Read lambya LUKA 23 Bible Online

LUKA 23 - lambya bible

LUKA 23

¹Ichilundilo chosi chikanyamuka nukubuka nu Yesu kwa Pilati,

²kuko bakanda pakumutamantila ukuti, “Tukamwagha umuntu yunuyu akubasovya abantu bitu, akubakanizya pakusonka umusonko kwa Kesale, nukwinena mwene ukuti we Kilisitu, sona we Mwene.”

³U Pilati akamulaluzya akati, “Nkimba awe we Mwene uwa ba Yuda?” U Yesu akamula akati, “Wanena wemwene.”

⁴Po u Pilati akababuzya abaputi abasongo ni chilundilo icha bantu chila akati, “Intakumwaghapo ni nongwa nayimo-yimo umuntu uyu.”

⁵Loli bakiyula nkani pakunena bakati, “Ni vimanyilo vyache akwandisya ivyongo mu bantu muchigaba chosi icha Yudeya. Akanda muchigaba icha Galileya, ilelo ali kuno.”

⁶Bo u Pilati ivwa zinizi, akalaluzya akati, “Nkimba umuntu uyu wa mu Galileya?”

⁷Bo azimanya ukuti u Yesu akafuma muchigaba chicho chikalaghililiwanga nu Helodi, akamutuma kwa Helodi, yuyo akaba mu Yelusalemu akabalilo kala-kala.

⁸U Helodi akahoboka nkani bo amwennya u Yesu pakuti akivwanga bulo nizya yuyo, sona akamulondagha akabalilo akatali pakumwennya. Akalondagha nkani ukuti amwennye u Yesu akubomba ichika chimo.

⁹Po u Helodi akamulaluzya u Yesu amalaluzyo aminji, loli u Yesu atakamwamula.

¹⁰Abaputi abasongo na bamanyisi aba Ndaghilo bakiza pantazi nukumutamantila nkani u Yesu.

¹¹U Helodi na basikali bache abankondo bakamobezya u Yesu nukumutuka. Po bakamuvwika inkazo inyiza nukumutuma sona kwa Pilati.

¹²Bo zitabombiwe zinizi, pakasi pa Helodi nu Pilati pakaba ubulwani. Loli ukwandila pisiku lila-lila bakaba pa bumanyani.

¹³U Pilati akabitizya poka abaputi abasongo, na balongozi, sona na bantu bosi

¹⁴nukubabuzya ukuti, “Mwizite nu muntu uyu kukwane ukuti akubasovya abantu. Po ilelo namulaluzya pamaso papinyu, loli intakuyaghamo nayimo-yimo inongwa mu muntu uyu pavintu vivyo mukumutamantila.”

¹⁵Wepe u Helodi atakamwaghapo ni nongwa, cho chifukwa akamunyosezya kukwitu. Chitalipo nachimo-chimo chicho umuntu uyu abombite ichakuti angaghoghiwa nacho.

¹⁶Po inkwiza pakumusyempa bulo nukumulekezya ukuti abukaye.[25]

¹⁷

¹⁸Abantu bosi bala bakakolomoka nkani ukuti, “Umughoghe! Tusatulile u Balabasi!”

¹⁹(U Balabasi akaba mujele pachifukwa icha kwandizya ivyongo mukaya akakulu nkani, sona nu kughogha abantu.)

²⁰U Pilati akalondagha pakumusatula u Yesu, po akabuka sona pakunenezannya na bantu bala.

²¹Loli abantu bakakolomoka nkani bakati, “Umukomele pachipinjika! Umukomele pachipinjika!”

²²U Pilati akababuzya akabutatu akati, “Nkimba ananga ichoni? Intakuyaghamo nayimo-yimo inongwa iyakuti angaghoghiwa nayo. Inkwiza pakumusyempa bulo nukumulekezya ukuti abukaye.”

²³Loli bakendelela pakukolomoka na mazyu agha pamwanya ukuti u Yesu akomeliwe pachipinjika. Pabumalilo ukukolomoka kwabo kukapota.

²⁴Po u Pilati akadumula ukuti chicho abantu bakalondagha cho chicho chibombiwe.

²⁵Akamusatula umuntu yuyo bakamulondagha, yuyo akaba mujele pachifukwa icha kwandizya ivyongo nu kughogha abantu, po akamubika u Yesu munyobe zyabo ukuti babombe nawe ukuyana na mumo bakalondelagha.

²⁶Abasikali abankondo bakamusenda u Yesu nukubuka nawe. Muzila bakakomana nu muntu yumo uwa mu Kileni, yuyo akaba we Simoni, yuyo akafumagha mutwaya. Bakamunyamulisya ichipinjika ukuti amukonkaye u Yesu mwisinda.

²⁷Ichilundilo ichikulu icha bantu chikamukonkagha u Yesu. Mumwabo mukaba abakolo bamo babo bakaba ni chitima nu Yesu nukumulilila.

²⁸U Yesu akaghalabukila kukwabo nukubabuzya ukuti, “Mwe bakolo aba mu Yelusalemu, mutakandililaye ane. Loli mwililile mwebene na bana binyu.

