Read lambya MALIKO 5 Bible Online

MALIKO 5 - lambya bible

MALIKO 5

¹U Yesu na bamanyili bache bakafika kwisila ilinji ilya Nyanja iya Galileya, muchigaba icha Gelasa.

²Bo u Yesu ika bulo mubwato, akakomana nu muntu uwa muzimu umubibi, yuyo akafumila ku mapumpa. Umuntu yunuyu

³akalindagha mumapumpa, umwakuti atakabapo nayumo umuntu uwakuti angamupinya ni mpingu.

⁴Utubalilo utwinji ivinama ni nyobe vikaba vipinyilile. Loli akabalilo kosi akadumulannyanga nukusumba impingu izya munyobe na muvinama. Atakabapo yumo uwakumupota pakuti akaba na maka nkani.

⁵Umusanya nu busiku akazyungulilagha bulo mumapumpa nu tughamba, akakolomokagha nkani nukwibolannya-bolannya na mabwe.

⁶Bo amwennya u Yesu pabutalipo, akamuchimbilila nukumufughamilila,

⁷akakolomoka nkani akati, “Wee Yesu Mwana uwa Chala uwa Kumwanya nkani! Nkimba ukulonda ichoni nane? Inkukulaba mwitabwa ilya Chala, utakanfunde!”

⁸Akanena bunubu pachifukwa ichakuti u Yesu akati, “Epamo mu muntu uyu, we muzimu umubibi!”

⁹U Yesu akamulaluzya akati, “Itabwa lyako we wenu?” Umuntu yula akamula akati, “Ne ‘Chilundilo,’ pakuti twe binji.”

¹⁰Po akamulaba u Yesu umwakulambilizya nkani ukuti atakefyemo imizimu imibibi muchigaba chila.

¹¹Ingulube inyinji zikalyanga papipi na kaghamba.

¹²Imizimu imibibi yikamulaba u Yesu ukuti, “Tutume mu ngulube zila nukutwitikizya ukuti twinjilemo.”

¹³Akayitikizya pakubuka, imizimu imibibi yikepamo mu muntu yula nukwinjila mu ngulube. Umudimo ghosi uwa ngulube zila, zizyo zikaba papipi 2,000 zikika nukuchimbila, po zikinjila munyanja nukudwiba.

¹⁴Abadimi aba ngulube zila bakachimbila nukubabuzya abantu mutwaya na mumaghunda. Po abantu bakabuka pakwennya vivyo vikabombiwa.

¹⁵Bo biza kwa Yesu bakamwennya umuntu yuyo akaba ni chilundilo icha mizimu imibibi. Akikalagha pala-pala, akavwala amenda, inyinong'ono zyache zikanyokelamo sona bosi bakanyila nkani.

¹⁶Babo bakavyennya bakababuzya abantu vivyo vikabombiwa ku muntu yuyo akaba ni mizimu imibibi, sona na ku ngulube bulo.

¹⁷Po bakamulaba u Yesu ukuti epemo muchigaba chabo chila.

¹⁸Bo u Yesu akukwela mubwato, umuntu yuyo akaba ni mizimu imibibi akamulaba ukuti abuke nawe.

¹⁹U Yesu atakamwitikizya, loli akamubuzya akati, “Nyokela kunyumba iya bakamu bako nukubabuzya ivintu ivikulu vivyo u Mwene akubombela, sona na mumo abeleye ni chisa nawe.”

²⁰Po umuntu yula akabuka muchigaba icha Dekapoli nukwanda pakubabuzya abantu vivyo u Yesu akamubombela. Bosi babo bakivwa bakaswigha nkani.

²¹U Yesu akaloboka sona inyanja. Bo afika kwisila, ichilundilo ichikulu chikabungana umwakumuzyungulila mulubazu ulwa nyanja yila.

²²Po u Yayili, usongo yumo uwa kunyumba iyakwiputilamo wepe akiza pala-pala. Bo amwennya u Yesu, akisumba munyayo izya Yesu

²³nukwanda pakumulambilizya ukuti, “Umwana wane umulindu mubine nkani! Nalema ivinama vyako, twende ubike inyobe zyako papache ukuti apole nukuba mumi!”

²⁴U Yesu akanyamuka nukubuka nawe. Abantu abinji bakamukonkagha umwakufyenyana nawe.

²⁵Kukabako umukolo yumo, yuyo akayimba nkani nu bubine ubwa chakumwezi amaka 12.

²⁶Akabuka mu baghanga abinji nukutagha ivyuma vyache vyosi vivyo akaba navyo ukuti lumo angapola, loli ububine bukendelela pakumuyivya.

²⁷Bo umukolo yula ivwa nizya Yesu, akiza muchilundilo icha bantu kwisinda ukwa Yesu,

²⁸kuno akunena mwene akuti, “Nanti napalamasya bulo amenda ghache, inkwiza pakupola.”

²⁹Akapalamasya amenda agha Yesu, panapo na panapo ibanda likaleka pakutonya. Po akiyaghannya mumubili wache ukuti intamyo zyache zyamala.

³⁰Panapo na panapo u Yesu akazimanya ukuti amaka ghamo ghakepamo mumwache, po akaghalabukila ku bantu nukulaluzya ukuti, “We wenu yuyo apalamasya amenda ghane?”

³¹Abamanyili bache bakamula bakati, “Ukwennya bulo namumo abantu bakubunganiye; choni chicho uchili pakulaluzya ukuti, ‘We wenu yuyo ampalamasya?’ ”

³²Loli u Yesu akendelela pakutalankannya ukuti angamwennya umuntu yuyo abombite zinizi.

³³Umukolo yula akazyaghannya zizyo zikabombiwa kukwache, po akiza bo akutetema nukunyila, akisumba munyayo izya Yesu nukumubuzya ubwanaloli bosi.

³⁴U Yesu akamubuzya umukolo yula akati, “Wee mwana wane, ulwitiko lwako lwakupozya. Wende akiza, intamyo zyako zyamala.”

³⁵Bo u Yesu akunena zinizi, abantu bamo bakafuma kunyumba iya Yayili nukumubuzya ukuti, “Umwana wako atuleka. Choni chicho ukumutamya umumanyisi?”

³⁶U Yesu akazisulannya[7] zizyo bakanenagha, loli akamubuzya u Yayili akati, “Utakanyilaye, unsubile bulo.”

³⁷U Yesu atakamwitikizya nayumo umuntu ukuti abuke nawe, loli akasenda bulo u Pitala, u Yakobo nu wamwabo u Yohani.

³⁸Bakafika panyumba iya Yayili, kuko u Yesu akennya ukuvulungana nukwivwa ichongo ichakulila ukwa bantu.

³⁹Akinjila nukubalaluzya ukuti, “Choni chicho muvulunganite? Choni chicho mukulila? Umwana atafuye, loli aghonite bulo utulo!”

⁴⁰Abantu bakamuseka, po akabafumya bosi kuzi, akasenda uwise uwa mwana nu nyina, poka na bamanyili bache batatu bala nukwinjila nabo muchipinda mumo umwana akalambalalaghamo.

⁴¹Akamulema inyobe nukumubuzya ukuti, “Talita kumi!” Chicho chikung'anamula ukuti, “Wee kalindu, inkukubuzya ukuti nyamuka!”

⁴²Panapo na panapo umulindu yula akanyamuka nukwanda pakwenda. Akaba na maka 12. Bo zinizi zyabombiwa, bosi bakaswigha nkani.

⁴³Loli u Yesu akabasoka nkani ukuti batakamubuzyepo nayumo umuntu, po akanena sona akati, “Mumupe chimo ichakulya.”