Read lambya MALIKO 15 Bible Online

MALIKO 15 - lambya bible

MALIKO 15

¹Pandabi-ndabi nkani abaputi abasongo bosi, na balongozi aba Chiyuda, sona na bamanyisi aba Ndaghilo na balongi bosi bakakomana poka nukunenezannya bene-bene nizya Yesu. Bakamupinya u Yesu nukubuka nawe kwa Pilati.

²U Pilati akamulaluzya akati, “Nkimba awe we Mwene uwa ba Yuda?” U Yesu akamula akati, “Wanena wemwene.”

³Abaputi abasongo bakamutamantila u Yesu ivintu ivyinji,

⁴po u Pilati akamulaluzya sona akati, “Nkimba utakwamula? Ivwa ivintu vyosi vivyo bakukunenela.”

⁵U Yesu akasona umulomo wache, chicho chikamuswighizya nkani u Pilati.

⁶Pakabalilo kosi aka Lusekelo ulwa Pasa umulaghili uwa Chiloma akizubila pakumusatula umukayidi weka, yuyo abantu bamusala ukuti asatuliwe.

⁷Pakabalilo kala-kala umuntu yuyo bakatinji u Balabasi akaba mujele poka na babo bakalisambukila iboma nukughogha abantu pavyongo.

⁸Bo ichilundilo icha bantu chabungana, chikanda pakumulaba u Pilati ukuti ababombele vivyo akizubilila.

⁹Akabalaluzya akati, “Nkimba mukulonda imbabulile u Mwene uwa ba Yuda?”

¹⁰U Pilati akazimanya akiza nkani ukuti abaputi abasongo bamubikite u Yesu munyobe zyache pachifukwa icha kabini bulo.

¹¹Loli abaputi abasongo bakasonjelezya abantu pakumulaba u Pilati ukuti amusatule u Balabasi, mubuyo ubwa Yesu.

¹²U Pilati akachilaluzya sona ichilundilo chila akati, “Nkimba po imbombe nawe ichoni yuyo mukuti we Mwene uwa ba Yuda?”

¹³Abantu bakakolomoka nkani bakati, “Umukomele pachipinjika!”

¹⁴U Pilati akalaluzya akati, “Nkimba ananga ichoni?” Loli abantu bosi bakakolomoka nkani bakati, “Umukomele pachipinjika!”

¹⁵U Pilati akalondagha pakuhobosya ichilundilo, po akabasatulila u Balabasi nukulamula ukuti u Yesu asyempiwe. Pisinda pache akamubika ukuti bamukomele pachipinjika.

¹⁶Abasikali bakamusenda u Yesu nukwinjila nawe mulubinjilo ulwa nyumba iya mulaghili uwa Chiloma nukubungannya poka akabukatila kosi aka basikali abankondo.

¹⁷Bakamuvwika u Yesu inkazo inchesamu, bakaluka impumpu iya mivwa nukumuvwika kumutu.

¹⁸Po bakanda pakumulamuka ukuti, “Mwaghona Mwene uwa ba Yuda!”

¹⁹Bakamukoma pamutu ni ndisa nukumufwinila amati, bakamufughamilila nukumuchindika.

²⁰Bo baleka pakumobezya, bakamuvula inkazo inchesamu yila nukumuvwika sona amenda ghache. Po bakabuka nawe pakumukomela pachipinjika.

²¹Muzila bakakomana nu Simoni uwa mu Kileni uwise uwa Alikizandala nu Lufu, yuyo akadumusannyanga bulo ukufuma mutwaya. Abasikali abankondo bakamufyenga ukuti anyamule ichipinjika icha Yesu.

²²Bakamusenda u Yesu nukubuka nawe kubuyo bubo bukwitiziwa ukuti we Gologota, chicho chikung'anamula ukuti, “Ubuyo bubo buyanite bulo ni fupa ilya kumutu.”

²³Kula-kula bakayezya pakumupa uvinyo uwakongannya nu mulembo uwa mila, loli u Yesu akakana pakung'wela.

²⁴Po bakamukomela pachipinjika nukugabana amenda ghache pakupanga amayele ukuti bennye chicho umuntu wesi asende.

