Read lambya MALIKO 6 Bible Online

MALIKO 6 - lambya bible

MALIKO 6

¹U Yesu na bamanyili bache bakepapo pabuyo bula nukunyokela kukaya kache, po abamanyili bache bakamukonka.

²Pisiku Ilyakutuzya akanda pakumanyizya munyumba iyakwiputilamo. Abantu abinji babo bakamwivwa u Yesu bakaswigha nukulaluzya ukuti, “Nkimba akavyagha kwiyi vyosi vinivi? Nkimba amahala ghoni ghagho umuntu yunuyu ali nagho? Nkimba amaka ghagho ali nagho aghakupelela ivintu vinivi?

³Nkimba yunuyu ate we mupalamatabwa, umwana uwa Maliya, nu wamwabo uwa Yakobo, nu Jozefu, nu Yudasi, sona nu Simoni? Nkimba abayemba bache batakwikala naswe muno?” Po bakamukana.

⁴Po u Yesu akababuzya akati, “Umulaghuzi akuchindikiwa kosi na kosi, loli kwene kukaya kache na bakamu bache, sona bantu aba munyumba yache.”

⁵Atakapela navimo ivyika, loli kwene pakubika inyobe pa babine abanandi bulo nukubapozya.

⁶Chikamuswighizya nkani pachifukwa ichakuti abantu bala batakamusubila. Po u Yesu akabuka mutwaya tuto tukaba papipi nu buyo bula pakubamanyizya abantu.

⁷Akabitizya abamanyili 12 bala poka nukubatuma babili-babili. Akabapa ubulaghili ubwakwefezezya imizimu imibibi mu bantu,

⁸nukubalamula ukuti, “Mutakasende nachimo-chimo pa bulendo bwinyu, loli yene indisa iyakwendela. Mutakasende impayo awe, inyambi iya pa bulendo awe, pamo indalama munyambi zyinyu.

⁹Vwala inkwato, loli mutakasende ilaya ilya palubazu.”

¹⁰Akababuzya sona akati, “Nanti abantu babapokela akiza munyumba, ikala mumo mupaka mwepemo mukaya kala.

¹¹Nanti mwafika mukaya kako abantu batakubapokela pamo ukubateghelezya, po mwepemo nukukung'unta ulufumbi munyayo zyinyu pakuba chimanyilo ichakubasoka.”

¹²Po abamanyili bala bakabuka nukwanda pakulumbilila pakasi pa bantu ukuti bapinduke nukuzileka imbibi zyabo.

¹³Bakefya imizimu imibibi imyinji nukubapakazya amafuta agha misyunguti ababine abinji nukubapozya.

¹⁴U Mwene u Helodi [8] akivwa zyosi zinizi pakuti ipangwi ilya Yesu likasata kosi na kosi. Abantu bamo bakatinji, “U Yohani Uwalozyo yula azyuka kubufwe! Ichi cho chifukwa ali na maka aghakupelela ivyika.”

¹⁵Abanji bakati, “Awe, we Eliya.” Abamwabo sona bakati, “We mulaghuzi, yuyo ayanite bulo na balaghuzi abavula intazi.”

¹⁶Bo u Helodi ivwa ichi akati, “We Yohani Uwalozyo, yuyo inkalamula ukuti umutu wache ghudumuliwe, loli azyuka kubufwe!”

¹⁷U Helodi akalamula ukuti bamuleme u Yohani nukumupinya nukumwighalila mujele. U Helodi akabomba zinizi, pachifukwa ichakuti akasemya u Helodiya umuchi uwa wamwabo u Filipu.

¹⁸U Yohani akendelela pakumubuzya u Helodi ukuti, “Indaghilo zyitu zitakwitikizya ukuti usemye umuchi uwa wamwinyu!”

¹⁹Po u Helodiya akamubenga u Yohani, sona akalondagha pakumughogha, loli akapotwa pachifukwa icha Helodi.

²⁰U Helodi akamunyilagha u Yohani pakuti akazimanya ukuti u Yohani akaba muntu umwiza nu muzelu, po akamusunga akiza. Po nanti u Helodi ivwa amazyu agha Yohani atakabanga nu mutende mumoyo wache; loli pope bulo akighana pakumuteghelezya.

²¹Pabumalilo pache u Helodiya akalwaghilapo ulusako. Pisiku ilya kusekela ukupapiwa ukwa Helodi, akayannya ulusekelo nukwitizya bosi abasongo aba Boma, abasongo aba basikali abankondo na bantu abamanyikwe mu Galileya.

²²Umwana umulindu uwa Helodiya[9] akinjila mukasi nukwimba, umwakuti u Helodi na bayeni bache bakahoboka nkani. Po u mwene akamulaluzya umulindu yula akati, “Nkimba ukulonda ichoni? Mbuzya, inkwiza pakukupacho.”

²³Akamulayizya nkani pakulapa ukuti, “Inkulapa ukuti inkwiza pakukupa chosi chicho ukulaba, napapo tungagabana ubumwene bwane pakasi na pakasi!”

²⁴Umulindu akafuma kuzi nukumulaluzya unyina ukuti, “Nkimba indabe ichoni?” Unyina akamula akati, “Umutu uwa Yohani Uwalozyo.”

²⁵Panapo na panapo umulindu akanyokela kwa Helodi nukuti, “Losi ulu inkulonda umpe umutu uwa Yohani Uwalozyo mumbale!”

