Read lambya LUKA 2 Bible Online

LUKA 2 - lambya bible

LUKA 2

¹Mumasiku ghala-ghala u Kesale u Ogasitini akalamula ukuti abantu bosi babelengiwe muvyisu vyache vyosi.

²Ukubelenga kunuku kukaba kwakwanda pakubombiwa, bo u Kwiliniya mulaghili uwa chisu icha Siliya.

³Po abantu bosi bakabuka pakwisimbisya bene, umuntu wesi kukaya kache.

⁴U Jozefu akafuma mukaya aka Nazaleti muchigaba icha Galileya nukubuka kukaya aka Betelehemu muchigaba icha Yudeya, kubuyo bubo u Mwene u Devedi akapapiliwako, U Jozefu akabuka kula-kula pakuti akaba waluko ulwa Devedi.

⁵Akabuka poka nu Maliya pakusimbisya, yuyo akamuzingilila ukuti amusende. Akamela ulwanda,

⁶sona bo bali mu Betelehemu, akabalilo kache akakusayiwa kakwana.

⁷Akapapa umwana wache umulumendo ukatote, akamuvwinka na menda nukumughoneka muchakulyelamo ing'ombe, pakuti batakabwaghamo ubuyo munyumba iya bayeni.

⁸Kulubazu lula-lula ulwa chisu, kukabako abadimi bamo babo bakalindililagha ing'ozi zyabo muzi pabusiku.

⁹Uwantumi uwa Mwene akababonekela, sona ubuchindamu ubwa Mwene bukabalamila. Po bakanyila nkani,

¹⁰loli uwantumi yula akababuzya akati, “Mutakanyilaye! Niza na mazyu amiza kukwinyu, ghagho ghakwiza pakubahobosya nkani abantu bosi.

¹¹Pakuti ubusiku ubu mukaya aka Devedi mupapiwemo Umupoki winyu, yuyo we Kilisitu u Mwene!

¹²Ichi cho chimanyilo: Mukwiza pakumwagha ubonda bamuvwinkite na menda nukumughoneka muchakulyelamo ing'ombe.”

¹³Umwalubilo-lubilo akabukatila akakulu aka bantumi aba kumwanya poka nu wantumi yula kakaboneka kakwimba nukumupala u Chala ukuti,

¹⁴“Ubuchindamu kwa Chala uwa kumwanya nkani, umutende pachisu ichapasi pakasi pa bantu babo u Chala akuhoboka nkani nabo!”

¹⁵Bo abantumi banyokela kumwanya, abadimi bala bakanenezannya bene-bene ukuti, “Twende ku Betelehemu nukwennya ivintu vivyo vyabombiwa, vivyo u Mwene atubuzya aswe.”

¹⁶Po bakabuka umwalubilo-lubilo nukumwagha u Maliya nu Jozefu, sona bakamwennya ubonda aghonite muchakulyelamo ing'ombe.

¹⁷Bo abadimi bamwennya, bakababuzya zizyo uwantumi akanena nizya mwana yula.

¹⁸Bosi babo bakivwa zizyo abadimi bakanena, bakaswigha.

¹⁹U Maliya akasunga mumoyo wache ivintu vyosi vinivi nukuvyinong'ona nkani.

²⁰Abadimi bala bakanyokela, bo bakwimba inyimbo izyakumupala u Chala pavyosi vivyo bakivwa nu kwennya. Vikayana bulo na mumo uwantumi uwa kumwanya akanenela.

²¹Bo pachilapo usabata weka, bo akabalilo aka kusilimulila umwana kakwana, bakamwita u Yesu itabwa, lilyo uwantumi uwa kumwanya akamupa, bo nu lwanda lutamelite.

²²Akabalilo kakakwana akakuti u Jozefu nu Maliya babombe ulwiho ulwa kwiswefezya ukuyana ni Ndaghilo izya Mozesi. Po bakasenda umwana nukubuka nawe mu Yelusalemu pakupaghuliliwa kwa Mwene.

²³Pakuti zisimbiwe mundaghilo izya Mwene ukuti, “Umwana wesi ukatote umulumendo apaghuliliwanje kwa Mwene.”

²⁴Bakabuka sona pakubika ivyabupi ukuyana ni ndaghilo izya Mwene ukuti, “Babikaye intozi zibili pamo utwana tubili utwa nkunda pakuba ichakwiyipa.”

²⁵Pakabalilo kala-kala kukabako umuntu yumo yuyo akaba we Simiyoni, yuyo akikalagha mu Yelusalemu. Akaba mugholosu, sona umuntu uwakumunyila u Chala. Akalindililagha akabalilo kako u Chala akwiza pakubapoka aba Izilayeli, sona u Muzimu Umuzelu akaba nawe.

