Read lambya MATAYI 19 Bible Online

MATAYI 19 - lambya bible

MATAYI 19

¹Bo u Yesu amala pakunena zinizi, akepamo muchigaba icha Galileya nukubuka muchigaba icha Yudeya kwisila ilinji ilya lusoko ulwa Yolodani.

²Ichilundilo ichikulu icha bantu chikamukonka, po akabapozyanga kula-kula.

³Aba Falisayi bamo bakiza kukwache nukuyezya pakumutegha mukanenele pakumulaluzya ukuti, “Nkimba Indaghilo zyitu zikwitikizya ukuti umwanavuli amusosye umuchi wache pachifukwa chosi chicho akulonda?”

⁴U Yesu akamula akati, “Mutabelengitepo Amasimbo aghakuti pabwandilo u Mupeli akapela umwanavuli nu mukolo?

⁵Po u Chala akati, ‘Pachifukwa ichi, umwanavuli akwiza pakumuleka uwise nu nyina nukumamatilana poka nu muchi wache. Po babili banaba bakwiza pakuba mubili ghoka.’

⁶Po bate bantu babili sona, loli mubili ghoka. Po chicho u Chala amamatizya poka, patakabepo umuntu uwakuchimamatula.”

⁷Aba Falisayi bakamulaluzya u Yesu bakati, “Nkimba choni chicho u Mozesi akalamula ukuti umwanavuli amupanje umuchi wache ukalata uwakumusosya nukumuchimbizya?”

⁸U Yesu akamula akati, “U Mozesi akabitikizya pakubasosya abachi binyu pachifukwa ichakuti amoyo ghinyu makafu nkani. Loli mute momumo chikabela pabwandilo.

⁹Ilelo inkubabuzya ukuti nanti umwanavuli akumusosya umuchi wache pabusita ichifukwa icha bulowe nukusenda umukolo uyunji, kokuti akulowa.”

¹⁰Abamanyili bache bakamubuzya bakati, “Nanti momumo zibeleye pakasi pa mwanavuli nu muchi wache, chizapo ukuleka pakusenda.”

¹¹U Yesu akamula akati, “Te muntu wesi yuyo angachipokela ichimanyisyo ichi, loli bene babo u Chala abapiye.

¹²Pakuti pali ivifukwa ivyakulekana-lekana vivyo umuntu atangasendela: Bamo pachifukwa ichakuti bapapiwe bula-bula; abamwabo pachifukwa ichakuti bapangiwe na bantu; abanji pachifukwa icha Bumwene ubwa Kumwanya. Yuyo angapokela ichimanyisyo ichi muleke apokele.”

¹³Abantu bamo bakiza na bana kwa Yesu ukuti abasaye pakubika inyobe zyache nukubiputila, loli abamanyili bache bakabachemela.

¹⁴U Yesu akati, “Baleke abana bize kukwane, mutakabakanizye pakuti Ubumwene ubwa Kumwanya bwa bantu babo bali ngati bo aba.”

¹⁵Po akabika inyobe zyache papabo nukubuka.

¹⁶Akabalilo kamo umuntu yumo akiza kwa Yesu nukumulaluzya ukuti, “Wee Mumanyisi, nkimba imbombe chiza choni ukuti impokele ubumi ubwa bwila na bwila?”

¹⁷U Yesu akamula akati, “Nkimba choni chicho ukundalusya ukuti choni chicho chiza. Alipo bulo Weka yuyo mwiza. Konka amalamulo nanti ukulonda ubumi ubwa bwila na bwila.”

¹⁸Akalaluzya akati, “Malamulo ghoni?” U Yesu akamula akati, “Utakaghoghaye, utakalowaye, utakibaye, utakabanje we kaboni umumyasi,

¹⁹sona chindika ughuso nu nyoko. Umughanaye umupalamani wako ukuyana na mumo wiyighaniye wemwenecho.”

²⁰Umulumendo yula akamula akati, “Inkonkite amalamulo ghosi ghanagha. Nkimba imbombe ichoni sona?”

²¹U Yesu akati, “Nanti ukulonda pakuba we mwiza, kaghulizye vyosi vivyo uli navyo nukubapa abapina indalama, po ukwiza pakuba nu bukabi kumwanya, po wize nukunkonka.”

²²Bo umulumendo yula ivwa zinizi, akabuka ni chitima pachifukwa ichakuti akaba mukabi nkani.

²³Po u Yesu akababuzya abamanyili bache akati, “Naloli inkubabuzya ukuti chipala nkani ukuti abantu abakabi binjile mu Bumwene ubwa Kumwanya.”

²⁴Inkunena sona ukuti chipala nkani ukuti umuntu umukabi injile mu Bumwene ubwa Chala ukuchila ukuti ingamila yinjile mu kabwazi aka sindano.

²⁵Bo abamanyili bivwa zinizi, bakaswigha nkani. Bakalaluzya bakati, “Po nkimba we wenu angapokiwa?”

²⁶U Yesu akabenelezya nukubamula ukuti, “Zinizi zitangabombiwa nu muntu, loli nu Chala. Pakuti nu Chala ichintu chosi chipepe bulo.”

²⁷U Pitala akamula akati, “Ennya, twavileka vyosi nukukukonka awe. Nkimba umuvwalo ghoni ghugho tukwiza pakupokela?”

²⁸U Yesu akababuzya akati, “Naloli inkubabuzya ukuti bo u Mwana uwa Muntu ikaye pachitengo chache icha buchindamu pakabalilo kako ivintu vyosi vikwiza pakuba vyinyu, sona amwe mukwiza pakwikala pa vitengo 12 ivya bumwene pakulonga inko 12 izya ba Izilayeli.

²⁹Sona umuntu wesi yuyo ayilekite inyumba pamo abawamwabo, pamo abayemba, pamo uwise pamo unyina, pamo abana, pamo amaghunda, pachifukwa icha nene, akwiza pakupokela ivintu ivyinji ukuchilapo 100, sona akwiza pakupokela ubumi ubwa bwila na bwila.

³⁰Loli abinji abakwanda bakwiza pakuba babumalilo, sona abinji ababumalilo bakwiza pakuba bakwanda.”