²⁵Akabalilo kakaba nayini koloko pandabi-ndabi pakuti bakamukomelagha u Yesu pachipinjika.

²⁶Inongwa yiyo bakamughoghela u Yesu yisimbiwe ukuti, “Uyu we Mwene uwa ba Yuda.”

²⁷Bakamukomela u Yesu pachipinjika pala-pala poka na mavyondongo mabili, lyoka kunyobe indilo, sona ilinji iya kumongo.[23]

²⁸

²⁹Abantu babo bakadumusannyanga pala-pala bakapukuzya imitu yabo nukumusamula u Yesu ukuti, “Eya! Ute wewe ukatinji, ‘Inkwiza pakumongolannya Inyumba iya Chala nukuyizenga sona mumasiku matatu!’

³⁰Losi ulu ika pachipinjika nukwipoka wemwene!”

³¹Abaputi abasongo na bamanyisi aba Ndaghilo bope bakamobezya bakati, “Akabapokagha abantu abanji, loli atangipoka mwene!

³²Nanti naloli we Kilisitu u Mwene uwa ba Izilayeli, muleke ike pachipinjika losi ulu, po twennye nukumusubila!” Abantu babili babo bakakomeliwa poka nawe bope bakanda pakumobezya.

³³Pakasi pamusanya ichisi chikawa muchisu chosi, mupaka fili koloko pachamabwila.

³⁴Pachamabwila pakabalilo aka fili koloko, u Yesu akalila nizyu ilya pamwanya nukuti, “Eloyi, Eloyi, lama sabakatani?” Ichi chikung'anamula ukuti, “Chala wane, Chala wane, wandeka?”

³⁵Abantu bamo babo bakimilila pala-pala bakamwivwa nukuti, “Teghelezya akumwitizya u Eliya!”

³⁶Umuntu weka akachimbila nukuyidwibika isipanji muvinyo uwakusapa. Akayisomeka kulutete nukumupa ukuti ang'wele, po akati, “Leka twennye nanti u Eliya angiza pakumwisya pachipinjika!”

³⁷U Yesu akalila nizyu ilya pamwanya nukufuta akabumalilo.

³⁸Umwenda uwakuzighila mu Nyumba iya Chala ghukazepuka pakasi ukwandila pamwanya mupaka muntende.

³⁹Bo usongo uwa basikali abankondo, yuyo akimilila pala-pala ennya namumo u Yesu akafwila.[24] Akati, “Naloli uyu akaba Mwana uwa Chala!”

⁴⁰Abakolo bamo bakenelezyanga pabutalipo. Pakasi pa bakolo bala-bala pakabapo u Maliya Magadalena, nu Maliya unyina uwa Yakobo umunandi, sona nu nyina uwa Jozefu nu Salome.

⁴¹Bakamukonka u Yesu bo ali mu Galileya nukumwavwa. Abakolo abinji babo bakiza mu Yelusalemu nawe bope bakaba pala-pala.

⁴²Kakaba kabalilo akakuti kwanda pakwila pisiku ilya Chisano, lilyo aba Yuda bakiyannyanga nizya Ilisiku Ilyakutuzya.

⁴³U Jozefu uwa mukaya aka Alimatiya, yuyo akaba muntu umumanyikwe uwa balongi, sona akalindililagha ukuti u Chala ikazye u Bumwene bwache, akabuka kwa Pilati nu bujivu pakumulaba ukuti amupe umuvimba uwa Yesu.

⁴⁴U Pilati akaswigha bo ivwa ukuti u Yesu afuye kale. Akamwitizya usongo uwa basikali uwankondo nukumulaluzya nanti u Yesu afuye kale.

⁴⁵Bo ivwa zizyo usongo uwa basikali anena, u Pilati akamwitikizya u Jozefu ukuti angaghusenda.

⁴⁶U Jozefu akaghula isanda, akisya umuvimba nukughunnyembetelela ni sanda yila. Akaghubika mwipumpa lilyo likakumbiwa bulo kwibwe. Pisinda pache akabunguluzya ibwe ikulu nukwighalila pamulyango wipumpa.

⁴⁷U Maliya Magadalena nu Maliya unyina uwa Jozefu bakennya kuko umuvimba uwa Yesu ghukabikiwa.