²⁶U Muzimu Umuzelu akamusimikizizya ukuti atakafwanje bo atamwenizye u Kilisitu uwa Mwene.

²⁷U Muzimu Umuzelu akamulongozya u Simiyoni ukuti abuke mu Nyumba iya Chala. Abapapi aba Yesu bope bakinjila nu bonda munyumba mula pakubomba inyiho ukuyana ni Ndaghilo izya Mozesi.

²⁸U Simiyoni akamusenda ubonda munyobe zyache nukumupalizya u Chala ukuti:

²⁹“Mwene, ilelo umwitikizye umubombi wako ukuti abukaye mumutende, pakuti wasungilila ilayizyo lyako.

³⁰Na maso aghane na ghane nabwennya ubupoki bwako,

³¹bubo wabayanizizya abantu bosi ukuti babwennye.

³²Wavumbula ulukozyo ukuti lubalamile abantu babo bate ba Yuda nukwiza pakuba buchindamu ku ba Izilayeli.”

³³Uwise nu nyina uwa mwana bakaswigha nkani na zizyo u Simiyoni akanena nizya mwana yula.

³⁴U Simiyoni akabasaya nukunena kwa nyina, u Maliya ukuti, “Umwana uyu asaliwe nu Chala ukuti abanje chakubawisya, sona ni chakupoka abantu abinji aba Izilayeli. Akwiza pakuba chimanyilo ichakufuma kwa Chala, chicho abantu abinji bakwiza pakususannya nacho,

³⁵umwakuti akwiza pakuvumbula pabuzelu inyinong'ono zyabo izya kubusyefu. Sona kukwako mayi, ichitima chikwiza pakulasa umoyo wako ngati yo mpalala.”

³⁶Kukabako umukolo yumo umulaghuzi umughosi nkani yuyo akaba we Ana, umwana uwa Fanuwelo uwaluko ulwa Asheli. Akaba pasendwa amaka seveni ghene bulo

³⁷po pisinda pache akaba mufwilwe amaka 84.[2] Akalindagha munyumba iya Chala, akamwiputagha u Chala umusanya nu busiku nukutuzya pakulya.

³⁸Pakabalilo kala-kala akiza nukumupalizya u Chala nukunena nizya Mwana yula ku bosi babo bakalindililagha akabalilo akakuti u Chala amusatule u Yelusalemu.

³⁹Bo u Jozefu nu Maliya bamala pakubomba vyosi ukuyana ni ndaghilo izya Mwene, bakanyokela ku Nazaleti muchigaba icha Galileya kukaya kabo.

⁴⁰Umwana akakula, sona akaba na maka. Akizula na mahala nkani, sona nu lusayo ulwa Chala lukaba papache.

⁴¹Umwaka nu mwaka abapapi aba Yesu bakabukagha ku Yelusalemu ku Lusekelo ulwa Pasa.

⁴²Bo u Yesu ali na maka 12, bakabuka ku Lusekelo ulwa Pasa ukuyana na mumo bakizubilila.

⁴³Bo ulusekelo lwamala, bakanda pakunyokela kunyumba, loli umulumendo u Yesu akasyalikila mu Yelusalemu. Abapapi bache batakazimanya zinizi.

⁴⁴Bakinong'onagha ukuti akaba muchilundilo icha bantu, po bakenda isiku lyosi nukwanda pakumulonda pakasi pa bakamu na pa bamanyani babo.

⁴⁵Bo bapotwa pakumwagha, bakapyanila ku Yelusalemu pakumulonda.

⁴⁶Pisiku ilya butatu bakamwagha mu Nyumba iya Chala ikaye na bamanyisi aba Ndaghilo, pakubateghelezya nukubalaluzya amalaluzyo.

⁴⁷Abantu bosi babo bakamwivwa bakaswigha na mamulo ghache aghamahala.

⁴⁸Bo abapapi bache bamwennya, bakaswigha nkani, po unyina akamubuzya akati, “We mwana wee, nkimba choni chicho watutamya bunubu? Ane nu ghuso twatamiwa nkani pakukulonda.”

⁴⁹U Yesu akabamula akati, “Nkimba choni chicho mwandondagha? Mutazimenye ukuti imbaghiye pakuba munyumba iya Tata wane?”

⁵⁰Loli batakalyivwisya ilyamulo lyache.

⁵¹Po u Yesu akanyokela nabo ku Nazaleti kuko akabivwilagha ngati bo bapapi bache. Unyina akavisunga vyosi vinivi mumoyo wache.

⁵²U Yesu akakula umubili na mumahala, sona u Chala na bantu bulo bakahoboka nkani nawe.