Read lambya LUKA 19 Bible Online

LUKA 19 - lambya bible

LUKA 19

¹U Yesu akinjila mukaya aka Yeliko, sona akadumusannyanga bulo.

²Kukabako usongo yumo umusonkezya sonko, yuyo akaba we Zakeyu, sona akaba mukabi.

³Akalondagha pakumwennya mumo u Yesu abeleye. Loli pakuti u Zakeyu akaba muntu umupimpa, akapotwa pakumwennya ichifukwa abantu bakaba binji.

⁴Po akachimbilila kuntazi nukukwela mwikwi ilya ikuyu ukuti amwennye u Yesu, pakuti u Yesu akadumusannya muzila yila-yila.

⁵Bo u Yesu afika pabuyo bula akennya mumwanya nukumubuzya ukuti, “Zakeyu, ika lubilo-lubilo pakuti ilelo imbaghiye pakwikala munyumba yako.”

⁶Umwalubilo-lubilo u Zakeyu akika nukumupokela nu buhobosu nkani.

⁷Abantu bosi babo bakennya chinichi bakanda pakwilumbuzya bakati, “Umuntu yunuyu aba muyeni munyumba iya muntu uwambibi.”

⁸U Zakeyu akimilila nukumubuzya u Mwene ukuti, “Ivwa kuno, Mwene! Inkwiza pakubapa pakasi na pakasi ivyuma vyane abantu abapina, sona nanti imuzimbuyepo umuntu yumo inkwiza pakumunyosezya ka folo ukuchilapo.”

⁹U Yesu akamubuzya akati, “Ubupoki bwiza munyumba iyi ilelo, pakuti umuntu uyu wepe waluko ulwa Abulahamu.

¹⁰Pakuti u Mwana uwa Muntu akiza pakupoka abantu abakusobela.”

¹¹Bo abantu bakuteghelezya zinizi, u Yesu akendelela pakubabuzya ichili pakuti akaba papipi nu Yelusalemu, sona abantu bakinong'ona ukuti u Chala ali papipi pakwikazya Ubumwene bwache.

¹²Po akati, “Kukabako umuntu yumo uwapamwanya, yuyo akabukagha kuchisu ichakubutali ukuti imikiwe pakuba we mwene, po akabwela kunyumba bo bamwimika.

¹³Bo achili pakubuka, akabitizya abambombo bache 10 bala. Akamupa umuntu wesi isalabazya izya golide teni, sona akababuzya akati, ‘Muzibombezye imbombo indalama izi mupaka nize.’

¹⁴Loli abantu aba mukaya kache bakamubenga, po bakatuma intumi ukuti, ‘Aswe tutakumulonda umuntu uyu pakuba we mwene witu.’

¹⁵“Loli umuntu yula akimikiwa pakuba we mwene nukubwelako. Panapo na panapo akabitizya abambombo bache, babo akabapa indalama zyache ukuti azimanye zizyo bakabilapo.

¹⁶Uwambombo uwakwanda akiza nukuti, ‘Wee mwene, ukampa isalabazya yoka, loli ilelo nakabilapo izinji teni.’

¹⁷Akati, ‘Wabomba akiza, we wambombo umwiza nu musubiliwa! We musubiliwa patuntu utunandi, po ukwiza pakuba we songo uwa twaya utukulu nkani teni.’

¹⁸Uwambombo uwabubili akiza nukuti, ‘Wee mwene, ukampa isalabazya yoka, loli ilelo nakabilapo izinji fayivi.’

¹⁹Uwambombo uyu akamubuzya akati, ‘Ukwiza pakuba we songo uwa twaya utukulu nkani fayivi.’

²⁰Uwambombo uyunji akiza nukuti, ‘Wee mwene, isalabazya yako iya golide iyi, nayifisite mu kamwenda.

²¹Inkanyilagha pakuti we muntu mukali. Ukusenda na chicho chite chako, sona ukwinula chicho utabyalite.’

²²Akamubuzya akati, ‘We wambombo umubibi! Inkwiza pakubombezya amazyu ghako pakukususya awe. Uzimanye ukuti ane ne muntu mukali, inkusenda na chicho chite chane, sona inkwinula chicho intabyalite.

²³Po nkimba choni chicho utakabikagha indalama yane kunyumba iyakusungilamo indalama ukuti bo inkubwela impokele poka na yiyo yakabilapo?’