²⁹Pakuti amasiku ghakwiza ghagho abantu bakwiza pakunena ukuti, ‘Balusako abakolo babo baghumba, babo batapapitepo nalumo, babo batonkezizyepo nalumo.’

³⁰Kala-kala kakwiza pakuba kabalilo kako abantu bakwiza pakughabuzya amaghamba ukuti, ‘Tuwile,’ nukutubuzya utughamba ukuti, ‘Tufise.’

³¹Pakuti nanti bakubomba zinizi kwikwi ibisi, po zingaba buli-buli kwikwi ilyumizu?”

³²Bakasenda sona na bantu bamo babili, babo ghakaba mavyondongo ukuti ghaghoghiwe poka nu Yesu.

³³Bo bafika pabuyo bubo bukwitiziwa ukuti, “Ifupa ilya kumutu.” Bakamukomela u Yesu pachipinjika pala-pala poka na mavyondongo mabili ghala, lyoka kunyobe indilo, sona ilinji iya kumongo.

³⁴U Yesu akati, “Wee Tata ubahobokele pakuti batakuzimanya zizyo bakubomba.”[26] Bakagabana amenda ghache pakupanga amayele.

³⁵Abantu bakimilila pala-pala pakwennya bo abalongozi aba Chiyuda bakumobezya u Yesu ukuti, “Akabapokagha abantu abanji, muleke wepe ipoke mwene nanti we Kilisitu yuyo u Chala akamusala.”

³⁶Abasikali abankondo bope bakamobezya. Bakapalamila papipi nawe nukumupa uvinyo uwakusapa ukuti ang'wele

³⁷nukuti, “Nanti we Mwene wa ba Yuda, ipoka wemwene.”

³⁸Pamwanya pachipinjika chache pakasimbiwapo amazyu aghakuti, “Uyu we Mwene uwa ba Yuda.”

³⁹Weka uwa mavyondongo yuyo bakamukomela poka nawe akamutuka u Yesu akati, “Nkimba awe ute we Kilisitu? Ipoka wemwene, sona utupoke naswe bulo!”

⁴⁰Loli ilinji likamuchemela likati, “Nkimba utakumunyila u Chala? Uli pakufundiwa nu lufundo ngati lulo ali pakufundiwa nalo.

⁴¹Aswe zitubaghiye pakuti tufundiwe ukuyana na zizyo twabombite; loli umwene atabombite nachimo-chimo ichibibi.”

⁴²Po akati, “Yesu, unkumbuke nanti wafika mu Bumwene bwako!”

⁴³U Yesu akamubuzya akati, “Naloli inkukubuzya ukuti ilelo ukwiza pakuba nane ku Buyo ubwa buhobosu kumwanya.”

⁴⁴Bo izuba lyafika pamutu, likaleka pakulama, sona ichisi chikawa muchisu chosi mupaka fili koloko pachamabwila.

⁴⁵Umwenda ghugho ghukazighila mu Nyumba iya Chala ghukazepuka pakasi na pakasi.

⁴⁶U Yesu akalila nizyu ilya pamwanya akati, “Wee Tata inkughubika umuzimu wane munyobe zyako!” Bo anena zinizi, akazililika.

⁴⁷Usongo uwa basikali akennya zizyo zikabombiwa nukumuchindika u Chala ukuti, “Naloli uyu akaba muntu mugholosu.”

⁴⁸Abantu bosi babo bakabungana pala-pala ukwennya chicho chikabombiwa, bo bennya chicho chikabombiwanga, bakabwela kunyumba zyabo bakwikoma pavifuba vyabo ni chitima.

⁴⁹Abantu bosi babo bakamanyana nu Yesu, poka na bakolo babo bakamukonkagha ukufuma mu Galileya bakimilila pa butalipo ukwennya zinizi.

⁵⁰Kukabako umuntu yumo yuyo akaba we Jozefu uwa mukaya aka Alimatiya, muchigaba icha Yudeya. Umwene akaba muntu mwiza sona mugholosu, yuyo akalindililagha ukwiza ukwa Bumwene ubwa Chala.

⁵¹Napapo akaba wa kabukatila aka Chiyuda, atakitinkana ni nyinong'ono, sona ni mbombo zyabo.

⁵²Akabuka kwa Pilati nukulaba umuvimba uwa Yesu.

⁵³Po akisya umuvimba ghula nukughunnyembetelela ni sanda nukughubika mwipumpa, lilyo likakumbiwa kwibwe, sona batakabombezyapo nalumo.

⁵⁴Pakaba po pa Chisano, sona Isiku Ilyakutuzya likaba papipi pakwanda.

⁵⁵Abakolo babo bakamukonkagha u Yesu ukufuma mu Galileya bakabuka nu Jozefu pakwennya ipumpa, sona na mumo bakaghubikila umuvimba uwa Yesu.

⁵⁶Bakabwela kunyumba nukuyannya amafuta ni vyakununkila. Loli bakatuzya Pisiku Ilyakutuzya ukuyana ni Ndaghilo izya Mozesi.