo bakwivwa amazyu nukughivwisya: Bakupa iseke, bamo 100, abanji 60, sona bamo 30.”

²⁴U Yesu akababuzya ichili ichinji akati, “Ubumwene ubwa Kumwanya buyanite bulo nu muntu yuyo akapesa imbeyu inyiza mumughunda wache.

²⁵Ubusiku bumo, bo umuntu wesi aghonite, umulwani akiza nukupesa indezye mu ngano nukwepapo.

²⁶Bo imbeyu zyakula nukwanda pakufuma utumitu, po zyope ni ndezye zikaboneka.

²⁷Abambombo aba muntu yula bakiza nukumubuzya ukuti, ‘Wee Mwene, imbeyu zizyo ukapesa mumughunda mula zikaba nyiza. Nkimba indezye zyafuma kwiyi?’

²⁸Akamula akati, ‘Akaba mulwani yumo yuyo akabomba zinizi.’ Bakamulaluzya bakati, ‘Nkimba ukulonda ukuti tubuke pakunyunkulamo indezye?’

²⁹Akamula akati, ‘Awe, ichifukwa bo mukunyunkula indezye munganyunkulila poka ni ngano.

³⁰Yileke ingano ni ndezye vikulile poka mupaka pakabalilo akakwinulila. Po inkwiza pakubabuzya abinuli ukuti banyunkule tasi indezye nukuzipinya munkose nukuzyocha. Pisinda pache babungannye ingano nukubika muntamba yane.’ ”

³¹U Yesu akababuzya ichili ichinji akati, “Ubumwene ubwa Kumwanya buyanite bulo nu muntu yuyo akusenda imbeyu iya muzimwa nukuyipesa mumughunda wache.

³²Kambeyu akanandi nkani patumbeyu tosi, loli nanti kakula kakuba kakulu nkani ukuchila imbeyu zyosi, umwakuti utuyuni tukwiza nukulukamo ivivumbo vyabo musamba zyache.”

³³U Yesu akababuzya sona ichili ichinji akati, “Ubumwene ubwa Kumwanya buyanite bulo nu mukolo yuyo akusenda ichilungo nukongannya ni ndobo zibili izya busu mupaka ichinyenya chosi chikatutumuka.”

³⁴U Yesu akabombezya ivyili vyosi vinivi pakunena na bantu bala. Atakanenaghapo nachimo-chimo pakusita ukubombezya ichili.

³⁵Akabomba zinizi pakukwanilisya zizyo umulaghuzi akalaghula ukuti, “Inkwiza pakunenela muvyili, bo inkunena nabo. Inkwiza pakubabuzya ivintu vivyo batavimenyepo nalumo-lumo ukwandila pakabalilo kako ichisu ichapasi chikapeliwa.”

³⁶Po u Yesu akepapo pachilundilo icha bantu chila nukwinjila munyumba. Abamanyili bache bakiza nukumulaba ukuti, “Tubuzye, nkimba ichili icha ndezye mumughunda chikung'anamula ichoni.”

³⁷U Yesu akamula akati, “Umuntu yuyo akapesa imbeyu inyiza we Mwana uwa Muntu;

³⁸umughunda cho chisu ichapasi; imbeyu inyiza bo bantu aba mu Bumwene; indezye bo bantu aba Mubibi yula;

³⁹umulwani yuyo akapesa indezye we Satana. Inyinulo bo bumalilo ubwa chisu ichapasi, sona abinuli bala bo bantumi.

⁴⁰Indezye zikunyunkuliwa nukochiwa pamoto, umwakuyana bulo, umu mo mumo kukwiza pakubela pabumalilo ubwa chisu ichapasi.

⁴¹U Mwana uwa Muntu akwiza pakutuma abantumi bache ukwefya abantu bosi mu Bumwene bwache, babo bakupuvya abantu na babo bakubomba ivibibi.

⁴²Bakwiza pakusumbiwa pamoto, mumo bakwiza pakulila nu kusyeketula amino ghabo.

⁴³Po abantu aba Chala bakwiza pakulama ngati lyo lizuba mu Bumwene ubwa Tata wabo. Yuyo ali na makutu aghakwivwila, ivwe!

⁴⁴“Ubumwene ubwa Kumwanya buyanite bulo nu bukabi bubo bufisiwe mumughunda, bubo umuntu akabwagha nukubufisa sona, po mubuhobosu bwache akubuka nukughulizya vyosi vivyo ali navyo, akunyokela nukughula umughunda ghula-ghula.

⁴⁵“Ubumwene ubwa Kumwanya buyanite sona nu muntu yuyo akulonda ubwambo ubwamutengo.

⁴⁶Bo abwagha boka ubwamutengo, akabuka nukughulizya vyosi vivyo akaba navyo nukughula ubwambo bula.

⁴⁷“Sona, Ubumwene ubwa Kumwanya buyanite bulo na balobaswi babo bakusumbila ichilepa chabo munyanja nukuloba iswi izyakulekana-lekana.

⁴⁸Bo ichilepa chizula, bakuchiwesela kulubazu ulwa nyanja, bakwikala pasi nukugaba iswi: Iswi inyiza bakuzibika muchizanga, loli imbibi bakuzisumba.

⁴⁹Momumo kukwiza pakubela pabumalilo ubwa chisu ichapasi: Abantumi bakwiza pakubuka pakwefya abantu ababibi pakasi pa bantu abiza,

⁵⁰nukubasumbila ababibi pamoto, mumo bakwiza pakulila nu kusyeketula amino ghabo.”

⁵¹U Yesu akabalaluzya akati, “Nkimba mukwivwisya ivintu vyosi ivi?” Bakamula bakati, “Ee.”

⁵²Po akabamula akati, “Ichi chikung'anamula ukuti umumanyisi wesi uwa Ndaghilo yuyo akuba mumanyili mu Bumwene ubwa Kumwanya ayanite bulo nu mwenecho uwa nyumba, yuyo akuvyefyamo ivintu ivipya ni vikali muchipinda chache ichakusungilamo ivintu.”

⁵³Bo u Yesu amala pakubabuzya ivyili vinivi, akepapo pabuyo bula.

⁵⁴Akabwela nukwanda pakumanyizyanga munyumba izyakwiputilamo, po abantu babo bakamwivwa bakaswigha nukulaluzya ukuti, “Nkimba amahala na maka aghakubombela ivintu vinivi akaghagha kwiyi?

⁵⁵Nkimba yunuyu ate mwana uwa mupalamatabwa? Nkimba unyina ate we Maliya? Nkimba ate we wamwabo uwa Yakobo, u Jozefu, u Simoni nu Yudasi?

⁵⁶Nkimba abayemba bache batakwikala naswe kuno? Akavyagha kwiyi vyosi vinivi?”

⁵⁷Po bakamukana. U Yesu akababuzya akati, “Umulaghuzi akuchindikiwa kosi na kosi, loli kwene kukaya kache, sona bantu aba munyumba yache.”

⁵⁸Atakabombako ivyika ivyinji pakuti batakaba nu lwitiko.