²⁴Po akababuzya abantu babo bakimilila pala-pala akati, ‘Mufyule isalabazya yoka nukumupa uwambombo yuyo ali ni salabazya teni.’

²⁵“Loli abantu bala bakamubuzya bakati, ‘Mwene, ali nazyo kale isalabazya teni.’

²⁶Akamula akati, ‘Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo, akwiza pakufyuliwa na kanandi bulo kako ali nako kale.

²⁷Loli abalwani bane babo batakandondagha ukuti imbanje ne mwene wabo, mwize nabo kuno nukubaghogha pamaso papane.’ ”

²⁸Bo u Yesu anena amazyu ghanagha, po akalongolela pakubuka mu Yelusalemu.

²⁹Bo apalamila kutwaya utwa Betifage nu Betaniya papipi ni ghamba ilya Misyunguti, akabatuma abamanyili bache babili.

³⁰Akababuzya akati, “Bukagha mukaya kako kali kuntazi kwinyu. Bo mwinjila bulo, mukwiza pakumwagha umwana uwa mpunda bamupinyiliye, yuyo batakwelitepo nalumo. Mumusatule nukwiza nawe kuno.

³¹Nanti umuntu yumo akubalaluzya ukuti, ‘Nkimba choni chicho mukumusatula?’ Mumubuzye ukuti, ‘U Mwene[21] akumulonda.’ ”

³²Bakabuka nukuzyagha zyosi vivyo u Yesu akababuzya.

³³Bo bali pakumusatula, abenecho bakabalaluzya bakati, “Choni chicho muli pakusatula umwana uwa mpunda?”

³⁴Bakamula bakati, “U Mwene akumulonda.”

³⁵Po bakabuka nawe kwa Yesu, bakatenga amenda panyuma iya mpunda yila nukumukwezyapo u Yesu.

³⁶Bo u Yesu akubuka, abantu bakatenga amenda ghabo mumusebo.

³⁷Bo apalamila ku Yelusalemu, pabuyo bubo umusebo ghukikilagha kwighamba ilya Misyunguti, abamanyili bache abinji bakanda pakumupalizya u Chala na mazyu agha pamwanya pachifukwa icha vintu ivikulu vivyo bakavyennya ukuti,

³⁸“U Chala amusaye u mwene yuyo akwiza mwitabwa ilya Mwene. Umutende kumwanya, sona ubuchindamu kwa Chala.”

³⁹Po aba Falisayi bamo muchilundilo chila bakanena kwa Yesu bakati, “Wee Mumanyisi, babuzye abamanyili bako ukuti babanje myee.”

⁴⁰U Yesu akamula akati, “Inkubabuzya ukuti nanti baba myee, amabwe gho ghagho ghakwiza pakukolomoka.”

⁴¹U Yesu akapalamila kukaya akakulu kala-kala, po akakalilila, bo akennya,

⁴²nukuti, “Wee, nanti bulo ilelo wachimenye chicho chikwiza nu mutende. Loli, awe, ilelo amaso ghako ghatangachennya.

⁴³Akabalilo kakwiza bo abalwani bako bakwiza pakukuzyungulila kosi na kosi. Bakwiza pakubakanizya abantu bako pakufuma kuzi nu kwinjila mukasi.

⁴⁴Bakwiza pakukuzimizya poka na bantu bako bosi. Bakwiza pakumongolannya ivibumba vyosi, sona batakwiza pakulileka nalimo-limo ibwe palyamwabo, ichifukwa utakakaghannya akabalilo kako u Chala akalondagha pakukupoka.”

⁴⁵U Yesu akinjila mu Nyumba iya Chala nukwanda pakubachimbizya babo bakaghulagha nu kughulizya.

⁴⁶Akababuzya akati, “Amasimbo ghakuti, ‘Inyumba yane yikwiza pakwitiziwa inyumba iyakwiputilamo.’ Loli amwe mwayipela pakuba nyumba iyakuvwamilamo amavyondongo!”

⁴⁷Isiku ni siku u Yesu akamanyizyanga mu Nyumba iya Chala. Abaputi abasongo na bamanyisi aba Ndaghilo na balongozi aba Chiyuda bakalondagha pakumughogha,

⁴⁸loli batakayaghagha izila iya kumughoghela pakuti abantu bosi bakendelela pakumuteghelezya, sona batakalondagha ukuti babwinde izyu nalimo-limo.