Read lambya MATAYI 7 Bible Online

MATAYI 7 - lambya bible

MATAYI 7

¹“Mutakabalongaye abantu abanji, umwakuti u Chala wepe atakabalonge.

²Pakuti mumo mukubalongela abantu abanji, momumo u Chala akwiza pakubalongela. Ichipimilo chicho mukubombezya pa bantu abanji, cho chicho u Chala akwiza pakubombezya papinyu.

³Nkimba choni chicho ukwennya akapato mu lyiso ilya umukamu wako, ukusita ukwinong'ona ichizinka chicho chili mu lyiso lyako?

⁴Nkimba ungamubuzya buli-buli umukamu wako ukuti, ‘Zagha nefye akapato mu lyiso lyako,’ bo nawe bulo mu lyiso lyako muli ichizinka?

⁵We muzimbuli wee! Efya tasi ichizinka chicho chili mu lyiso lyako, po ukwiza pakwennya akiza nukwefya akapato kako kali mu lyiso ilya mukamu wako.

⁶“Mutakazipanje imbwa chicho chizelu pakuti zikwiza pakukusambukila nukukuluma. Mutakazisumbilaye ingulube chicho chipaghuliwe kwa Chala pakuti zikwiza pakukanyannya bulo.

⁷“Mulabaye, po mukwiza pakupokela. Mulondaye, po mukwiza pakuvyagha, sona mukong'osyanje, po ulwiyi lukwiza pakubighukila.

⁸Pakuti umuntu wesi yuyo akulaba akwiza pakupokela, sona umuntu wesi yuyo akulonda akwiza pakuvyagha, sona umuntu wesi yuyo akukong'osya, ulwiyi lukwiza pakumwighukila.

⁹Nkimba alipo umuntu yuyo, nanti umwana wache akulaba ichibama, akumupa ibwe?

¹⁰Pamo nanti akulaba iswi, akumupa injoka?

¹¹Nanti mwe bantu mwe babibi mumenye pakubapa ivintu ivyiza abana binyu, zili buli-buli nu Ghuso uwa kumwanya? Nkimba angapotwa pakubapa ivintu ivyiza babo bakumulaba?”

¹²“Mubabombelaye abantu abanji vivyo amwe mukulonda ukuti bababombelaye. Ichi cho chicho Indaghilo izya Mozesi nu bumanyisi ubwa balaghuzi vikumanyizya.

¹³“Mwinjilaye pamulyango umufinye. Pakuti umulyango uwa kubuyo ubwa lunanganiko mukulu, sona izila iyakubukila kuko mpepe, po binji babo bakwendamo.

¹⁴Loli umulyango uwa ku bumi mufinye, sona izila iyakubukila kuko mpala-pala, po bantu banandi babo bakuyagha.

¹⁵“Muchebaye nabo abalaghuzi abamyasi; bakwiza kukwinyu ngati zyo ng'ozi, loli mukasi bayanite bulo ni mpumpi!

¹⁶Mukwiza pakubamanyila mumbombo zyabo. Ikwi ilya mivwa litakwela abamulebe, pamo ikwi ilya ntolovu litakwela ivikuyu.

¹⁷Ikwi ilyiza likwela iseke inyiza, loli ikwi ibibi likwela iseke imbibi.

¹⁸Ikwi ilyiza litangela iseke imbibi, sona ni ikwi ibibi litangela iseke inyiza.

¹⁹Ikwi lyosi lilyo litakwela iseke inyiza likudumuliwa nukusumbiwa pamoto.

²⁰Po mukwiza pakubamanyila abalaghuzi abamyasi mumbombo zyabo.

²¹“Te bantu bosi babo bakunyitizya ukuti, ‘Mwene, Mwene,’ bakwiza pakwinjila mu Bumwene ubwa Kumwanya, loli bene babo bakubomba zizyo Utata wane uwa kumwanya akulonda.

²²Bo isiku lilyo u Chala akwiza pakubalonga abantu lyafika, abinji bakwiza pakunena ukuti, ‘Wee Mwene, Mwene tukalumbililagha amazyu agha Chala mwitabwa lyako, tukefya imizimu imibibi nukubomba ivyika ivyinji mwitabwa lyako.’

²³Po inkwiza pakubabuzya ukuti, ‘Intabamenye nalumo, epapo, mwe bantu ababibi amwe!’

²⁴“Umuntu wesi yuyo akwivwa amazyu ghane nukughabombezya imbombo ayanite bulo nu muntu uwamahala, yuyo akazenga inyumba yache pilyalabwe.

²⁵Ivula yikatima, isoko zikizula, sona impepo yikakuka nkani nukukoma inyumba yila. Loli inyumba yila yitakawa, pakuti yikazengiwa pilyalabwe.

²⁶Umuntu wesi yuyo akwivwa amazyu ghane, loli atakughabombezya imbombo ayanite bulo nu muntu umupunganu yula, yuyo akazenga inyumba yache pamusesenga.

²⁷Ivula yikatima, isoko zikizula, sona impepo yikakuka nkani nukuyikoma inyumba yila. Po inyumba yila yikawa nukumongonkana.”

²⁸Bo u Yesu anena zinizi, ichilundilo icha bantu chikaswigha nkani namumo akamanyizizyanga.

²⁹Atakamanyizyanga ngati bo bamanyisi aba Ndaghilo izya Mozesi, loli akamanyizya ngati we mwenecho uwa bulaghili.