²⁶Po u mwene u Helodi ichitima chikamulema nkani, loli atakamukanila pachifukwa icha kulapa kwache pamaso pa bayeni bache bosi.

²⁷Umwalubilo-lubilo u Helodi akamutuma umulindilili uwa bakayidi nukumulamula ukuti asende umutu uwa Yohani. Umulindilili yula akabuka kujele nukudumula umutu uwa Yohani.

²⁸Akiza nagho mumbale nukumupa umulindu, po umulindu yula akamupa unyina.

²⁹Bo abamanyili aba Yohani bivwa zinizi, bakiza nukusenda umuvimba uwa Yohani nukughubika mwipumpa.

³⁰Abatumiwa bakanyokela nukumubuzya u Yesu vyosi vivyo bakabomba na vivyo bakamanyizya.

³¹Pakaba abantu abinji nkani abakwiza nu kubuka, umwakuti u Yesu na bamanyili bache batakaba na kabalilo akakulyela. Po u Yesu akababuzya akati, “Twende kubuyo kuko tungaba twebene ukuti mutuzye panandi.”

³²Po bakakwela mubwato nukubuka bene, kubuyo kuko kutakabako abantu.

³³Loli abantu abinji bakabennya bakunyamuka nukubamanya umwalubilo-lubilo, po abantu bala bakafuma muvyisu vyosi nukufika kubuyo bula bo u Yesu na bamanyili bache batafikite.

³⁴Bo u Yesu ika mubwato akennya ichilundilo icha bantu. Akaba ni chililizi na bantu bala, pakuti bakayana bulo ni ng'ozi zizyo zite nu mudimi. Po akanda pakubamanyizya ivintu ivyinji.

³⁵Pachamabwila abamanyili bache bakiza pakumubuzya ukuti, “Kwila kale, muno mo munkolongo.

³⁶Ubabwezye abantu ukuti babukaye mumaghunda na mutwaya tuto tuli papipi pakwilondela bene ivyakulya.”

³⁷Loli u Yesu akamula akati, “Amwe mwebene mubapanje ivyakulya.” Bakalaluzya bakati, “Nkimba ukulonda tubukaye pakughula ivibama ni ndalama isalabazya izyakukwana 200 ukuti tulyesye abantu bosi banaba?”

³⁸Po u Yesu akabalaluzya akati, “Muli ni vibama vilinga? Bukagha kennye.” Bo bennya, bakamubuzya u Yesu bakati, “Vilipo ivibama fayivi ni swi zibili.”

³⁹U Yesu akababuzya abamanyili bache ukuti babikazye abantu pisote iteta mutubukatila.

⁴⁰Po abantu bakikala pasi mutubukatila utwa bantu 100 nu twa bantu 50.

⁴¹Pisinda pache u Yesu akasenda ivibama fayivi ni swi zibili zila, akennya kumwanya nukupalizya kwa Chala. Akamenyannya ivibama vila nukubapa abamanyili bache ukuti babagabile abantu. U Yesu akabagabila sona abantu bosi iswi zibili zila.

⁴²Abantu bosi bala bakalya nukwikuta.

⁴³Po abamanyili bakanyamula ividudunga 12 vivyo vikizula ni vibama, sona ni swi ivyakusyala.

⁴⁴Pakasi pa bantu babo bakalya, abanavuli bene bakabapo 5,000.

⁴⁵Panapo na panapo u Yesu akababuzya abamanyili bache ukuti bakwele mubwato nukulongolela ku Betisayida, kwisila ilinji ilya nyanja, bo akubabwezya abantu.

⁴⁶Bo alaghana na bantu, akanyamuka nukukwela pighamba pakwiputa.

⁴⁷Bo ubusiku bukwanda, ubwato bukaba pakasi panyanja, bo u Yesu ali mwene pisila.

⁴⁸U Yesu akabennya abamanyili bache bakutamiwa pakuvigha ubwato pakuti bakalumbilanagha ni mpepo, po na kabalilo aka kubuche akiza kukwabo akwenda pamizi. Bo ali papipi pakubachila,[10]

⁴⁹abamanyili bala bakamwennya, bo akwenda pamizi nukwinong'ona ukuti akaba chizyuka. Po bakanda pakukolomoka.

⁵⁰Bo bamwennya, bosi ubogha bukabalema nkani. Panapo na panapo u Yesu akababuzya akati, “Mutakatetemaye! Nene. Mutakanyilaye!”

⁵¹Po akakwela mubwato mula, impepo yila yikaleka pakukuka. Ichi chikabamala nkani amahala abamanyili,

⁵²pakuti batakivwisya ukuti ukulyesya ukwa bantu 5,000 bala chikung'anamula ichoni; imitu yabo yikaba mikafu nkani.

⁵³Bakaloboka inyanja yila nukufika mukaya aka Genesaleti, kuko bakapinyilila ubwato.

⁵⁴Bo bika mubwato mula, panapo na panapo abantu bakamumanya ukuti akaba we Yesu.

⁵⁵Po bakachimbilila mutwaya utupalamani nukubasenda ababine bosi pamachila nukwiza nabo kubuyo bubo u Yesu akabako.

⁵⁶Sona kosi kuko u Yesu akabukagha, mutwaya, muminalo pamo mumaghunda, abantu bakabasendagha ababine, bakabukagha nabo ku minalo nukumulaba ukuti abitikizye ababine pakupalamasya bulo mulubazu ulwa mwenda wache. Po abantu bosi babo bakaghupalamasya bakapolagha.